UPIBAN 3 - KARÚK-PËRIM KAWALU Nouveau Testament

Uletar pa Ngëriisia ngan ci ngunk di Sardis

¹ Picari uwaanju Ngëriisia ngan ci ngunk di Sardis, ja: “Kantsij ngëwejats paaj ngun ni ulon, ngi Nasien-batsi, ni ngëpesaj paaj ngun ni ulon, pi ci pun pi na ja pi: ‘Ma me ngi m ja ngi m doon kuu ro: M jaka m ka ubiira, maa m cats!

² Katan ibats! Liinc-liincani nganduka ngunk a nga wokan pëcäts, par nji winats ngi kë ro ngi ba pëci ngëwar tsi bërun Nasien-batsi nji.

³ Lesan bi m jukana bi m ja, ni bi m te bi m ja; moban tsul, yaari ibats. Maa uci m katats ibats, din ka bi pi nakiej, te m di kë me koon këme uler wi ndu n bi wi tsi wi.

⁴ Maa m ka bañaan ko uties di Sardis, ban tsopanats biki iŋi bukul yi bëtiem. Bu ka tiema iŋi ifaacal, bu kë yandaar ni nji, par bu tsënkan përo ank.

⁵ Unk, nakuk ka tiema iŋi ifaacal. In di ka n pënan katimul yaas di ulibëru ubiira; mándu katimul tsi bërun Asin nji, ni tsi bërun ngëwaanjuul.

⁶ Nan kai kabats, na tean ko wi Uwejats ci wi tsi pëja iriisia.’”

Uletar pa Ngëriisia ngan ci ngunk di Filadeelëfia

⁷ Picari uwaanju Ngëriisia ngan ci ngunk di Filadeelëfia, ja: “Kanci-nayëman, Kanci-nacӓr, nul kantsijëna kanigësaani Dawid, nawaants te ñaan di ka ric, naric te ñaan di ka waants, pi ci pun pi na ja pi:

⁸ ‘Ma me ngi m ja ngi m doon kuu ro. Teenan-e! Man tsu tsi bërunu pëlëman pa waantsa pi, pi ñaan yëlaants pi përíc. Ma me m tienkëts pëyëlan, maa m mob tsi përim nji a m wëtaants katim nji.

⁹ Teenan-e! Mán wëlu balon bañaan, biki kato-kajúki Useetaani, bukul ban ja biki bërier bukul bë ci Bajudeu te bë cits, par bu tsup. Nji ka n tsu ink bukul ba bi, bu ka lëm ngërostu tsi bërun itsiimu, din bu ka me n ŋalu.

¹⁰ Undo m mob tsi përim umiira nji, nji buts mán dandanu uler wi pëteenamana kë baandë-ni wi umundu upëban, pa pëteenaman ban ciina biki umundu.

¹¹ Mán baandi tsi ko un car wi. Moban liincan ko wi m ka wi, pa ñaan tsë yankënu ucapeu wi pësien.

¹² Nakuk, mán tsuul na ci pëcap di kato-kayëman Nasien-batsi nji; katse ka pëndul yaas. Mán pican tsi nul katim Nasien-batsi nji, ni katim përaasa Nasien-batsi nji, un ci wi Jerusalem dëwalu di kan pëni ri di batsi, tsi Nasien-batsi, du welee; mán picanaand tsi nul katim nji kawalu.

¹³ Nan kai kabats, na tean ko wi Uwejats ci wi tsi pëja iriisia.’”

Uletar pa Ngëriisia ngan ci ngunk di Laodiseeya

¹⁴ Picari uwaanju Ngëriisia ngan ci ngunk di Laodiseeya, ja: “Kanci-ameen, nul Namaatir na mobi tsi uwak a na ciind nacӓr, nul nan ci nawiak ko wi Nasien-batsi leemp wi, pi ci pun pi na ja pi:

¹⁵ ‘Ma me ngi m ja ngi m doon kuu ro; nin m juabutsats, nin m yëkaants. Uro ink ci pëjaa m juabuts oo m yëkan!

¹⁶ Maa tsi undo m lewan, par nin m yëkaants, nin m juabutsats, mán gaciu di mtum nji.

¹⁷ Par, m ja m doon kuu ja: Man ci narëmb, man ka bëka, nji n fierats ko. Maa m meets këme m juatsan, m jampësan, m danj, m kuelëts, a m tiemaatsa ko.

¹⁸ Mán tseendu ibats m doon kë weel tsi nji uwëru un jëntsana wi di bërua, din kë ka bëka; weelandi iŋi-bëtiem ifaacal kë ci nan tiemee, din mkaw katiemaatsau-ko dits winaa; weelandi buts bëko pa pëkër këkësu, din kuu win.

¹⁹ Nji, biki n ŋal biki bëlieng, man nja ndoon ka leentsar bukul, ka kus bukul. Bi u ci bank, ciin nayëkandar-ko, kë yaar ibats.

²⁰ Nji n nats ink tsi pëlëman a ndu n koŋkoŋan. Uci ñaan te përim nji a na waants pëlëman, ka n niaj di nul, ka re ufëri ni nul, në re wul ni nji.

²¹ Nakuk, mán tsuul në tsoar ni nji, tsi pëtsoari nji pi pësien, bi n kuk bi a n tsoar ni Asin nji, tsi pëtsoariul pi pësien.

²² Nan kai kabats, na tean ko wi Uwejats ci wi tsi pëja iriisia.’”