UPIBAN 13 - KARÚK-PËRIM KAWALU Nouveau Testament

U n jar un pëni wi di bërëk a u katee

¹ Din, a n win un jar pëni di bërëk pëkatee, a tsij këntin untaaja, ni ngëyeen paaj ni bëlon, a ngëcape untaaja ngi pësien ci tsi këntin wul, a katim ki kan kar ki Nasien-batsi ci tsi kara been wul.

² U n jar wi n win wi, anaam unk uwëts, a iyots wul naam ni yi ubuus-bëreeŋ, a mtum wul naam ni mi ulioŋ. A Uncababaan jej pëyëlan wul, ni pëtsoari wul pi pësien, ni pëyëlan wul pëwiak, awël un jar.

³ Bëlon tsi ngëyeen un jar umënts wun anaam alupandara pëcäts, maa mlupi pëcäts mmënts mun yësana. A bañaan bëlieng tsi umundu pikra, a bu kë fets un jar umënts wun.

⁴ A ba jintëla Uncababaan umënts wun, par wul awël un jar pëyëlan; a ba jintëla un jar umënts wun, bu kë ja: “Yën ci-un pi un jar umënts wi? Yën yëlan un pëkama wul?”

⁵ A un jar umënts wuwëla mtum pa puu píc, ni puu kar Nasien-batsi. A u wëlanda pëyëlan puu ro unk, te këlí ngëntaaja ngëbaakër ni këtëb.

⁶ A u waaban mtum wul aci tsi pëkar Nasien-batsi, pëkar katimul ni unkundanul, ni pëkar ban ciina biki batsi.

⁷ A u wëla pëkaman bayëman, u kuk bukul. A u wëla pëyëlan tsi kara pëbuka, tsi kara bañaan, tsi kara uliingu, ni tsi kara ucaak.

⁸ Ban ciina biki bëlieng umundu, bu ka jintëla un jar umënts wun, bukul biki itim bukul picanaatsa yi, ki umundu juund ki, di ulibëru ubiira, wi Ubuk-unkaanel un jakana wi.

⁹ Nan kai kabats, na tean.

¹⁰ Nan kai pëmoba pëluek, ka moba pëluek. Nan kai pëfiŋa ni ulaac, ka fiŋa ni ulaac. Pëliincandër bayëman ni pëmob tsi uwak, aciina tsi.

U n jar un pëni wi di utsia apaya ruets

¹¹ Din, a n win un jar ucints, apëni di utsia pëpayee. Atsij këntin këtëb pi Ubuk-unkaanel, maa a uu ñakan pi Uncababaan.

¹² Ni pëyëlan un jar ucak wun, pul bëlieng, a uu roona pul ko tsi bërun wul. A uu tsu umundu, ni ban ciina biki wul, bu kë jintëla un jar ucak wun, un do wunk ka mlupi mi kan fiŋ mi a ma yësana.

¹³ A uu ro ngëpibanaani ngëwiak; ka tsu ŋal bërua ba pëni di batsi ba welee tsi utsia, tsi bërun bañaan.

¹⁴ A uu fal ban ciina biki utsia; koo falëna bukul ngëpibanaani ngi u wëla ngi përo tsi bërun un jar ucak wun. Wul aja ban ciina biki tsi utsia, ba roon bu ka leemp bënaam un jar u lupana wunk ni ulaac, a uu yafënts.

¹⁵ A u wëla pëtsu uyafënts tsi bënaam un jar ucak wun, pa bënaam un jar ucak wun ka yëian pëñakan, ni pëtsu ban jintëlaatsa biki bënaam un jar umënts wun ba fiŋaa, bukul bëlieng.

¹⁶ A pëyëlan bañaan bëlieng, baties ni bawiak, barëmb ni baranj, bafacal ni baluek, a ba tsua umarëka tsi kañan kariir, oo tsi pëjúk,

¹⁷ pa ñaan tsë yëlan nin pëweel ko, nin pëwaap ko, ucits ba nan kai umarëka, un ci wi, katim un jar umënts wun, oo upinara katim wul.

¹⁸ Kameko aciina tsi: Nan kai uwejats, na jaakan pëme upinara un jar umënts wun, par aci upinara ñaan-najin: upinaraul aci ngëseent paaj ni ngëntaaja paaj ni paaj (666).