UPIBAN 17 - KARÚK-PËRIM KAWALU Nouveau Testament

Kawata-pëleents ŋaats natúk-ufuts nawiak

¹ A ulon tsi ngëwaanju paaj ngun ni ulon, ngan tsij ngunk iraani paaj yun ni kalon, bi a u jain: “Bili, mán pibanu kawata-pëleents ŋaats natúk-ufuts nawiak nun, nan tsoarëna unk tsi mlik mdëmbal.

² Basien umundu, bu túk ufuts ni nul, a bañaan ban ciina biki umundu kuj pëwat katúk-ufutsul.”

³ Din tsi uwejats, a uwaanji tsëpandin te di ulaalats. A n win ŋaats nan tsoari tsi un jar ujankal, un cum wi ni itim i kan kar yi Nasien-batsi; un jar umënts wun a tsij ngëyeen paaj ni bëlon ni këntin untaaja.

⁴ Nul ŋaats, atiema iŋi ijankal caw, ni ijankëfuel, a na tsua mko uwëru, ni mko ma leempëna mi ilaak in ka yi bëkat, ni ilaants. tsi kañanul, a tsij karaani ka leempëna ki uwëru, kan cum ki ngëñutsanuel, ni ngëko ngëtsopal ngi katúk-ufutsul.

⁵ Katím apicana tsi pëjúkul; ko wi ka pac wi meaatsa; iink di ka ci run: “Babiloonia, përaasa pëwiak, anin bakaats batúk-ufuts ni ngëñutsanuel ngi kandolaa ngi tsi umundu.”

⁶ A n win ŋaats namënts un kuj pëñaak bayëman, ni pëñaak baleents ngi Yeesu ngi bamaatir ngi. Uwal wi n winul wi, a n pikra mpikra mwiak.

⁷ A uwaanju umënts wu n jain: “We ka wun m pikra? Un doots wunk mea tsi uleka ŋaats nun, ni tsi uleka un jar wi na rija wunk, un tsij wunk ngëyeen paaj ngun ni bëlon, ni këntin untaaja, mán leentsu ko wi u pac wi.

⁸ U n jar wi m win wunk, aro ci, maa katse wink aci. Ka payee u pëni di baar-tsëko-unoor, u tsëp pëniam. A ban ciina biki umundu, bukul biki itim bukul picanaatsa yi di ulibëru ubiira, ki umundu juund ki, bu ka pikra uwin bukul un jar umënts wun; par wul aro ci, a katse wink aci, maa kee u ci kak.

⁹ Bëlipal kameko aciina tsi: Ngëyeen paaj ngun ni bëlon, aci ngëntunda paaj ni ulon ngi ŋaats namënts un tsoarëna ngi, a nga ciind buts basien paaj ni nalon;

¹⁰ basien kañan tsi bukul ayër ba, a naloole ci, a nacints nun netse baandi; maa ubaandiul, aka na roon në jon ko uties.

¹¹ U n jar un do wunk ci, a katse ci, wul bërier wul ci wun nasien nawasantsan. Wul, aci ulon tsi ngul paaj ngun ni ulon, a uu tsëp pëniam.

¹² Këntin untaaja ki m win kunk, aci basien untaaja ba netse biki yank pësien; maa bu kee wëla pëyëlan pëci basien ni un jar wun, tsi ko wi do wi uler uloole.

¹³ Bukul, bu bof utsaag uloole: Bu ka wël un jar umënts wun pëyëlan pi ba ka pi, ni uyëlan wi ba ka wi.

¹⁴ Bukul, bu ka kaman Ubuk-unkaanel, maa Ubuk-unkrnel ka kuk bukul, par wul aci Ajug bajug, Nasien basien; ban ci biki ni wul, bukul banduee biki a ba rata, a ba mob tsi ko wi ba jaka wi, bu ka pena buts ukam.”

¹⁵ Din, a uwaanju umënts wu n jain: “Mlik mi m win munk, tsi ŋaats natúk-ufuts namënts un tsoarëna tsunk, aci bañaan, ni indënd bañaan, ni ngëcaak, ni ngëlíingu.

¹⁶ Këntin untaaja ki m win kunk, ni un jar wun, ka ñaas ŋaats natúk-ufuts namënts un; ka tsuul pëwamandats ko, ni pëtiemaatsa ko; ka re uliaful, ngë tërul di bërua.

¹⁷ Par, Nasien-batsi atsu tsi ngëwaas bukul, bukul përo ko wi na tsaag wi, bukul pëbaar utsaag uloole bu ka wël un jar umënts wun pësien bukul, aa ngi Nasien-batsi ja ngi, ka tsënkëna ka rolaa.

¹⁸ A ŋaats ni m win unk, aci përaasa pëwiak pun, pan sien pi basien umundu.”