UPIBAN 1 - KARÚK-PËRIM KAWALU Nouveau Testament

Ujuundi

¹ Upiban Yeesu Këristu, wi Nasien-batsi wëlul wi pa pëpibanaan baleempul ngan ka ngi pëbaandi, tsi ko un car wi. Atsu wul a u mea, bi na yëli bi uwaanjuul tsi naleempul, Joŋ;

² a Joŋ leents ko wi na win wi ba këwin, un ci wi, përim Nasien-batsi ni ko wi Yeesu Këristu maatir wi a na leents.

³ Anaak, nan kati përim a nuu layir irim tsi uleka ko un car wink aleentsaa; a ba naak, ban ci biki tsi pëcikëndën wul a ba mob tsi ngan picana ngi tsi wul! Par uwal awokani.

Kawël-mboos, ni ubëndan

⁴ Joŋ, pa iriisia paaj yun ni ngëlon, di Aasia: Bëtseend ba wëlaan ind ni pëfac, pëpën-ni tsi nan ci, a na ro ci, a nuu bi; ni pëpën-ni tsi Ngëwejats paaj ngun ni ulon ngan ci ngunk tsi bërun pëtsoariul pi pësien;

⁵ ni pëpën-ni tsi Yeesu Këristu, nul nan ci na maatiri a na mob tsi përim, nan cakësi pënatsee tsi bacäts, nawiak ban ci biki basien umundu. Nul na ŋalinjai; a ni pëñaakul a na pënani nja tsi ngëjuban nja

⁶ a na tsu nja a ngë ci pësien, a ngë ci bajakan pa Nasien-batsi, Asinul: Përëmb ni pëyëlan aci pa nul, pa sandëndën. Ameen!

⁷ Teenan-e! Ka bi unk tsi isa, bañaan bëlieng ka winul, ŋal ba luŋanul biki uliaf; këbuka bañaan bëlieng tsi umundu ka kaanul. Eey-e. Ameen!

⁸ Ajug, un ci wi Nasien-batsi, aja: “Nji n ci-un Alfa ni Omeega, nan ci, a na ro ci, a nuu bi, Kayëlan-bëlieng.”

Bi Këristu pibandari bi tsi Joŋ

⁹ Nji Joŋ, nan tsaari ni ind, acints ind tsi unoor, ni tsi pësien, ni tsi pëtambandar tsi Yeesu, man ci di unjiu Patëmos, undo përim Nasien-batsi ni pëleents uleka Yeesu.

¹⁰ tsi unu Ajug, a n ci tsi uwejats, a n te tsi ufets nji përim pëwiak leents unk pi uluur,

¹¹ aja: “Ko wi kë win wi, picani wul di ulon ulibëru, kë wëtan wul pa iriisia paaj yun ni ngëlon: Pa Efeesu, pa Sëmirna, pa Peergamu, pa Tiatiira, pa Sardis, pa Filadeelëfia, ni pa Laodiseeya.”

¹² A n witsësa, pëteen ni ka ñakanaani. Uwal wi n witsësa wi, a n win ipafëni ngëlamp, paaj ni kalon, i leempëna yi uwëru.

¹³ tsi pëncuaf ipafëni ngëlamp, a u naam unk tsul Abuk ñaan-najin; atiema kaŋí kan bandul ki iyots, a na tana katël uwëru tsi bëjinc.

¹⁴ Beenul ni uweelul afaac unk pi imuets-ibeñ, pi kasa; a këkësul naam unk kandiamënt bërua.

¹⁵ Iyotsul anaam unk kaŋí katsak jank kun bërua di ufurnu; a përimul naam unk uleentsar mlik mcum.

¹⁶ Atsij ngëpesaj paaj ni ulon tsi kañanul kariir, a ulaac ujulal un tsij wi ngëre ngëtëb kë pëni di mtumul. Urostuul anaam unk unu ka fiets wun, uwal wi u pe wi pëfiets.

¹⁷ Uwal wi n winul wi, a yër tsi iyotsul pi man cats. Maa a na paf kañanul kariir tsi nji, a na ja: “Cats lal; nji n ci-un Nacak ni Natuami,

¹⁸ ni Nayësal; mando n cats, maa nji n ci ink nayësal pa sandëndën. Nji n tsijëna un inigësaani pëcäts ni yi mcats.

¹⁹ Bi u ci bank, picani ngi m win ngi, ni ngan ci ngi, ni ngi kan baandi ngi upar ngëmënts ngun.

²⁰ A un doots wunk mea, wi ngëpësaj paaj ngun ni ulon, ngi m win ngink tsi kariir nji, ni ipafëni ngëlamp, paaj yun ni kalon, i leempëna yi uwëru, ko umënts ci wun wi: Ngëpesaj paaj ngun ni ulon, aci ngëwaanju Ngëriisia paaj ngun ni ngëlon; a ipafëni ngëlamp, paaj yun ni kalon, aci iriisia paaj yun ni ngëlon.”