UPIBAN 9 - KARÚK-PËRIM KAWALU Nouveau Testament

Uluur uñanatsan

¹ A uwaanju uñanatsan futs uluur, din a n win upesaj un pëni wi batsi ee yër tsi utsia; kanigësaani baar-tsëko-unoor awëla wul.

² A u waants baar-tsëko-unoor, a uru pëni di bul, anaam unk uru ufurnu uwiak. A uru un pëni wi di baar rëmëntsan unu ni ufuts.

³ A ngë njarabuts pëni tsi uru a nga jëk utsia. A nga wëla pëyëlan, pi pëyëlan pi ngëtiifar umundu ka pi.

⁴ A nga jaka, pëtsats pëñuaw pan ci pi tsi umundu, ngul tsë ro pul kacok, nin ko un ci wi pi pëtsats-pëñuaw, nin bëlon bëko, maa bañaan ban kaats biki umarëka Nasien-batsi tsi ijúk bukul.

⁵ Ngul, wëlaatsa pëfiŋ bukul, maa pëtsu bukul tsi unoor-uwiak te këlí kañan. Unoor-uwiak wi ngu tsu wi, aci pi unoor ñaan ni utiifar tapi.

⁶ tsi ngënu ngëmënts, bañaan ka ci tsi pëtsas pëcäts, maa bu ri ka win pul. Bu ka rí pëcäts, maa pëcäts ka túk bukul.

⁷ Ngë n jarabats ngëmënts ngun anaam unk ngëmpëlënc yecisa ngun pa ukam. Ko ci wi tsi iyeen ngul, anaam unk ngëcape-pësien, nga leempëna ngi uwëru. Ngërostu ngul anaam unk ngërostu bañaan-bajin.

⁸ Ngul, a tsij uweel pi uweel ŋaats, a irumaj ngul ci pi irumaj ulioŋ.

⁹ Ngul a tsij ikundi-bëjinc pi ikundi-bëjinc i leempëna yi ifeeru. A ibaakëla ngul kë leents pi uleentsar isaret ngëmpëlënc ngëcumal, ngi kan tukar ngi ukam.

¹⁰ Ngul, a tsij itant pi ngëtiifar, a itant tsij itap. Pëyëlan ngul aciina tsi itant ngul, pa përo bañaan ujuatsal te këlí kañan.

¹¹ Ngul, un ci wi usien ngul, aci uwaanju baar-tsëko-unoor; katim wul tsi Uyebëreu aci Abadon, a tsi ugërek aci Apolion.

¹² A unjuatsia ucak par; teenan-e! Ngëlon ngënjuatsia ngëtëb ka baandi, uba ngëko ngëmënts ngi.

¹³ A uwaanju upaajantsan futs uluur, din a n te përim pëni di ngëguats ngëbaakër, ngi bëgij, bul ba leempëna bi uwëru, a ba ci tsi bërun Nasien-batsi;

¹⁴ a përim pëmënts ja uwaanju upaajantsan un tsij wunk uluur: “Pacan ngëwaanju ngëbaakër ngan tana ngunk di kabulaŋ Ëfërates, kawiak.”

¹⁵ A ngëwaanju ngëbaakër ngëmënts pacaa, ngul ngan yecisa ngi pa uler umënts, ni unu umënts, ni pëli pëmënts, ni uwaanu umënts; tsi itawar iwaaants yun yi bañaan, ngë fiŋ kaloole.

¹⁶ Batukand ngëmpëlënc a bu kë kamanaand, bë ci ngëmiil ngëntaaja ngëtëb te ngëyaas ngëmiil untaaja. Man te bi ba ci bank.

¹⁷ Unk tsi buwinal, a n win ngëmpëlënc ni ban dija biki ngul; bë tana tsi ijinc bukul ikundi-ijinc ijankal pi bërua, ifëlal, ibetsëleel pi ucof. Iyeen ngëmpëlënc anaam unk iyeen ngëlioŋ, a bërua ni uru ni ucof kë pëni di itum ngul.

¹⁸ Ngënjuatsia ngëwaants ngëmënts ngi, bërua ni uru ni ucof, ka pëni di itum ngul; tsi itawar iwaants yun yi bañaan, ngë fiŋ kaloole.

¹⁹ Par, pëyëlan pi ngëmpëlënc ka pi aciina di itum ngul ni di itant ngul, itant ngul anaam unk ngëko-pëtsats, aka iyeen a yuu roona iyeen imënts yun kawaraatsa.

²⁰ Bañaan banduka bukunk, biki ngënjuatsia ngëmënts ngun fiŋats biki, bë yaarats ibats tsi ngi iñan bukul kë ro ngi; bu wëtaants pëjintëla ngëcaay, ni icap i leempëna yi uwëru, i leempëna yi uncaam-utsak, i leempëna yi mtsak-mjankal, i leempëna yi ilaak, i leempëna yi pëmul, te di ka win, di ka te, di ka yandaar.

²¹ Bu wëtaants ngëko bukul ngi kafiŋ-bañaan, nin ngëko bukul ngi maleempandar, nin ngëko bukul ngi katúk-ufuts, nin ngëko bukul ngi kakiej.