UPIBAN 14 - KARÚK-PËRIM KAWALU Nouveau Testament

Ubuk-unkaanel, ni bañaan wul ban facana biki

¹ Din a n teen a n win Ubuk-unkaanel nats tsi untunda Sion, a bañaan ngëmiil useent bukun ni ngëmiil ngëntaaja ngëbaakër ni ngëmiil ngëbaakër (144.000), ci ni wul, a ba picana katim wul ni katim asin wul tsi pëjúk kara ñaan tsi bukul.

² A n te përim pëni di batsi, pi uleentsar mlik mcum, pi uleentsar kampalambamb kawiak. Përim pi n te pi, anaam unk balas incuundu ka las bukun incuundu bukul.

³ A ba ci tsi pëya kaya kawalu, tsi bërun pëtsoari-pësien, ni tsi bërun ngëko ngëyësal ngëbaakër ngun ni bajëŋal bukun. A kaats nan yëlani pëjuk kaya kamënts, ucits ba bañaan ngëmiil useent bukun ni ngëmiil ngëntaaja ngëbaakër ni ngëmiil ngëbaakër (144.000), bukul ba weelënee biki di umundu.

⁴ Bamënts biki, bë ci ban tsopandarats biki ni bakaats, par bu meets ŋaats. Bukul ci bukun bafets Ubuk-unkaanel, tsi uu ya tsi ba këya. Bukul bu weelee tsi pëncuaf bañaan pa ba ci ngëtseend-ngëcak pa Nasien-batsi, ni Ubuk-unkaanel.

⁵ Kafal cits tsi itum bukul; bu kaats ulaci.

Kawat-pëleents ki Nasien-batsi kë wat ki

⁶ Din a n win uwaanju ucints, a uu yits di umetaari batsi, a tsij Upetsan-uwar un dits wi ka ba, pa pëleents wul ban ciina biki utsia, kara ucaak, kara pëbuka, kara uliingu, ni kara bañaan-ucaak.

⁷ A uu ja ni përim pëwiak: “Nda lënkan Nasien-batsi ndë rëmbanul, par uler kawat-pëleentsul, abaandi. Nda jintëlaan na leempi batsi, ni utsia, ni bërëk, ni ngëkëpës.”

⁸ A uwaanju ucints, utëbantsan, neki a u ja: “Ayër! Ayër! Babiloonia, pul përaasa pëwiak pan daanan punk ngëcaak bëlieng pëwat uriab katúk-ufuts pul.”

⁹ A uwaanju ucints, uwaajantsan neki ngul, a u ja ni përim pëwiak: “Uci ñaan jintëla un jar wun ni bënaam wul, a na yank umarëka tsi pëjúkul oo tsi kañanul,

¹⁰ nul buts nii raan pëwat uriab Nasien-batsi, pul pan gëbëlanaatsa pi a pa tsua di karaani kan tsij ki uriab Nasien-batsi; në tsua mak tsi unoor di bërua ni ucof, tsi bërun ngëwaanju ngëyëman, ni tsi bërun Ubuk-unkaanel.

¹¹ Uru unoor bukul uwiak koo paya pa sandëndën. Ban jintëla bukunk unjar ni bënaam wul, a ba yank umarëka katim wul, bu ri ka ka pënaakësa, nin pënak, nin bërëm.

¹² Pëliincandër bayëman aciina tsi, bukul ba mob biki tsi ngëtsua Nasien-batsi, ni tsi uwak tsi Yeesu.”

¹³ Din, a n te përim pëni di batsi a pa ja: “Picani ja: ‘Pëpën tsi inkri, bu naak, bacäts ban cäts biki tsi Ajug!’” Uwejats aja: “Eey-e, bu ka naakësa ngëleemp bukul ngëñatsal. Par, ngi ba ro ngi koo fets bukul.”

Kakaaw tsi umundu

¹⁴ A n teen, a n win kasa kafaacal, a nan tsoari tsi kasa kamënts kun naam unk Abuk ñaan-najin; a ucape-pësien ci tsi beenul, u leempëna wi uwëru, a na tsij ukaawi tsi kañanul, un de wi.

¹⁵ A uwaanju ucints pëni di kato-kayëman, a u lië ni përim pëwiak, pa nan tsoar unk tsi kasa; ajaul: “Jejan ukaawiu kë kaaw, uler kakaaw aband, par mleempënar tsi utsia ajank.”

¹⁶ Din a nan tsoar unk tsi kasa tsu ukaawiul tsi utsia, a kakaaw kaawaa tsi utsia.

¹⁷ A uwaanju ucints pëni di kato-kayëman kan ci ki di batsi, a u tsij buts ukaawi un de wi.

¹⁸ A uwaanju ucints kak, un ka wi pëyëlan tsi bërua, pëni tsi bëgij, a ni përim pëwiak a u ru un tsij wunk ukaawi un de wi, aja wul: “Jejan ukaawiu, wul un de wi, kë fal ingënts uwoorta mbiiñu utsia jukëlën yul, par mbuk mul ajank.”

¹⁹ A uwaanju umënts wun wiil ukaawi wul tsi utsia, a u fal ingënts uwoorta mbiiñu utsia ajukëlën yul, a u guts yul di kapuañi kawiak, ki uriab Nasien-batsi.

²⁰ A kapuañi poos-poosana di utsand përaasa; a pëñaak pëni tsi kapuañi, te pa band tsi ifeeru in goka yi di itum ngëmpëlënc, a pa jëk tsëko aro ngënkilometar ngëseent ngëwaants.