UPIBAN 8 - KARÚK-PËRIM KAWALU Nouveau Testament

Unuek upaajantsan ni ulon apënanaa

¹ Uwal wi Ubuk-unkaanel wun pënan wi unuek upaajantsan ni ulon, a kaats ko un tea wi di batsi, aa pëcuaf uler wokan.

² A n win ngëwaanju paaj ngun ni ulon, nats tsi bërun Nasien-batsi. Ngul, awëla ngëlúur paaj ni ulon.

³ A uwaanju ucints bi ee nats tsi bëgij, a u tsij katsuuni ucuraay, ki uwëru. Wul, awëla ucuraay arëmbana; ka bofëlan dul ni bëñaan bayëman bëlieng, u wël ngul tsi bëgij ba leempëna bunk uwëru, a ba ci tsi bërun pëtsoari-pësien.

⁴ A uru ucuraay pën tsi kañan uwaanju umënts wun apaya ni bëñaan bayëman, te di bërun Nasien-batsi.

⁵ A uwaanju jej katsuuni ucuraay, a u cuman kul bërua bëgij, a u gutsar kul utsia; din a u ruka ci impalambamb, ni irim, ni ilikajan, ni usiintsar utsia.

Ngëluur unoor

⁶ A ngëwaanju paaj ngun ni ulon, ngan tsij ngi ngëluur paaj ngun ni ulon, yecis pëfuts ngul.

⁷ A uwaanju ucak futs uluur, din a isa-ngëlaas ni bërua bofëlar ni pëñaak a nga yëri tsi utsia. A tsi itawar iwaants yun yi utsia, kaloole tëraa; a tsi itawar iwaants yun yi mko, kaloole tëraa; a pëtsats pëñuaw bëlieng tëraa.

⁸ A uwaanju utëbantsan futs uluur, din a ko naam unk untunda uwiak mob wun bërua a u gutsaa di bërëk. A tsi itawar iwaants yun yi bërëk, kaloole ruka ci pëñaak.

⁹ A tsi itawar iwaants yun yi ngëko nga leempa ngi, a nga ci di bërëk, a nguu yafënts, kaloole cats; a tsi itawar iwaants yun yi itsian, kaloole cokaa.

¹⁰ A uwaanju uwaajantsan futs uluur, din a upesaj uwiak, wi ka yëk wi pi untuund-bërua, pëni di batsi ayëri tsi katawar kaloole tsi itawar iwaants yun yi ibulaŋ, a u yërand tsi ngëkëpës mlik.

¹¹ Katim upesaj umënts wun ka jaka Abusintu; a tsi itawar iwaants yun yi mlik, kaloole ruka ci abusintu, a bañaan bacumal cäts undo mlik mmënts mun, par aruka ci mpíiral.

¹² A uwaanju ubaakëndan futs uluur, din tsi itawar iwaants yun yi unu, kaloole koba, ni kaloole tsi itawar iwaants yun yi pëli, ni kaloole tsi itawar iwaants yun yi ngëpesaj, pa kaloole tsi itawar iwaants ngul yun ka ruka rëmënts. A katawar kaloole tsi iwaants yun yi pënak wamandats ufac, ni buts katawar kaloole tsi iwaants yun yi bërëm.

¹³ Din a n teen, a n te uwabankank kë yits di pëcuaf batsi, a u kat përim koo ja: “Cay! Cay! Cay ban ciina biki utsia, undo uleentsar ngëluur ngan duka ngunk, ngi ngëwaanju ngëwaants ngun wama ngi ka pëfuts!”