Amôs 1 - Sră Goh 2018

Bơta cahrña Yàng Tom Trồ dê gơwèt mơ Israel mơ ală lơgar gùt dar ( 1:1 – 2:16 ) Bơta cahrña hơđang jơi bơtiàn Israel dê

¹ Do la ală jơnau Amôs dê, la dô nă tòm ală cau ê belàt tòm Tekôa, bơta khai gŏ gơwèt hơ Israel, tòm tŭ Ujia la bơtau at bồ Juda, mơ Jerôbôam, kòn klau Jôas, la bơtau at bồ Israel, bàr nam lài mơ tŭ lơnggơr ù.

² Khai đơs lah: “Yàng Jehôwa ơluh bơh di Siôn. Kơnràñ lơh nggồr ntas bơh Jerusalem. Ală ƀlàng ñhơt cau ê belàt dê rơp ro rañ, bồ mơnơm Karmel rơp ñòp ro.”

Bơta cahrña hơđang ală lơgar ơm rềp mơ Israel

³ Yàng Jehôwa đơs be do: “Bơh tồi glài Damas dê, oă rlau mơ pe, poan dơ̆, Añ rơp ò jùt sang bơta lơh glài Añ jê, tài bơh bol khai neh pơrjòt Galaat mơ gai lòs pơrjòt kòi.

⁴ Behơ̆ Añ rơp sồr ồs tus hơđang hìu Hajael, mơ gơ rơp sa loan ală ƀòn dờng kơ̆ cê Benhadat dê.

⁵ Añ rơp dơrkă kai mpồng dờng Damas dê; mơ tơnroh ală cau ơm tòm thòng Aben, bal mơ cau at gai gơnoar at bồ tòm Bet Eden. Làng bol Aram rơp kong kup cèng gơs dĭ tòm Kir.” Yàng Jehôwa đơs behơ̆.

⁶ Yàng Jehôwa đơs be do: “Bơh tồi glài Gaja dê, oă rlau mơ pe, poan dơ̆ Añ rơp ò jùt sang bơta lơh glài Añ jê. Tài bơh bol khai neh kup cèng lơh dĭ jơh ală mpồl làng bol, mơ tac bol khai cau Edôm in.

⁷ Añ rơp sồr ồs tus hơđang ală dơrñang ƀòn Gaja dê, gơ rơp sa loan jơh ală gơlang kơ̆ cê gơ dê.

⁸ Añ rơp tơnroh ală cau ơm tòm Asdot mơ cau at gai gơnoar at bồ tòm Askalôn. Añ rơp tơrwơl tê tòmdră mơ Ekrôn, jơl tus di tŭ cau Philistin gam tơngkah wơl rơp gơkòl roh rui,” Yàng Jehôwa đơs behơ̆.

⁹ Yàng Jehôwa đơs be do: “Bơh tồi glài Tirơ dê, oă rlau mơ pe, poan dơ̆, Añ rơp ò jùt sang bơta lơh glài Añ jê. Tài bơh bol khai neh jào phi jơh mpồl làng bol cau Edôm in, mơ ò gam kah bơh bơta ho bal lơh gơs oh mi.

¹⁰ Añ rơp sồr ồs tus hơđang ală dơrñang ƀòn Tirơ, ồs hơ̆ rơp chu pơrguc jơh ală gơlang kơ̆ cê gơ dê.”

¹¹ Yàng Jehôwa đơs be do: “Bơh tồi glài Edôm dê, oă rlau mơ pe, poan dơ̆, Añ rơp ò jùt sang bơta lơh glài Añ jê, tài bơh khai neh ting jat oh mi he mơ đào, sang lòi jơh ală bơta kòñ nđàc, khai prap lòi bơta gơjrañ sùm sùm, mơ prap gàr bơta gơjrañ kơuềng khai dê ò jơh.

¹² Añ rơp sồr ồs tus hơđang Theman, gơ rơp chu pơrguc jơh ală gơlang kơ̆ cê Bôjra dê.”

¹³ Yàng Jehôwa đơs be do: “Bơh tồi glài Ammôn dê, oă rlau mơ pe poan dơ̆. Añ rơp ò jùt sang bơta lơh glài Añ jê. Tài bơh khai neh reh kơndul ală cau ùr bun tòm Galaat, nàng pò ơnàng nhàr ù tiah khai dê.

¹⁴ Behơ̆ Añ rơp sing ồs chu ală dơrñang ƀòn Rapbah, ồs hơ̆ rơp sa loan jơh ală gơlang kơ̆ cê gơ dê bal mơ ală jơnau hòi driau tòm ngai tòmlơh, bal mơ càl pràn tòm ngai càl rbut dờng.

¹⁵ Gen bơtau bol khai dê rơp kong kup cèng hơ lơgar ngài, khai bal mơ ală cau kwang duh broă khai dê,” Yàng Jehôwa đơs behơ̆.