UPIBAN 20 - KARÚK-PËRIM KAWALU Nouveau Testament

Pësien te ngëwaanu umiil

¹ A n win uwaanju pëni di batsi a uu welee; a tsij kanigësaani baar-tsëko-unoor, ni mkorente mwiak tsi kañan wul.

² A u mob Uncababaan, wul uko-pëtsats ujon, un ci wi Ujabël ni Useetaani, a u tanar wul ngëwaanu umiil (1.000).

³ Aguts wul di baar-tsëko-unoor, a u ríc bul anuekan tsi ruets wul, pa u rits raac kak ngëcaak tsi kafal, aa ngëwaanu umiil (1.000) ngun ka tsënkëna ka ba. Uba ngëwaanu ngëmënts ngun, u ka u roon u wëtanaa pa uwal un dits wi ka jon.

⁴ A n win itsoari-pësien; ban tsoar biki tsi yul bu wëla pëyëlan pëwat-pëleents. A n win buts ngëwaas ban fala biki iyeen undo bu leents ngi Yeesu ngi ba maatir ngi, ni undo përim Nasien-batsi; a n winand ban jintëlaatsa biki nin un jar, nin bënaam wul, a bu yankats umarëka, nin tsi pëjúk, nin tsi kañan. Bë kak bayësal, a ba sien ni Këristu, te ngëwaanu umiil (1.000).

⁵ Bacäts ban duka bukunk, bu kakats bayësal, te ngëwaanu umiil (1.000) ngun ka tsënkëna ka ba. Ci wun kanatsee-di-pëcäts kacak.

⁶ Bë naak, a ba yëman, ban bof biki tsi kanatsee-di-pëcäts kacak! Pëcäts pëtëbantsan yëlaants ko tsi bukul, maa bu ka ci bajakan Nasien-batsi ni biki Këristu, bu kë sien ni nul aa ngëwaanu umiil (1.000).

Useetaani agaañaara ukam, pa sandëndën

⁷ Uba ngëwaanu umiil (1.000) ngun, din Useetaani ka pënanee di ukalabus wul,

⁸ u pën koo raac ngëcaak tsi kafal, tsi ngëjara ngëbaakër ngun bëlieng ngi umundu, Gog ni Magog, pa pëjukëlën ngul pa ukam: ucumar ngul aci pi pëyii bërëk.

⁹ Bë yaana utsia ajëkëlan, a ba fay bayëman, a ba fay këwatel bayëman, ni përaasa pa ŋala punk. Maa a bërua pëni di batsi ee ba bukul.

¹⁰ A Ujabël, wul un daac wi bukul tsi kafal, gutsaa di pëwal bërua ni ucof, di un jar ci ri ba, wul ni nayëlia natsup; bu ka ci tsi unoor uwiak, pënak ni bërëm, pa sandëndën.

Kawat-pëleents katuami

¹¹ Din a n win pëtsoari-pësien pëwiak, pëfaacal, ni nan tsoari tsi pul. A utsia ni batsi túk alawanul, a katse ka tsi nguu ci tsi.

¹² A n win bacäts, bawiak ni baties; bu nats tsi bërun pëtsoari-pësien, a ngëlibëru waantsaa. A ulibëru ucints waantsaa, ci wun wi ubiira. A bacäts wataa pëleents tsi ngi ba ro ngi, pëteenëna tsi ngan picana ngi tsi ngëlibëru ngëmënts ngun.

¹³ A bërëk kakani bacäts bando biki ci di bul, a pëcäts ni mcäts kakani bacäts bando biki ci di rul. A ba wataa pëleents, ñaan tsi ngi na ro ngi.

¹⁴ A pëcäts ni mcäts gutsaa di pëwal bërua. Pëwal bërua pëmënts pi, ci pun pëcäts pëtëbantsan.

¹⁵ A na winaatsee ba na picana di ulibëru ubiira, agutsaa di pëwal bërua.