Amôs 5 - Sră Goh 2018

Jơnau ñìm rac mơ jơnau hòi jà gơjrañ sang glài

¹ Ơ hìu Israel, iat tĕ jơnau do, la jơnau añ ñìm rac tài bơh bol mê:

² “Kòn ơruh Israel dê neh gơpừ, ò gơs tŭ lơi guh tai, gơkòl sang lòi tòm lơgar tòm khai dê, rơp ò gơs cau lơi yò khai guh.”

³ Bơh Jehôwa Yàng Tom Trồ đơs be do: “Ƀòn dờng gơs dô rbô nă cau lik lòt rơp gam wơl mìng dô rhiang nă; mơ ƀòn dờng gơs dô rhiang nă cau lik lòt, rơp gam wơl mìng jơt nă lơm.”

⁴ Yàng Jehôwa đơs mơ hìu Israel be do: “Jòi jat tĕ Añ mơ geh kis;

⁵ bañ jòi jat Betel, mơ bañ lòt mut tòm Gilgal; hala bañ lòt gan tòm Beerseba. Bơh Gilgal ngan rơp kong kup cèng pơrdô, Betel rơp gơlik gơs tiah srau gòi.”

⁶ Jòi jat tĕ Yàng Jehôwa gen geh kis, dilah ò gen Kơnràñ rơp hìt be lơmpiat ồs tòmdră mơ hìu Jôsep; mơ gơ rơp sa loan Betel, mơ ò gơs dô nă cau lơi đơp chơt gơ.

⁷ Ôih, bol mê la ală cau tòmgơl bơta song ring gơlik gơs bơta sràt bơtang, mơ sơrbì bơta song ring tòm ù!

⁸ Jòi jat tĕ Bơtau neh crơng gơs ală sơmañ Jơgơu mơ sơmañ Ngal, tòmgơl bơta klam jơngo gơlik gơs àng drim, mơ lơh trồ ngai gơlik trồ mang, la Bơtau hòi dà tòm dàlềng mơ tuh gơ hơđang ù; Sơnđan Kơnràñ la Yàng Jehôwa.

⁹ Kơnràñ sồr bơta tơnroh tus hơđang cau pràn kơldang, mơ bơta tơnroh hơđang ƀòn dờng tiah kơp gàr.

¹⁰ Bol mê gơjrañ kơuềng dê cau lah pơrhơng di mpồng ƀòn, mơ sền òsơp di cau đơs jơnau song.

¹¹ Tài bơh bol mê jă trơm hơđang cau rƀah lơòi mơ bơklơn bol khai dap dia kòi mi. Bol mê neh bơt ală hìu mơ lŭ neh koh, bol mê rơp ò ơm tòm ală hìu hơ̆; bulah bol mê neh tam ală suơn ño gơs oă plai, bol mê rơp ò geh ñô tơrnòm gơ dê.

¹² Bơh Añ git ală bơta iơh bơsak bol mê dê la oă ir, mơ ală tồi glài bol mê dê la dờng ò git nđò. Bol mê rồn bơklơn cau song ring mơ dòp ală phan sa loă, mơ bol mê tơlo ală cau rƀah lik bơh dê mpồng ƀòn dờng.

¹³ Gen tàng cau git kơrhia rơp ơm mŏ mŏ tòm ală tŭ tơngai behơ̆, bơh ală tŭ tơngai la iơh.

¹⁴ Jòi jat tĕ bơta niam, bañ jòi jat bơta iơh, gen bol mê geh kis; mơ Jehôwa Yàng Tom Trồ Gơnap Gơnoar Dờng Làm Jơh, rơp ơm bal mơ bol mê; tòm toh be bol mê đơs.

¹⁵ Gơjrañ kơuềng tĕ di bơta iơh mơ kòñ gơboh tĕ di bơta niam; mơ bơt bơtào tĕ bơta song ring di mpồng ƀòn dờng. Digơlan Jehôwa Yàng Tom Trồ Gơnap Gơnoar Dờng Làm Jơh rơp ai bơta nđàc gơwèt hơ ală cau gam wơl Jôsep dê.

¹⁶ Gen tàng, Jehôwa, Yàng Tom Trồ Gơnap Gơnoar Dờng Làm Jơh đơs be do: “Rơp gơs jơnau ñìm rac tòm ƀlàng jơnum gùng ƀòn dờng, mơ jơnau driau moat jrùng tòm kòp nơm gùng. Bol khai rơp hòi ală cau lơh mìr sre ñìm ƀồc, mơ ală cau chài ñìm rac rơp pơt wòl.

¹⁷ Rơp gơs bơta pơt wòl tòm jơh ală suơn ño, bơh Añ rơp lòt gan digùl bol mê,” Yàng Jehôwa đơs behơ̆.

Ngai Yàng Jehôwa dê

¹⁸ “Bòl glar ngan bol mê in la cau kơp gơn ngai Yàng Jehôwa dê! Ñchi bơh tài bol mê kơp gơn ngai Yàng Jehôwa dê taih? Ngai hơ̆ rơp la klam jơngo, ò gơs bơta àng;

¹⁹ gơlơh be dô nă cau bulah neh dô klàs bơh klìu triă gen rơp tìp jơgơu, be dô nă cau bulah neh mut tòm hìu, neh ơn rlô tê khai dê hơđang dơrñang, gen gơkòl bơs kap.

²⁰ Ngai Yàng Jehôwa dê ò di la ngai klam jơngo cik ò àng, mơ bơta jơngo ò gơs bơta àng pơnđàng dô êt lơi tòm gơ ò ơ?

²¹ Añ gơjrañ, Añ sền òsơp ală ngai pơjum sa bol mê dê; Añ ò kòñ ală ngai pơjum dờng màng bol mê dê.

²² Bulah bol mê cèng Añ in ală phan ơn chu pơrguc mơ ală phan ơn mơ kòi mbo, Añ rơp ò dòp ală phan ơn hơ̆. Bulah bol mê cèng ală phan ơn bơta ring lơngai mơ dơngi phan poan jơng bol mê dê, Añ ò wèt mat di bol gơ ò.

²³ Sang tĕ ngài sap ală bơta đơs chò bol mê dê bơh di Añ! Añ rơp ò iat sap ală kơñi pĕ bol mê dê.

²⁴ Mơya lòi tĕ bơta song ngan hòr lik kung be dà, mơ bơta song ring kung be croh dà hòr sùm sùm!

²⁵ Ơ hìu Israel, bol mê neh cèng Añ in ală phan ơn duh khoai mơ ală phan ơn tòm poan jơt nam tòm ƀlàng ngềt ngơt sơl ơ?

²⁶ Bol mê neh tùng Sakkut bơtau bol mê dê, mơ Kaiwan yàng sơmañ bol mê dê, mơ ală rùp ràk bol mê neh lơh să tòm he in.

²⁷ Gen tàng Añ rơp tă bol mê kòl kup cèng pơrdô hơ đah ne Damas.” Yàng Jehôwa đơs behơ̆, sơnđan Kơnràñ la Yàng Tom Trồ Gơnap Gơnoar Dờng Làm Jơh.