Amôs 4 - Sră Goh 2018

Israel ò rê wơl hơ Yàng Tom Trồ

¹ Iat tĕ jơnau do, Ơ ală kơnrồ me Basan dê ơm hơđang mơnơm Samari, hơ̆ la ală cau rồn bơklơn cau rƀah lơòi mơ tơnlề cau siơ̆u siar, la ală cau đơs mơ ală bau klau bol khai lah: “Cèng tĕ bol he in ală phan ñô!”

² Yàng Jehôwa Gơnap Gơnoar Dờng Làm Jơh neh ai bơta sàng goh Kơnràñ dê mơ srat să lah: “Ngan, tŭ tơngai rơp tus hơđang bol ai, tòm tŭ bol khai rơp tă cèng bol ai mơ ală kơlnĕ, tian gơs cau lồi dut bol ai dê rơp kòl kup cèng bơh ală gai kwĕ gơs plai ndàr ka.

³ Bơh di tiah tơrluh tòm dơrñang kòp nă bol ai rơp lik lòt song hơđap, mơ bol ai rơp kong sơrbì sang tus tòm Harmôn,” Yàng Jehôwa đơs behơ̆.

⁴ “Lòt tus tĕ hơ Betel mơ tìs glài; lòt tus tĕ hơ Gilgal mơ bơtơl oă tai bơta tìs glài; cèng tĕ ală phan ơn pơdơng bol ai dê tòm kòp àng drim, cèng ơn tĕ ală pơnah jơt bol ai dê tòm kòp pe ngai.

⁵ Cèng tĕ piang lă ò gơs kañ, lơh gơs phan ơn bơta ưnngài, mơ yal tơlik tĕ bơh ală phan ơn jat nùs kòñ bol ai dê; yal tơnggit tĕ bơh ală bơta hơ̆, bơh hơ̆ la bơta bol mê kòñ lơh, ơ làng bol Israel!” Jehôwa Yàng Tom Trồ đơs behơ̆.

⁶ “Añ ai bol mê in sề goh ngan tòm ală ƀòn dờng bol mê dê, mơ lơh siơ̆u piang lă tòm jơh ală tiah bol mê dê, mơya bol mê kung ò rê wơl hơ Añ,” Yàng Jehôwa đơs behơ̆.

⁷ “Añ kung neh ò bài tơndùh mìu bol mê in, tòm tŭ gam pe kơnhai sồng tus di kơnhai toès. Añ neh đùh mìu hơđang dô nơm ƀòn do, mơya ò đùh mìu hơđang dô nơm ƀòn ndai. Dô lồ sre do neh geh mìu, dô lồ ndai ò geh mìu dô êt lơi mơ gơlik ro rañ.

⁸ Behơ̆, bàr hala pe nơm ƀòn dờng làng bol lòt yơng bơh ƀòn do tus hơ ƀòn ndai nàng jòi dà, mơya jòi ò tơl dà nàng hùc; bulah behơ̆, bol mê kung ò rê wơl mơ Añ,” Yàng Jehôwa đơs behơ̆.

⁹ “Añ neh pù lơh bol mê bơh bơta ro rañ, mơ but bơsềt; Añ neh lòi srau gòi ală suơn, mơ ală suơn ño bol mê dê; srah nting sa loan chi ƀal mơ chi ôlibe bol mê dê, mơya bol mê kung ò rê wơl mơ Añ.” Yàng Jehôwa đơs behơ̆.

¹⁰ “Añ neh sồr pluh plàng tus digùl bol mê kung be Añ neh lơh tòm Ejiptơ. Añ tơnchơt ală cau klau pơnu bol mê dê mơ đào; Añ neh kup cèng ală ơseh bol mê dê. Añ neh lơh ƀô ồm bơh tòm sàl bol mê dê gơmut tòm trồm muh bol mê dê, bulah behơ̆ bol mê kung ò rê wơl mơ Añ,” Yàng Jehôwa đơs behơ̆.

¹¹ “Añ neh tuh tơlup cau ƀà tòm bol mê, kung be Añ neh tuh tơlup Sôdôm mơ Gômôrơ. Bol mê kung be dô nơm ntê chi neh cau sơmbat tơlik bơh di ồs, bulah behơ̆ bol mê kung ò rê wơl mơ Añ.” Yàng Jehôwa đơs behơ̆.

¹² “Ơ Israel, do la bơta Añ rơp lơh dimơ bol mê; tài bơh Añ rơp lơh bơta do di bol mê, gen tàng rcang tĕ nàng tìp Yàng Tom Trồ bol mê dê, ơ Israel!”

¹³ Kơnràñ la Bơtau neh lơh gơs ală mơnơm, neh crơng gơs càl mơ yal tơlik bơta kơlôi sơnơng Kơnràñ dê kòn mơnus in, la Bơtau neh lơh àng drim gơlik klam jơngo, mơ cơnđòa lòt hơđang ală tiah jòng ù dê; Jehôwa Yàng Tom Trồ Gơnap Gơnoar Dờng Làm Jơh la sơnđan Kơnràñ.