UPIBAN 19 - KARÚK-PËRIM KAWALU Nouveau Testament

Pëlílan pëwiak di batsi

¹ Upar ngëmënts ngun, a n te ko pi përim pëwiak di batsi, përim kandënd bañaan kawiak, a bu kë lië koo ja: “Aleluya! Pëbuer, ni përëmb, ni pëyëlan aci pa Nasien-batsi inja,

² par aja nuu wat pëleents në wat pul tsi ucär, ni tsi bëmabal. Awat ŋaats natúk-ufuts nawiak namënts un pëleents, nul nan coki umundu tsi katúk-ufuts ki na ciina ki, a Nasien-batsi lukan-pëkaw ti nul, undo pëñaak baleempul.”

³ A kandënd bañaan kawiak, lië uyaas utëbantsan aja: “Aleluya! A uru un pëni wi tsi uyëkar përaasa pëmënts pun kë paya, pa sandëndën.”

⁴ A bajëŋal ngëntaaja ngëtëb bukun ni babaakër, ni ngëko ngëyësal ngëbaakër ngun, yër ajintëla Nasien-batsi, nul nan tsoari tsi pëtsoari-pësien; a bu kë ja ni ngul: “Ameen! Aleluya!”

Ufesta bënim Ubuk-unkaanel

⁵ Din a përim pëni di pëtsoari-pësien, a pa ja: “Nda bëndani Nasien-batsi nja ind bëlieng baleempul, ind ba lënkul biki, baties ni bawiak!”

⁶ A n te ko pi përim kandënd kawiak, pi uleentsar mlik mcum, pi uleentsar impalambamb iwiak, a puu ja: “Aleluya! Par Ajugnja Nasien-batsi, nul Kayëlan-bëlieng, aci tsi puu sien!

⁷ Nda ju ngë lílan, ngë juc ni ulílan, nja kë rëmbanul! Par ufesta bënim Ubuk-unkaanel, baandi wink; aar wul ayecis bërierul,

⁸ awëla pëtiema kaŋí ka leempëna ki imuets iluelal a kuu lik-lik, a ka ci kajëntsal;” par kaŋí ka leempëna kunk imuets iluelal, apiban u ci ngëmabal ngi bayëmanja ngi ba roon bu kë ro.

⁹ Din, a uwaanju umënts wun jain: “Picani ja: ‘Bë naak, ban duuree biki ufëri ufesta bënim Ubuk-unkaanel!’” A u jain kak: “Imënts yi, aci irim Nasien-batsi, icär.”

¹⁰ A n yër tsi iyots wul pa pëjintëla wul, maa a u jain: “Teenan-e, cats ro! Man ci acintsu naleemp, a n ciind acints ban tsaar biki ni wi, ba mob biki tsi ngi Yeesu. Jintëlaan Nasien-batsi; par pëmob tsi ngi Yeesu, ci wun uwejats pëleents u meaatsa wi.”

Këristu akuk

¹¹ Din a n win batsi waantsar; a n win umpëlënc ufaacal, a nan dijee wul kë jaka, “Namob tsi përim ni Nacar.” Aja na roon, nuu wat pëleents ni bëmabal, nuu kaman ni bëmabal.

¹² Këkësul anaam unk kandiamënt bërua. Ngëcape-pësien ngëcumal aci tsi beenul. Nul aka katim kan picana ki, ki ñaan meets ki, aciul bërierul me un.

¹³ Atiema kapantu ka yuaga ki di pëñaak. Katimul ka jaka, “Përim Nasien-batsi.”

¹⁴ A impañ-bakaman in ci yi di batsi ci tsi pëfetsul; bu tiema iŋi iluelal ifaacal, a i ciind ijëntsal, a ba rija ngëmpëlënc ngëfaacal.

¹⁵ A ulaac un de wi kë pëni di mtum nan dija unk umpëlënc ufaacal, pa pëkobuna ngëcaak. Nul koo yafanaan ngul pëndog pëfeeru; ka poos-poosan kapuañi pëwat uriab, wi ukulëñ Nasien-batsi, Kayëlan-bëlieng.

¹⁶ Nul aka katim kan picana ki tsi kapantuul, ni tsi pëmbojul, aja: “Nasien basien, Ajug bajug.”

¹⁷ Din a n win uwaanju nats di bametsu unu, a u lië ni përim pëwiak, aja ngëko-ngëyits ngan ci ngi bëlieng tsi pëyits di umetaari batsi: “Nda bili! Nda baari tsëloole pa ufëri Nasien-batsi, uwiak,

¹⁸ pa ndë re ngëyamats basien, ni ngi bawiak basondaari, ni ngi baka-pëyëlan, ni ngëyamats ngëmpëlënc ni ngi ban dija biki ngul, ni ngi bañaan bëlieng, bafacal ni baluek, baties ni bawiak.”

¹⁹ A n win un jar wun, ni basien umundu ni impañ bukul yi bakaman. Bë júk pa pëkaman nan dija unk umpëlënc, nul ni impañul yi bakaman.

²⁰ A unjar umënts wun moba, wul ni nayëlia natsup nun, nandon unk ka ro ngëpibanaani tsi bërun wul, ngi na falëna ngi ba yank bukunk umarëka unjar, a bu kë jintëla bënaam wul. Ngul ngëtëb ngun agutsa ngëyësal di pëwal bërua tsi ucof kë yëk tsi.

²¹ A ban duka bukunk fiŋaa ni ulaac wi kan pëni wunk di mtum nan dija unk umpëlënc; a ngëko-ngëyits bëlieng re ngëyamats bukul asuets.