UPIBAN 4 - KARÚK-PËRIM KAWALU Nouveau Testament

Ubëndan di batsi

¹ A ngëmënts ngun par, a n win pëlëman waantsa di batsi; a përim pëcak pi ndo punk n te pa ñakanaanin pi uluur, ja: “Payee tsi, mán pibanu ngan ka ngi pëbaandi tsi ufets ngëmënts ngun.”

² Ucar umënts wun a n ci tsi uwejats. Pëtsoari-pësien tsua di batsi, a u ka nan tsoari tsi pul.

³ Kantsoar anaam unk bënaam pëlaak pan ka pi bëkat, pi kanjaka punk jaspi, ni bënaam pëlaak pi kanjaka punk saardiu. A pëfaal karëm-batsi fay pëtsoari-pësien, anaam unk bënaam pëlaak pan ka pi bëkat, pi kanjaka punk esmeralda.

⁴ A u ka itsoari-pësien in fay yi pëtsoari-pësien pun, aci ngëntaaja ngëtëb ni këbaakër. A bajëŋal tsoar tsi itsoari-pësien imënts yun, bë ci ngëntaaja ngëtëb ni babaakër, bu tiema iŋi ifaacal, a tsi iyeen bukul a ba tsij ngëcape-pësien ngan leempëna ngi uwëru.

⁵ A ilikajan, ni irim, ni impalambamb, kë pëni di pëtsoari-pësien. A ngëlamp paaj ni ulon kë tab bërua tsi bërun pëtsoari-pësien; ngul ci ngun Ngëwejats paaj ngun ni ulon, ngi Nasien-batsi.

⁶ tsi bërun pëtsoari-pësien, a u naam unk pi kabiirdi a ka jënts cës pi ikasa mlik. A ngëko ngëyësal ngëbaakër ngun, ci tsi pëncuaf pëtsoari-pësien, a nga fayand pul ajëkëlan. Ngul, acum ni këkës tsi bërun ni tsi ufets.

⁷ Uko uyësal ucak wun anaam unk ulioŋ, a utëbantsan naam unk ubay-ukas, a uwaajantsan tsij urostu pi wi ñaan-najin, a ubaakëndan naam unk uwabankank ci wun tsi pëyits.

⁸ Ngëko ngëyësal ngëbaakër ngun, aja un ci wi, u tsij ibaakëla paaj. A nga cum ni këkës afay ngul ni di bametsu ngul. Ngul, pënak ni bërëm, di ka wëtan puu ja: “Nayëman, nayëman, nayëman, Ajug, nul Nasien-batsi Kayëlan-bëlieng, nandoi ci, a na ci, a nuu bi!”

⁹ Aja ngëko ngëyësal ngëbaakër ngun kë rëmban kantsoar tsi pëtsoari-pësien, a ngu wëlul rëmbana, a ngu baranul, nul nayësal pa sandëndën,

¹⁰ din bajëŋal ngëntaaja ngëtëb bukun ni babaakër ka yër tsi bërun nan tsoar unk tsi pëtsoari-pësien, bu ka jintëla Nanci-nayësal pa sandëndën, din bu ka guts ngëcape bukul ngi pësien, tsi bërun pëtsoari-pësien, bu kë ja:

¹¹ “Ajug, wi Nasien-batsi wund! M tsënkan përëmbanaa, ni përispitaara, ni pëka pëyëlan, par wi leemp un ngëko bëlieng; undo uŋalu ka wun nga ci, a nga leempaa.”