UPIBAN 22 - KARÚK-PËRIM KAWALU Nouveau Testament

Kabulaŋ ubiira

¹ A uwaanju umënts wun pibanin kabulaŋ mlik ubiira; aci kajielal pi kabiirdi, a kuu pëni tsi pëtsoari-pësien, pan ci punk pi Nasien-batsi ni Ubuk-unkaanel;

² a kuu tulee tsi pëcuf kënjëkënts përaasa. Bëko ubiira anats tsi kara kalutar kabulaŋ kamënts kun, a buu buk mbuk ngëyaas untaaja ni ngëtëb, kara pëli bu buk; a ito bul ci pa pëyësan ngëcaak.

³ Përim pëjuatsal katse ka jaka koon këjaka. Pëtsoari-pësien, pi Nasien-batsi ni Ubuk-unkaanel, ka ci di përaasa pëmënts pun, baleempul kë jintëlaul,

⁴ bu kë win urostuul, katimul ka ci tsi ijúk bukul.

⁵ Bërëm katse ka ci; ufietsar ulamp di ka fieraa, nin ufietsar unu. Par Ajug, nul Nasien-batsi, ka fiets un tsi ruets bukul. A bu kë sien, pa sandëndën.

⁶ A uwaanju umënts wunjain: “Irim yi, aci in waka yi, a i ciind icär. Ajug, nul Nasien-batsi ngëwejats bayëlia, ayëli uwaanjuul pa pëpiban baleempul ngan ka ngi pëbaandi tsi ko un car wi.”

Yeesu Këristu acii tsi pëbi

⁷ “Nji ka n bi ink tsi ko un car wi! Anaak, na mobi tsi irim in car yink aleentsaa di ulibëru umënts wi!”

⁸ Nji Joŋ, nji n ci-un nan tei ngëmënts ngun, a n winand ngul. Uwal wi n te wi ngul a n winand ngul, a n yër pa pëjintëla tsi bërun iyots uwaanju un ci wunk tsi pëpibanin ngul.

⁹ Maa a u jain: “Teenan-e, cats ro! Man ci acintsu naleemp, ni acints ban tsaar biki ni wi, un ci wi-bayëlia, ni acints bamob tsi irim ulibëru umënts wi. Nasien-batsi ni m ka un pëjintëla.”

¹⁰ A u jain kak: “Irim in car yink aleentsaa tsi ulibëru umënts wi, cats nuekan yul, par uwal awokani.

¹¹ Naro ngëko kamabats, na moban tsi puu ro ngëko kamabats; nan ci naro ngëko ngëñutsanuel, na moban tsi puu ci naro ngëko ngëñutsanuel; naro ngëko bëmabal, na moban tsi puu ro ngëko bëmabal; nan ci najëntsal, na moban tsi puu ci najëntsal.

¹² Nji ka n bi ink tsi ko un car wi! Man tsiji bëluk, pa pëlukëna kara ñaan ko u liing wi këliing ni wi na ro wi.

¹³ Nji n ci-un Alfa ni Omeega, Nacak ni Natuami, Ujuundi ni Ubaani.

¹⁴ Bë naak, ba nij biki iŋi bukul yi bëtiem [tsi pëñaak Ubuk-unkaanel,] pa bukul pëbofara bëko ubiira bun, ni bukul pëpar-na ilëman ba niaj përaasa.

¹⁵ Di utsand, ngëbuus, ni baro ngëko-bupene, ni baro ngëko katúk-ufuts, ni bafiŋ-bañaan, ni bajintëla-icap, ni na ŋali ba këŋal a nuu ro ngëko kafal!

¹⁶ Nji Yeesu, man yëli uwaanju nji, pa pëleents ind ngëmënts ngi tsi iriisia. Nji n ci un Kabúul Dawid, ni Kajërul, Upesaj Kafa-unu, wi kan fiets wunk.”

¹⁷ A Uwejats ni nanima, ci tsi pëja: “Bili!” A nan tei, na jaan: “Bili!” Na lofëntsi, na bili. Na ŋali, na yankan mlik ubiira, bëlukats.

¹⁸ Nji ka n leents ank nan tei ba këte irim in car yink aleentsaa tsi ulibëru umënts wi: Uci ñaan lak ko tsi yul, Nasien-batsi kee lakul ngënjuatsia ngan picana ngi tsi ulibëru umënts wi.

¹⁹ A uci ñaan pënan ko tsi irim in car yink aleentsaa tsi ulibëru umënts wi, Nasien-batsi kee pënan kafaul tsi bëko ubiira, ni pëbofara përaasa pëyëman; ulibëru umënts wi apiban bi bëko ubiira bun ni bi përaasa pëyëman pun ci bi ja.

²⁰ Na leentsi ngëmënts ngun, aja: “Eey-e! Nji ka n bi ink tsi ko un car wi.” Ameen! Bili, Yeesu, Ajug!

²¹ Bëtseend Yeesu, Ajug, ba ciin ni bañaan bëlieng. Ameen!