UPIBAN 12 - KARÚK-PËRIM KAWALU Nouveau Testament

Ŋaats, ni Uncababaan

¹ Upibanaani uwiak acili di batsi: nalon ŋaats atiema unu, a pëli ci tsi utsia iyotsul, a ucape-pësien un tsij wi ngëpesaj untaaja ni ngëtëb ci tsi beenul.

² Aseempa, a nu lië undo urear uliaf-kabuk, par aci tsi unoor-kabuk.

³ Din, a ulon upibanaani cili di batsi; teenan-e: Uncababaan uwiak, ujankal pi bërua; a tsij ngëyeen paaj ni bëlon, ni këntin untaaja, ni ngëcape-pësien paaj ni ulon tsi iyeen wul.

⁴ A pëtant wul raki katawar ngëpesaj batsi kaloole tsi iwaants yun, agutsar utsia. A Uncababaan umënts wun nats tsi bërun ŋaats nanduka unk ayecis kabuk, pa ubukul, u yoor napätsul.

⁵ A na buk napäts niints; nul ka un pëyafanaan ngëcaak bëlieng pëndog pëfeeru. A napätsul wajaa atsëpanda di Nasien-batsi, ni di pëtsoariul pi pësien.

⁶ A ŋaats túk atsëp ulaalats, di Nasien-batsi ro ri yecisul tsëko, nuu rialëndana rul te ngënu umiil ni ngëseent ngëtëb ni ngëntaaja paaj (1.260).

⁷ A ukam kamaa di batsi: Mikayel ni ngëwaanju wul, anatsara pëkaman Uncababaan, a Uncababaan kaman ni ngëwaanju wul,

⁸ maa Uncababaan kaats pëyëlan pan kës pi, din a pëlas katse ci pa ngul di batsi.

⁹ A Uncababaan uwiak umënts wun watee, wul uko-pëtsats ujon, wi kanjaka wunk Ujabël ni Useetaani, unja wunk u roon uu raac bañaan umundu bëlieng tsi kafal. Awatee tsi utsia, wul ni ngëwaanju wul.

¹⁰ A n te përim pëwiak di batsi, a pa ja: “Inkri, pëbuer abaandi, ni pëyëlan ni Pësien Nasien-batsi inja, ni pëyëlan Këristuul. Par, natumtsar batsaar ni inja awatee, wul unja wi u roon uu tumtsar bukul tsi bërun Nasien-batsi, pënak ni bërëm.

¹¹ Bë kukëna wul pëñaak Ubuk-unkaanel, ni përim pi ba ja pi tsi uleka ko wi ba maatir wi. Bë ŋalats ubiira bukul, te ŋal pëcäts.

¹² Wul ka wun, batsi ni ban ciina biki batsi, nda ciin tsi ulílan! Maa, cay ind ban ciina biki utsia, ni ban ciina biki bërëk! Par Ujabël awelee pëbi di ind; ariabats mak, par ame, ko unduka wi tsi uwal wul aci ko uties.”

¹³ Uwal wi Uncababaan win wi u wataree utsia, a u pën koo ruak ŋaats nan buk unk napäts niints.

¹⁴ Maa a ŋaats namënts un wëla ibaakëla itëb, yi uwabankank uwiak, pa na yits na tsëp ulaalats, di tsëkoul, nuu rialëndana rul te uwal, ni ngëwal, ni umetaari uwal, në lawan këkës uko-pëtsats.

¹⁵ Din a uko-pëtsats umënts wun gac mlik pi kabulaŋ, përuakan ŋaats namënts un, pa mlik ka rakul man tsëpand.

¹⁶ Maa a utsia tsënk ŋaats namënts un; utsia waaban mtum wul a u yoor kabulaŋ ki Uncababaan gac kunk.

¹⁷ Din a Uncababaan riabatsar ŋaats namënts un, a u pën atsëp pëkaman banduka bukunk, ban bof biki tsi pëci kajërul, bukul ban ci biki tsi përo ngi Nasien-batsi tsu ngi, a ba mob tsi ko wi Yeesu leents wi.

¹⁸ [A Uncababaan umënts wun nats tsi pëyii bërëk.]