UPIBAN 15 - KARÚK-PËRIM KAWALU Nouveau Testament

Ngëwaanju paaj ngun ni ulon, ni ngënjuatsia ngëtuami

¹ A n win upibanaani ucints di batsi uwiak, a u par pëjaa: Aci ngëwaanju paaj ni ulon ngan tsij ngi ngënjuatsia paaj ngun ni ulon, ngëtuami, par uriab Nasien-batsi abaana tsi ngul.

² A n win ko pi bërëk bëjëntsal pi kabiirdi, ban bofëlar bi ni bërua. A ban kuk biki un jar umënts wun ni bënaam wul, ni upinara katim wul, bë nats tsi bërëk bëjëntsal bun pi kabiirdi, a ba tsij incuundu i Nasien-batsi wël yi bukul;

³ a bu kë ya kaya Moises, naleemp Nasien-batsi, ni kaya Ubuk-unkaanel, koo ja: “Wi Ajug, Nasien-batsi, Kayëlan-bëlieng, ngi m do ngi aci ngëwiak, a nga par pëjaa! Ina Nasien ngëcaak! Igau amab a i ciind icär!

⁴ Ajug! Yën dits un ka lënku? Yën dits un ka rëmban katimu? Par, wi rin yëman un. Wul ka wun, ngëcaak bëlieng ka bi ngë jintëla tsi bërunu, par ngëmabal ngi m do ngi apibanaa.”

⁵ A uu ba, a n teen a n win tsëko-tsëyëman unkundan bëmaatir waantsaa di batsi;

⁶ a ngëwaanju paaj ngun ni ulon, ngan tsij ngunk ngënjuatsia paaj ngun ni ulon pëni di tsëko-tsëyëman; ngul atiema iŋi iluelal a yuu lik-lik, a nga tana tsi ijinc ngul itël i leempëna yi uwëru.

⁷ A ulon tsi ngëko ngëyësal ngëbaakër ngun wël ngëwaanju paaj ngun ni ulon iraani paaj ni kalon i leempëna yi uwëru, a i cum uriab Nasien-batsi uwiak, nul nayësal pa sandëndën.

⁸ A tsëko-tsëyëman cum uru, un pëni wi di përëmb Nasien-batsi, ni di pëyëlan pi na ka pi. A kaats nan yëlani pëniaj tsëko-tsëyëman, aa ngënjuatsia paaj ngun ni ulon, ngi ngëwaanju paaj ngun ni ulon ka tsënkëna ka ba.