UPIBAN 21 - KARÚK-PËRIM KAWALU Nouveau Testament

Batsi buwalu, ni utsia uwalu

¹ A n win batsi buwalu ni utsia uwalu, par batsi bëcak ni utsia ucak katse wam, a bërëk katse ci.

² A n win përaasa pëyëman pëni di batsi a puu welee, pul Jerusalem dëwalu; apëni di Nasien-batsi, ayecis pi nanima warandana un bëtiem pa ayënul.

³ A n te përim pëwiak pëni di pëtsoari-pësien, a pa ja: “Wuu wi, unkundan Nasien-batsi ni bañaan-bajin! Nul koo ci ni bukul. Bu ka ci bañaanul, a nul Nasien-batsi bërierul kë ci ni bukul, [në ci Nasien-batsi bukul.]

⁴ Nul, ka faa mŋand bëlieng, tsi këkës bukul. Pëcäts katse ka ci, nin ikaan, nin irug, nin urear-uliaf, par ngëko ngëcäk apar.”

⁵ A nan tsoar unk tsi pëtsoari-pësie nja: “Teenan-e! Mán tsu ko un ciwi-ba këci, u ci uwalu.” A na ja kak: “Picani, par irim yi aci in waka yi, a i ci icär.”

⁶ A na jain: “Ngëko arolaa aba! Nji n ci-un Alfa ni Omeega, Ujuundi ni Ubaani. Na lofëntsi, mán wëlul përaan tsi mlik ukëpës mi ka wël mi ubiira; te di ka luk.

⁷ Nakuk ka rukanda ngëmënts ngi; nji mán ci Nasien-batsiul, në ci abuk nji.

⁸ Maa balal, ni ba mobats biki tsi uwak, ni bañutsanuel, ni bafiŋ-bañaan, ni baro ngëko katúk-ufuts, ni baro ngëko bëpene, ni bajintëla-icap, ni ban ci biki bëlieng batsup, tsëko bukul, ka ci bametsu pëwal pi ka yëk punk bërua ni ucof. Ci wun pëcäts pëtëbantsan.”

Jerusalem dëwalu

⁹ A ulon tsi ngëwaanju paaj ngun ni ulon, ngan tsij ngunk iraani paaj yun ni kalon, in cum yi ngënjuatsia ngëtuami, paaj ngun ni ulon, bi a u ñakanaanin aja: “Bili, mán pibanu nanima, aar Ubuk-unkaanel.”

¹⁰ tsi uwejats, a uwaanju umënts wun tsëpandin di untunda uwiak, uyampal. A u pibanin përaasa pëyëman, Jerusalem, a pa pëni di batsi, tsi Nasien-batsi, a pa ci tsi pëwelee.

¹¹ Pul, a tsij përëmb Nasien-batsi, a puu lik-lik pi pëlaak pan ka pi mak bëkat, pi pëlaak pi kanjaka pi jaspi, pëjielal pi kabiirdi.

¹² Pul, aka pëlënk pëwiak, pëyampal, a pa ka këlëman untaaja ni këtëb, a ngëwaanju untaaja ni ngëtëb ci tsi kul. Itim apicanaa tsi ilëman, aci itim këbuka untaaja kun ni këtëb, ki babuk Israel bayënts:

¹³ tsi ujara umay-unu, këlëman këwaants, tsi ujara ruets-ucaak këlëman këwaants, tsi ujara utsia-ucaak këlëman këwaants, a tsi ujara uyër-unu këlëman këwaants.

¹⁴ Pëlënk përaasa pëmënts pun aka ngë ujuundi untaaja ni ngëtëb; a itim bapostolu Ubuk-unkaanel picana tsi ngul, bukul untaaja bukun ni batëb.

¹⁵ Uwaanju u ñakanaanin wunk a tsij pëniibuni, aci pëndog uwëru, pa pëniibëna përaasa, ni ilëman pul, ni pëlënk pul.

¹⁶ Bi përaasa pëmënts pun ci bi ja, aci ngëjara ngëbaakër nga liing ngi këliing: uyampar pul aliing ni uwaanar. Ni pëjaam, a uwaanju niib përaasa, a uniibara pul ci ngëstaadiu ngëmiil untaaja ni ngëmiil ngëtëb (12.000). Uyampar pul, ni uwaanar pul, ni unatsar pul, aliing këliing.

¹⁷ Ni kaniibi ki ñaan-najin kë niibëna ki, kul kan ci ki buts ki uwaanju, a u niib pëlënk, a pa ci buniibar kajoj ngëyaas useent ni ngëntaaja ngëbaakër ni ngëbaakër (144), tsi uwaanar pul.

¹⁸ Pëlënk aleempëna jaspi; a përaasa leempëna uwëru ujënts cës, pi kabiirdi kajëntsal cës.

¹⁹ Ilaak in ci yi ba këci, a i ka bëkat, yul warëndanaan wun ujuundi pëlënk përaasa pëmënts pun: ujuundi dëcak awarëndanaana jaspi; ujuundi dëtëbantsan awarëndanaana safiira; ujuundi dëwaajantsan ni kalësedoonia; ujuundi dëbaakëndan ni esmeralda;

²⁰ ujuundi dëñanatsan ni sardoonika; ujuundi dëpaajantsan ni saardiu; ujuundi dëpaajantsan ni dëlon, ni kërisoolitu; ujuundi dëwasantsan ni beerilu; ujuundi dëwasantsan ni dëlon, ni topaasiu; ujuundi dando ri untaaja, ni kërisoopërasu; ujuundi dando ri untaaja ni dëloole, ni jasintu; ujuundi dando ri untaaja ni ngëtëb ametistu.

²¹ Këlëman untaaja kun ni këtëb, aci këlaants untaaja ni këtëb; kara pëlëman aleempëna pëlaants pëloole rin. Kënjëkënts përaasa, aleempëna uwëru ujënts cës, pi kabiirdi kajëntsal.

²² Di përaasa pëmënts pun, nji n winats kato-kayëman; par kato pul kayëman, aci Ajug, nul Nasien-batsi, Kayëlan-bëlieng, ni Ubuk-unkaanel.

²³ Përaasa pëmënts pun fierats nin unu, nin pëli pa pëfiets pul, par përëmb Nasien-batsi ci pun tsi pëfiets pul, a Ubuk-unkaanel ci ulamp pul.

²⁴ Ngëcaak koo yandaar tsi ufac pul, basien umundu kë tsiji përëmb bukul tsi pul.

²⁵ Pënak, ilëman pul di ka ricaa yaas, par bërëm di ka ci rul.

²⁶ Përëmb ngëcaak ni rëmbana ngul ka tsijee rul.

²⁷ Nin utsopal di ka niaj rul yaas, nin naro ko uñutsanuel, oo wi kafal. Maa aci koon ban picanaa biki tsi ulibëru ubiira Ubuk-unkaanel.