UPIBAN 11 - KARÚK-PËRIM KAWALU Nouveau Testament

Bamaatir batëb

¹ A n wëla pëjaam pa naam pi ni pëko pëníibëni, a njaka: “Natsaan kë níib kato-kayëman Nasien-batsi, kë níib bëgij, kë pin ban ci biki tsul a bu kë jintëla Nasien-batsi.

² Maa bulay bun di utsand kato-kayëman, wëtan unk bul, cats niib bul, par bul awëlaa pa ban cits biki Bajudeu, biki kan poos-poosan biki përaasa pëyëman pun, ba ro këlí ngëntaaja ngëbaakër ni këtëb.

³ Bamiñ batëb ba maatir bukunk, mán wël bukul pëyëlan, bu ka tiema ngësaaku bu kë car pëleents ngi keen ci ngi, te ngënu umiil ni ngëseent ngëtëb ni ngëntaaja paaj” (1.260).

⁴ Bamënts biki ci bukun mëoliwa mtëb mun, ni ipafëni ngëlamp itëb yun; mul ni yul anats tsi bërun Ajug utsia.

⁵ Uci ñaan ŋal përo bukul ujuatsal, din bërua ka pëni di itum bukul, bë yoor ba ñaas biki bukul. Eey-e, uci ñaan ŋal përo bukul ujuatsal, unk di na ka run pëfiŋaa.

⁶ Bukul, bë ka pëyëlan pa përic batsi, usubal përits subi, tsi ngënu ngi ba ci ngi tsi pëcar leents ko wi keen ci wi. A ba kaand pëyëlan pa pëwíts mlik pëñaak, ni pëja ba ŋal, bu ka wëtani tsi utsia unjuatsia un ciwi-ba këci.

⁷ Uwal wi ba ba wi pëleents ko wi ba maatir wi bëlieng, din un jar wi kan payee wi pëpëni di baar-tsëko-unoor ka yërand bukul ukam, u kuk bukul, u fiŋ bukul.

⁸ Muum bukul ka bëra unk tsi tsëjëkëni bañaan di përaasa pëwiak pi kanjaka pi Sodooma ni Ejipët, tsi pënaamanaan; tsul kalon tsi Ajug bukul fiŋaa tsun di kruus.

⁹ Kaja kara bañaan, pëbuka, uliingu, ucaak, bañaan ka pëni pëteen muum bukul, aa ngënu ngëwaants ni umetaari, te muum bukul di ka niirana pëmooyaa.

¹⁰ Din bañaan tsi umundu ka lílan tsi uleka pëcäts bukul, bu kë juc ni ulílan, bu kë wëlar ngëtseend ni bacints bukul, par bayëlia batëb bamënts biki bu ro ka nooran mak ban ciina biki umundu.

¹¹ Maa, uwal wi ngënu ngëwaants ngëmënts ngun ni umetaari par wi, a uyafënts ubiira, un pëni wi tsi Nasien-batsi, niaj bukul a ba natsa anats. A bando bukunk ci tsi pëteen bukul lënk mak.

¹² Din a batëb ba maatir bukunk te përim pëwiak pëni di batsi a pa ja bukul: “Nda payee tsi!” A ba paya pëtsëp batsi tsi kasa, a iñaasar bukul kë teen bukul.

¹³ tsi uler umënts wun, a utsia siintsar mak, din a uja tsi ijara untaaja yi përaasa pëmënts pun, kaloole ka yër. A bañaan ngëmiil paaj ni ulon (7.000) fiŋa tsi usiintsar utsia. A banduka biki lënk mak, a ba rëmban Nasien-batsi batsi.

¹⁴ A unjuatsia utëbantsan par; unjuatsia uwaajantsan ka bi wink tsi ko un car wi!

Uluur upaajantsan ni ulon

¹⁵ A uwaanju upaajantsan ni ulon futs uluur, din a irim iwiak tea di batsi a yuu ja: “Pësien umundu aruka ci pi Ajug nja ni pi Këristuul, a nuu sien pa sandëndën!”

¹⁶ A bajëŋal ngëntaaja ngëtëb bukun ni babaakër, bukul ban tsoar biki tsi bërun Nasien-batsi tsi itsoari bukul i pësien, yër alëm ngërostu bukul, a ba jintëla Nasien-batsi,

¹⁷ a bu kë ja: “Ajug, wi Nasien-batsi, wi Kayëlan-bëlieng, wi nan ci, wi nandoi ci ba! Wund ka baranu, par m piban pëyëlanu pëwiak, a m natsan pësienu.

¹⁸ Ngëcaak akulëñ, a uriabu baandi wink; aci uwal pëwat bacäts pëleents, pëluumpan baleempu, un ci wi, bayëlia, ni bayëman, ni ba rëmban biki katimu, baties ni bawiak; aci uwal wi kë ba wi ni bacok utsia.”

¹⁹ Din a kato-kayëman Nasien-batsi di batsi waantsar, a unkes karo-pëlooleul wina di katoul kayëman. A ilikajan kë tibusar, a irim kë tea, ni impalambamb, ni usiintsar utsia, ni usubal isa-ngëlaas.