UPIBAN 6 - KARÚK-PËRIM KAWALU Nouveau Testament

Ngënuek gëcak, paaj ngun, apënanaa

¹ A n win uwal wi Ubuk-unkaanel wun pënan wi ulon tsi ngënuek paaj ngun ni ulon; din a n te ulon tsi ngëko ngëyësal ngëbaakër ngu n ja përim pi kampalambamb: “Bili!”

² Din a n win u ci umpëlënc ufaacal, nan dijee wul a tsij kaŋaaja. Awëla ucape-pësien, a na tsëp, nul nakuk, pii kuk.

³ Uwal wi Ubuk-unkaanel wun pënan wi unuek utëbantsan, a n te uko uyësal utëbantsa n ja: “Bili!”

⁴ Din a umpëlënc ucints pëni, ajank pi bërua. Nan dijee wul awëla pëyëlan pëpënan pëfac tsi umundu, bañaan puu fiŋëlar; a na wëla ulaac uwiak.

⁵ Uwal wi Ubuk-unkaanel wun pënan wi unuek uwaajantsan, a n te uko uyësal uwaajantsa n ja: “Bili!” A n win umpëlënc ujinal, nan dijee wul a tsij tsi kañanul upeesaaraani.

⁶ Din a u naam unk përim pi n te pun tsi pëncuaf ngëko ngëyësal ngëbaakër ngun; aja: “Unkilu uloole wi bëmaaj aciir dinaariu dëloole, a ngënkilu ngëwaants ngi ucimp ciir dinaariu dëloole; maa tsë cok mkër, tsë cok pëwat.”

⁷ Uwal wi Ubuk-unkaanel wun pënan wi unuek ubaakëndan, a n te uko uyësal ubaakënda n ja: “Bili!”

⁸ Din a n win umpëlënc u naam wi ubetsëleel; nan dijee wul, katimul ka jaka Pëcäts, a mcats runanul. A pëcäts ni mcats wëla pëyëlan tsi kafa kabaakëndan ki umundu, pa pëfiŋëna bañaan ulaac, ni ubon, ni kayëra-bucats, ni pëfiŋëna bukul ngë n jar umundu.

⁹ Uwal wi Ubuk-unkaanel wun pënan wi unuek uñanatsan, a tsi utsia bëgij, a n win ngëwaas ban do biki fiŋaa, undo përim Nasien-batsi, ni undo ko wi ba maatir wi a ba mob tsi pëleents wul.

¹⁰ A ba kat përim mak koo ja: “Wi, Nawiak na yëmani a m ciind nacӓr! Kë lip aa lum i, kii rura wat pëleents, kë lukandar wund pëkaw, bi bañaan umundu fiŋ wund bi?”

¹¹ Din, a ba wëla kara nan ci kaŋí-bëtiem kafaacal, kayampal. A ba jaka ba wamaan naakësa ko uties, aa bacints bukul baleemp ka tsënkëna ka bai bi ba ci bi, bukul ban tsaar biki ni bukul, a ba ruka yecisa pëfiŋaa buts pi bukul.

¹² Uwal wi Ubuk-unkaanel wun pënan wi unuek upaajantsan, din a utsia siintsar mak, a unu witsa ujinal pi usaaku u leempëna wi ifaal un jar, a pëli bëlieng ruka naam unk pëñaak;

¹³ a ngëpesaj batsi yëri tsi utsia, pi bëfíigu bi ukëk siints bun a ba wati mbuk bul mwampac.

¹⁴ A batsi cuatar pi ulibëru ci wun tsi pëbuatsar pi ka n jand; ngëntunda bëlieng ni ngënjiu pënanaa tsi tsëko ngul.

¹⁵ A basien umundu, ni bañaan ban tsua biki bawiak, ni bawiak basondaari, ni barëmb, ni baka-pëyëlan, baluek bëlieng ni bafacal, bu bekar di iyar tsëko ilaak, ni ngëlaak ngëntunda.

¹⁶ A bu kë ja ngëntunda, ni ngëlaak: “Nda yelaan yëri tsi ruets wund, ndë bek wund nda lawan këkës kantsoar tsi pëtsoari-pësien, ni pëlawan wund uriab Ubuk-unkaanel.

¹⁷ Par unu uwiak, wi uriab bukul, abaandi! A yën ka yëlan un pëliincandër?”