Amôs 2 - Sră Goh 2018

Jơnau gơnoar hwơr bơh bơta lơh glài Môap

¹ Yàng Jehôwa đơs be do: “Bơh tồi glài Môap dê, oă rlau mơ pe, poan dơ̆, Añ rơp ò jùt sang bơta lơh glài gơ dê. Tài bơh khai neh chu ală ntìng ƀồc bơtau Edôm dê gơlik gơs cùr.

² Añ rơp sồr ồs tus hơđang Môap, mơ gơ rơp chu pơrguc ală gơlang kơ̆ cê Keriôt dê. Môap rơp chơt digùl bơta nggồr nggàc, digùl ală jơnau hòi driau mơ ntas kơlwòk.

³ Añ rơp tơnroh kwang at bồ khai dê, mơ tơnchơt jơh ală kwang gơ dê bal mơ khai,” Yàng Jehôwa đơs behơ̆.

Bơta cahrña hơđang Juda

⁴ Yàng Jehôwa đơs be do: “Bơh tồi glài Juda dê, oă rlau mơ pe, poan dơ̆. Añ rơp ò jùt sang bơta lơh glài gơ dê. Tài bơh bol khai neh sang lòi bơta boh lam Yàng Jehôwa dê, mơ ò prap gàr ală bơta sồr lam Kơnràñ dê; tài bơh bol khai gơkòl tề lam tìs nrah bơh ală bơta ma blac, jat ală gùng mơ ală ồng pàng bol khai dê neh lòt.

⁵ Añ rơp sồr ồs tus hơđang Juda, gơ rơp chu pơrguc ală hìu gơlang kơ̆ cê Jerusalem dê.”

Bơta cahrña lơh glài Israel

⁶ Yàng Jehôwa đơs be do: “Bơh tồi glài Israel dê, oă rlau mơ pe, poan dơ̆. Añ ò jùt sang bơta lơh glài bơh gơ, tài bơh bol khai tac cau song ring nàng ai priă, tac cau rƀah nàng ai dô yô gơltau jă.

⁷ Bol khai jă jơng hơđang bồ cau rƀah lơòi tus di thul tòm ù, mơ chồl tơlo cau gơkòl jê sồt bơh di gùng song ring. Bèp mơ kòn bic mơ mìng dô nă cau ơruh, behơ̆ gen sơnđan sàng goh Añ jê neh gơkòl đơs tràl sơrbil.

⁸ Bol khai bic di gah kòp nơm cơnòng duh khoai, hơđang ală ồi ào neh ai lơh gơs phan ai bồ. Tòm hìu ală yàng bol khai dê bol khai ñô alak ală cau kup lơh glài.

⁹ Añ neh tơnroh cau Amôrit di đap bol khai, bulah khai jơnhoa be ală chi nho rề, mơ pràn kơldang be ală tòm cha. Añ neh tơnroh ală plai khai dê hơđang mơ ală ryas hơđơm khai dê.

¹⁰ Añ neh cèng bol mê lik bơh di lơgar Ejiptơ, mơ tề lam bol mê poan jơt nam tòm ƀlàng bràs nàng bol mê in ai lơgar cau Amôrit dê lơh gơs sre brê.

¹¹ Añ kung neh tơngguh ală kòn sau bol mê dê gơlik gơs ală cau gơnoar hwơr, mơ ală cau pơnu bol mê dê gơlik gơs cau Nasire. Ò di ngan behơ̆ ò ơ, ơ làng bol Israel?” Yàng Jehôwa đơs behơ̆.

¹² “Mơya bol mê lơh ală cau Nasire in ñô tơrnòm, mơ ai jơnau sồr ală cau gơnoar hwơr lah: ‘Bol mê bañ đơs hwơr.’

¹³ Behơ̆, Añ rơp jă tơnlề bol mê tòm tiah bol mê, kung be dô nơm rơndeh jă tơnlề tòm tŭ gơ pơdiang kòi.

¹⁴ Cau ntoat dô roh rui bơh bơta sơrbac sơrbang, cau pràn kơldang rơp ò prap bơta pràn he dê, mơ cau gơnoar pràn rơp ò dong klàs bơta kis bol khai dê.

¹⁵ Cau pañ àtak rơp ò jai ntào, cau ntoat mhar mơ jơng rơp ò geh dong klàs să tòm bol khai dê, hala cau hào ơseh kung rơp ò rgơi dong klàs bơta kis bol khai dê;

¹⁶ Mơ ală cau kơ̆ nùs digùl ală cau pràn kơldang rơp ntoat dô să kuh tòm ngai hơ̆,” Yàng Jehôwa đơs behơ̆.