UPIBAN 7 - KARÚK-PËRIM KAWALU Nouveau Testament

Bañaan ngëmiil useent ni ngëmiil ngëntaaja ngëbaakër ni ngëmiil ngëbaakër (144.000) ban pënë-ni biki tsi këbuka Israel

¹ A umënts wun par, a n win ngëwaanju ngëbaakër nga nats ngi tsi ijara ibaakër yun, yi umundu; a nga laaŋ ngëfuts ngëbaakër ngun, ngi umundu, pa nin ufuts tsë futs tsi utsia, nin di bërëk, nin tsi bëko ban ci bi ba këci.

² A n win uwaanju ucints, apëni apayee bi kajara umay-unu, a tsij untamp Nasien-batsi nayësal. A u kat përim mak aliar ngëwaanju ngëbaakër nga wëla ngunk pëtsënkan pëcok utsia, ni bërëk;

³ aliar ngul aja: “Ind tsë cok nin utsia, nin bërëk, nin mko, te nja ka tsënkëna ka tsu umarëka-tampoŋ tsi ijúk baleemp Nasien-batsi nja.”

⁴ Din a n te bi upinara ban tsua biki umarëka ci bi: bë ci ngëmiil useent ni ngëmiil ngëntaaja ngëbaakër ni ngëmiil ngëbaakër (144.000), ban tsua biki umarëka-utamp; bu pënë-ni kara pëbuka babuk Israel bayënts:

⁵ Bapënë-ni pëbuka Juda, bë ci ngëmiil untaaja ni ngëmiil ngëtëb (12.000), ban tsua biki umarëka-tampoŋ; bapënë-ni pëbuka Ruben, bë ci ngëmiil untaaja ni ngëmiil ngëtëb (12.000); bapënë-ni pëbuka Gad, bë ci ngëmiil untaaja ni ngëmiil ngëtëb (12.000);

⁶ bapënë-ni pëbuka Aseer, bë ci ngëmiil untaaja ni ngëmiil ngëtëb (12.000); bapënë-ni pëbuka Neftali, bë ci ngëmiil untaaja ni ngëmiil ngëtëb (12.000); bapënë-ni pëbuka Manase, bë ci ngëmiil untaaja ni ngëmiil ngëtëb (12.000);

⁷ bapënë-ni pëbuka Simeon, bë ci ngëmiil untaaja ni ngëmiil ngëtëb (12.000); bapënë-ni pëbuka Lewi, bë ci ngëmiil untaaja ni ngëmiil ngëtëb (12.000); bapënë-ni pëbuka Isakar, bë ci ngëmiil untaaja ni ngëmiil ngëtëb (12.000);

⁸ bapënë-ni pëbuka Sabëlon, bë ci ngëmiil untaaja ni ngëmiil ngëtëb (12.000); bapënë-ni pëbuka Juse, bë ci ngëmiil untaaja ni ngëmiil ngëtëb (12.000); a bapënë-ni pëbuka Be n jamin, ci ngëmiil untaaja ni ngëmiil ngëtëb (12.000), ban tsua biki umarëka-tampoŋ.

Ngëriisia aci kandënd bañaan ban data biki

⁹ A ngëmënts ngun par, din a n win: aci kandënd bañaan kawiak mak; ñaan yëlaants pëpin bukul. Bë pënë-ni ngëcaak bëlieng, ni këbuka bëlieng, ni bañaan bëlieng, ni ngëlíingu bëlieng; bu nats tsi bërun pëtsoari-pësien ni tsi bërun Ubuk-unkaanel wun. Bë tiema iŋi iyampal ifaacal, a ba tsij ikënd tsi iñan bukul.

¹⁰ A bu kë lie mak koo ja: “Pëbuer aci pi Nasien-batsi nja nul kantsoar tsi pëtsoari-pësien, a pa ciind pi Ubuk-unkaanel.”

¹¹ A ngëwaanju bëlieng nats afay pëtsoari-pësien, afayand bajëŋal bukun ni ngëko ngëyësal ngëbaakër ngun. tsi bërun pëtsoari-pësien, nga yër alëm ngërostu, a nga jintëla Nasien-batsi,

¹² a nguu ja: “Ameen! Ubëndan, ni përëmb, ni kameko, ni pëbaran, ni rëmbana, ni pëyëlan, ni uyëlan, aci pa Nasien-batsi wund, pa sandëndën! Ameen!”

¹³ A nalon tsi bajëŋal bukun jipanaanin, aja: “Ban tiema bikink iŋi iyampal ifaacal, bë ci bokoom, a ba pëni tsum?”

¹⁴ A n yankul a n ja: “Nawiak nji! Wi m me.” A na jain: “Bamënts biki aci ban pëni biki di unoor uwiak. Bë nijëna iŋi bukul yi bëtiema ba faacanaan yul tsi pëñaak Ubuk-unkaanel wun.

¹⁵ Wul ka wun ba ci tsi bërun pëtsoari Nasien-batsi pi pësien, a bu kë leemparul, pënak ni bërëm, di katoul kayëman. Nan tsoar unk tsi pëtsoari-pësien ka kundëna bukul ulimëntsul.

¹⁶ Bë katse ka bonats, bu katse ka lofënts. Nin unu, nin uyëki un ciwi-ba këci, di ka tër bukul.

¹⁷ Par Ubuk-unkaanel wun, wul un ci wi tsi pëcuaf pëtsoari-pësien, koo yafan bukul, uu tsëpand bukul tsi ngëkëpës mlik ubiira. Din Nasien-batsi ka faa mŋand bëlieng tsi këkës bukul.”