UPIBAN 5 - KARÚK-PËRIM KAWALU Nouveau Testament

Ubuk-unkaanel ni Ulibëru

¹ Din a n win ulibëru, tsi kariir nan tsoar unk tsi pëtsoari-pësien; wul apicana di bametsu ni tsi utsand wul, a u nuekana ngënuek paaj ni ulon.

² A n win uwaanju, un ka wi pëyëlan; akat përim a uu ja: “Yën tsënkan un pëjaa awaants ulibëru a na pënan ngënuek?”

³ Maa nin di batsi, nin tsi utsia, nin di bametsu utsia, kaats nan yëlani pëwaants ulibëru umënts wun, nin pëkaŋan ngëre-këkës tsi wul.

⁴ A n ci tsi irug mak, par kaats na winee na tsënkan pëjaa awaants ulibëru umënts wun, oo akaŋan ngëre-këkës tsi wul.

⁵ Din, a nalon tsi bajëŋal bukun jain: “Cats rug. Teenan-e! Ulioŋ pëbuka Juda, nul nan ci kabuul Dawid, akuk; ayëlan pëwaants ulibëru umënts wun, në pënan ngënuek wul paaj ngun ni ulon.”

⁶ tsi pëcuaf pëtsoari-pësien pun ni ngëko ngëyësal ngëbaakër ngun, ni tsi pëncuaf bajëŋal bukun, a n win Ubuk-unkaanel nats, anaam aro jakana. Atsij këntin paaj ni pëlon, ni këkës paaj ni pëlon, un ci wi Ngëwejats paaj ngun ni ulon, ngi Nasien-batsi, nga yëlee ngi tsi umundu bëlieng.

⁷ A u bi ee jej ulibëru tsi kariir nan tsoar unk tsi pëtsoari-pësien.

⁸ Uwal wi u jej wi ulibëru umënts wun, a ngëko ngëyësal ngëbaakër ngun, ni bajëŋal ngëntaaja ngëtëb bukun ni babaakër jintëla tsi bërun Ubuk-unkaanel wun. Kara un ci wi ni kara nan ci a tsij buncuundu, ni iraani i leempëna yi uwëru a i cum curay, un ci wi bëñaan bayëman.

⁹ A ngul ni bukul kë ya kaya kawalu, koo ja: “M tsënkan pëjaa m jej ulibëru umënts wun kë pënan ngënuek wul, par m do jakanaa; ni pëñaaku a m weelësi bañaan pa Nasien-batsi, ban pënë-ni biki kara pëbuka, ni kara uliingu, ni kara bañaan-ucaak, ni kara ucaak.

¹⁰ M tsu bukul a ba ci pësien, ni bajakan, pa puu leempar Nasien-batsi wund, bu ka sien tsi umundu.”

¹¹ Din a n teen, a n te përim ngëwaanju ngëcumal, aci ngëmiilion useent te ngëyaas ngëmiilion useent, ni ngëmiil ngëmiil, a nga fay pëtsoari-pësien ajëkëlan, ni ngëko ngëyësal ngëbaakër ngun, ni bajëŋal bukun.

¹² A nga kat përim a nguu ja: “Ubuk-unkaanel un do wunk jakanaa, atsënkan pëjaa ayank pëyëlan, ni bëka, ni kameko, ni uyëlan, ni rëmbana, ni përëmb, ni ubëndan.”

¹³ A ko u leempa wi ba këleempa a u ci di batsi, ni tsi utsia, ni bametsu utsia, ni bërëk, ni ngan ci ngi bëlieng tsi ngul, man te nguu ja: “Ubëndan, ni rëmbana, ni përëmb, ni pëtsijëna ko, aci pa nan tsoar unk tsi pëtsoari-pësien, ni pa Ubuk-unkaanel wun, pa sandëndën!”

¹⁴ A ngëko ngëyësal ngëbaakër ngun kë ja: “Ameen!” A bajëŋal bukun yër, a ba jintëla kanci-nayësal.