UPIBAN 16 - KARÚK-PËRIM KAWALU Nouveau Testament

Iraani paaj ni kalon, yi uriab Nasien-batsi uwiak

¹ Din, a n te përim pëwiak pëni di kato-kayëman, a pa ja ngëwaanju paaj ngun ni ulon: “Nda tsëpan ndë koŋ iraani paaj yun ni kalon tsi utsia, yul in tsij yi uriab Nasien-batsi.”

² A uwaanju ucak wun tsëp, a u koŋi karaani wul tsi utsia, din a ukaalës ujuatsal, wi kan dean wi uliaf, jëk bañaan ban tsij biki umarëka un jar umënts wun a bu kë jintëla bënaam wul.

³ A uwaanju utëbantsan koŋi karaani wul di bërëk, din a ba witsa pëñaak, pi pëñaak nacäts; a ngi ka yafënts ngi di bërëk cats bëlieng.

⁴ A uwaanju uwaajantsan koŋi karaani wul di ibulaŋ, ni di ngëkëpës, din a ibulaŋ ni ngëkëpës witsa pëñaak.

⁵ A n te uwaanju un kaana wi mlik ja: “M ci namabal, wi nan ci, wi nandoi ci, wi nayëman, par m wat ngëmënts ngi pëleents;

⁶ Undo bu túl pëñaak bayëman, ni pi bayëlia, a m wël buts bukul pëñaak ba raan; aci ko wi ba tsasar wi iyeen bukul!”

⁷ A n te bëgij jaankma, aja: “Eey-e, Ajug, wi Nasien-batsi, Kayëlan-bëlieng, m ja kë wat pëleents kë wat pul tsi ucär, ni tsi bëmabal.”

⁸ A uwaanju ubaakëndan koŋ karaani wul tsi unu, din a unu wëla pëtërëna bañaan bërua.

⁹ A uwamël bërua uwiak, tër bañaan. A bu kë kar katim Nasien-batsi, nul nan kai pëyëlan tsi ngënjuatsia ngëmënts ngun; a bu yaarats ibats bu ka rëmbanul.

¹⁰ A uwaanju uñanatsan koŋ karaani wul tsi pëtsoari un jar pi pësien. Din a pësien wul ruka ci karëm. A bañaan kë rum indiamënt bukul, undo urear uliaf;

¹¹ a bu kë kar Nasien-batsi batsi, undo urear ngëliaf bukul, ni undo ngëkaalës bukul; maa bë yaarats ibats tsi uleka ngi bu kë ro ngi.

¹² A uwaanju upaajantsan koŋ karaani wul tsi kabulaŋ Ëfërates, kawiak; a mlik kul kay, pa pëyecis bëga basien biki kan pënë-ni biki umay-unu.

¹³ Din, a n win ngëwejats ngëwaants ngëtsopal, anaam unk ngëbopal, a nguu pëni di mtum Uncababaan wun, ni di mtum un jar wun, ni di mtum nayëlia natsup nun.

¹⁴ Aci ngëwejats ngëcaay; ngul ka ro ngëpibanaani, a nguu tsëp di basien umundu upëban, pëjukëlën bukul pa ukam unu uwiak wun, wi Nasien-batsi Kayëlan-bëlieng.

¹⁵ Nda teenan-e! Mán bi pi nakiej. Anaak, nan duki ibats, a na tsuunkar iŋiul yi bëtiem uwar, pa na rits yandaar ni katiemaatsa-ko, mkawul përits winaa!

¹⁶ Unk, a ngëwejats ngëmënts ngun jukëlën basien tsi tsëko tsi ka n jaka tsunk Arëmagedon, tsi uliingu Uyebëreu.

¹⁷ A uwaanju upaajantsan ni ulon koŋ karaani wul tsi ufuts, din a përim pëwiak pëni di tsëko-tsëyëman, di pëtsoari-pësien a pa ja: “Arolaa!”

¹⁸ Din a u ruka ci ilikajan, ni irim, ni impalambamb, ni usiintsar utsia mak, bi u netse bi ro siintsar, ki ñaan-najin ci ki tsi utsia.

¹⁹ A përaasa pëwiak tawësar aro itawar iwaants, a iraasa ngëcaak yër. Din a Nasien-batsi les Babiloonia, përaasa pëwiak, pa pëwël pul karaani kan tsij kunk pëwat uriab, wi ukulëñul.

²⁰ A ngënjiu bëlieng niam, a ngëntunda katse wina.

²¹ A isa-ngëlaas iwiak, iritsal pi taleentu, pëni di batsi ayërëni bañaan. A bañaan kë kar Nasien-batsi, undo unjuatsia uwiak, wi isa-ngëlaas imënts yun; par unjuatsia uwiak umënts wun apelëk mak.