Amôs 6 - Sră Goh 2018

Bòl glar ngan ală cau in ơm ring lơngai

¹ Bòl glar ngan cau lơi in ơm lơngai tòm Siôn, mơ cau lơi in tồnlah geh ơm ring lơngai hơđang mơnơm Samari! Bòl glar ngan bol mê in la ală cau ryŭ ryơm khà dùl tòm ală làng bol, bơh di bol khai gơlik gơs hìu Israel geh sac rwah!

² Lòt gan tĕ hơ Kalneh mơ sền, bơh hơ̆ lòt tus hơ ƀòn dờng Hamat, lồc behơ̆ mù tus hơ Gat tòm lơgar Philistin. Bol mê la niam rlau mơ ală lơgar bơtau do sơl? Hala ù tiah bol mê dê la dờng ơnàng rlau mơ ù tiah bol khai dê ơ?

³ Bol mê sang ngài tĕ ngai iơh bơsak, mơ cèng tus rềp dô gơnoar at bồ jàñ bơsak.

⁴ Bol mê la ală cau bic hơđang ală cơnòng lơh mơ bla rwas, mơ bic rlô hơđang ală cơnòng jòng bol mê dê; Bol mê sa poac ală belàt kòn sac rwah bơh di mpồl mơ ală kơnrồ bơh wàng.

⁵ Bol mê la ală cau đơs chò jat ntas ală kơñi pĕ bol mê dê, mơ be Dabit, mơ lơh gơs ală tềl kơñi is khai in hơđang kơñi;

⁶ Bol mê la ală cau ñô tơrnòm tòm ală jơrlŭ mơ bong ală mơñà niam rlau jơh, mơya bol mê ò kơlôi moat jrùng bơh bơta tơnroh Jôsep dê!

⁷ Gen tàng bol mê rơp la ală cau sơnròp kong kup cèng gơs dĭ, mơ bơta pơjum kơnhơl chò hòp bơh bơta lòt yơng rơp jơh.

Yàng Jehôwa cù kìr di bơta pơnhừ să Israel dê

⁸ Jehôwa Yàng Tom Trồ neh srat să mơ să tòm Kơnràñ; Jehôwa Yàng Tom Trồ Gơnap Gơnoar Dờng làm Jơh đơs lah: “Añ cù kìr di bơta pơnhừ să Jakôp dê, mơ gơjrañ mañ di ală gơlang kơ̆ cê khai dê; Añ rơp jào phi ƀòn dờng mơ jơh ală phan tòm hơ̆.”

⁹ Dilah tòm dô nơm hìu gam wơl jơt nă, gen bol khai kung rơp chơt jơh.

¹⁰ Mơ dilah dô nă cau gơp bơtiàn pal chu ƀồc chơt, khai rơp tus tă cèng ƀồc bơh hìu, mơ lùp cau lơi gam ơm tòm hìu lah: “Gam gơs cau lơi ơm bal mơ mê sơl?” Cau hơ̆ đơs lah: “Ò gơs cau lơi ò.” Gen khai rơp đơs lah: “Ơm tĕ mŏ mŏ! Bol he bañ đơs tai bơh sơnđan Yàng Jehôwa!”

¹¹ Bơh Yàng Jehôwa neh ai jơnau sồr, mơ hìu dờng rơp kòl pòng tơrlah tơrlơm, mơ hìu dềt lề rpot rpet.

¹² Ală ơseh ntoat hơđang lŭ ơ? Cau rgơi troă dàlềng mơ kơnrồ sơl ơ? Mơya bol mê neh tòmgơl bơta song ngan gơlik gơs bơta bih khih, mơ tòmgơl plai song ring gơlik gơs sràt bơtang.

¹³ Bol mê la ală cau hòn chò tòm Lô Debar mơ đơs lah: “Ò di bol he neh kơnòm di pràn tòm bol he dê mơ geh Karnaim ò ơ?”

¹⁴ Bơh Jehôwa Yàng Tom Trồ Gơnap Gơnoar Dờng Làm Jơh đơs lah: “Ơ hìu Israel, Añ rơp bơtào tơngguh dô nơm làng bol tòmdră mơ bol mê, gơ rơp rồn bơklơn bol mê bơh Lebo Hamat tus di croh Arabah.”