UPIBAN 18 - KARÚK-PËRIM KAWALU Nouveau Testament

Pëyër Babiloonia

¹ Uba ngëmënts ngun, a n win uwaanju ucints pëni di batsi pëwelee, aka pëyëlan pëwiak a përëmb wul fiets utsia.

² A u lië ni përim pëwiak, aja: “Ayër, ayër, Babiloonia, përaasa pëwiak! Pul aruka ci tsëciini ngëcaay, tsëkungëni uwejats utsopal un ciwi-ba këci, tsëkungëni uko-uyits utsopal un ciwi-ba këci a u ñutsan.

³ Par ngëcaak bëlieng araan pëwat uriab uwiak katúk-ufuts pul; a basien ngëcaak túk ufuts ni pul; a bawap umundu ruka ci barëmb undo upelëkar ngëko pul ngi uroonku.”

⁴ Din a n te përim pëcints pëni di batsi a pa ja: “Bañaan nji! Nda pënan tsi përaasa pëmënts pi, pa nda rits bof tsi ngëjuban pul, din nda rits ka kafa ind tsi ngënjuatsia ngi kan baandë-ni ngi pul.

⁵ Par, ngëjuban pul ajúkëlar te di batsi, a Nasien-batsi les ngëko pul ngi kamabats.

⁶ Nda kakani pul bi pa ro bi ja! Nda lukan pul ngi pa ro ngi te ngëyaas ngëtëb! Di karaani ki pa gëbëlënaan kunk mdaan, nda gëbulani mul ngëyaas ngëtëb nda wul pul!

⁷ Bi pa rëmbandar bunk, a pa baar ibats tsi ngëko uroonku, nda tsuun pul unoor ni unjuatsia-puum nda liingan unk! Par pul, aci tsi pëja tsi uwaas pul: ‘Nji n tsoar ink pi nasien-ŋaats, nji n cätsëndënats ayën nji, a te unjuatsia-puum di ka baandë-niin yaas.’

⁸ Wul ka wun, ngënjuatsia pul ka baandi tsi unu uloole baŋ: pëcäts, unjuatsia-puum, ni ubon; bërua ka tër pul pa ba. Par Ajug, nul Nasien-batsi na wati pul pëleents, aka pëyëlan.”

⁹ Basien umundu, bukul ban do biki ci tsi katúk-ufuts ni pul ni tsi ngëko uroonku, bu ka rug bu kë kaanar pul, uwin bukul uru uyëkar pul.

¹⁰ Bu ka nats ba lawan, undo bu lal unoor wi pa ciina wi, bu kë ja: “Cay! Cay përaasa pëwiak pun, Babiloonia, përaasa pan ka punk pëyëlan! Tsi uler uloole rin, a kawatau pëleents baandi!”

¹¹ A bajula umundu ci tsi irug, ni ikaan tsi uleka Babiloonia, par ñaan katse weel ngëko bukul ngi pëjula:

¹² ngëko-pëjula nga leempëna ngi uwëru, ni uncaam-utsak, ni ilaak in ka yi bëkat, ni ilaants, ni iseenda iñatsal, ni iseenda ijankal caw, ni iseenda iluelal, ni iseenda ijankëfuel; imul buko ba líl bi pëñal, ni ngëko ngan leempëna ngi irumaj ngëloong, ni ngëko ngan leempëna ngi imul mko man ka mi bëkat, ni ngëko ngan leempëna ngi mtsak-mjankal, ni ngëko ngan leempëna ngi ifeeru, ni ngëko ngan leempëna ngi ilaak itambal, iwar;

¹³ ni ngi kaneela, ni ngëtapal, ni ulicar, ni miira, ni libanus, ni pëwat, ni mkër, ni ifar iñikëtsuel, ni bumaaj, ngëyët-ngëkas ni ngënkanel-ngëkaats, ngëmpëlënc ni isaret, ni ngëliaf ni ngëwaas bañaan-bajin.

¹⁴ Bu koo ja: “Ngi m dí ngunk tsi uwaasu, apën alawanu; a ngëko bëlieng ngi uroonku ni ngan dëmbana ngi, aniamënu, a katse ka wina yaas.”

¹⁵ Bajulats ngëko ngëmënts ngi, ban duka biki ci barëmb undo përaasa Babiloonia, bu ka nats ba lawan, bu kë rug, bu kë kaan, par bu lal unoor wi pa ciina wi.

¹⁶ A bu kë ja: “Cay! Cay përaasa pëwiak pun, pul pando pi ka tiema iŋi iñatsal, iŋi ijankal caw, iŋi ijankëfuel; pul pando pi tsua uwëru, ni ilaak in ka yi bëkat, ni ilaants!

¹⁷ Tsi uler uloole rin, a bëka bëwiak pi bëmënts bun cokaa!” Batukand bëntsian bëlieng, ni baya bëlieng bëyaas tsi bëntsian, ni baleemp di itsian, ni biki ka leemp biki bëlieng di bërëk, bu nats alawan.

¹⁸ Uwin bukul uru uyëkar pul, ba ci tsi pëlië koo ja: “Pëom përaasa ro pun naam ni përaasa pëwiak pi?”

¹⁹ A bu kë gur mboos tsi iyeen bukul, a ba ci tsi irug ni kaan, a bu kë lië koo ja: “Cay! Cay përaasa pëwiak pun! Bëka pul bëwiak, atsu ban ka biki bëlieng itsian di bërëk a ba ruka ci barëmb; tsi uler uloole rin, a pa ruka ci ulaalats!

²⁰ Batsi, lílani tsi undo pëyër pul! Ind bayëman, bapostolu, bayëlia, nda lílani buts! Par kawat-pëleents ind, Nasien-batsi awat kul, afaŋan ind.”

²¹ Din, a uwaanju un ka wi pëyëlan jej pëlaak pan naam pi pëlaak pëwiak pëfañëni mbuk, a u guts pul di bërëk a u ja: “Unk di Babiloonia kë gutsaa run ni pëyëlan, pul përaasa pëwiak, a katse ka wina yaas.

²² Përim balas incuundu ni baya, ni bancand, ni bafuts-ngëluur, katse ka tea tsi wi, yaas. Nin naleemp uleemp iñan un ciwi-ba këci, katse ka wina tsi wi, yaas. Uleentsar pëlaak pëfañëni mbuk, katse ka tea tsi wi, yaas.

²³ Ufac ulamp, katse ka fiets tsi wi, yaas. Përim nanim ni pi nanima, katse ka tea tsi wi, yaas. Par bajulau ro bukun ci bañaan bawiak tsi umundu, par ngëkou ngi bëpene afäl ngëcaak bëlieng;

²⁴ a pëñaak bayëlia, ni pi bayëman, ni pi ban fiŋa biki bëlieng tsi umundu awina tsi wi, Babiloonia.”