TIITU 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Pol, naleempar Nasien-batsi, Napostolu Yeesu Këristu, pa pëtsiji uwak tsi biki Nasien-batsi rat biki, ni kame ucär ki kan tsu ki ñaan pëlënk Nasien-batsi;

² aci uwak ni ume, ngan ciina ngi tsi uwats ubiira un dits wi ka ba, wi Nasien-batsi kandi-katsup watsan wi bañaan, te ngëwal netse ro ci.

³ Nul, tsi ngëwal ngan yecisa ngi, apibanaan përimul, tsi kaleents-përim ki wëlaa ki, bi Nasien-batsi tsu bi, nul Nabueran inja.

⁴ Pa Tiitu, napäts nji nacär tsi uwak un bofaraa wi: Bëtseend ba wëlaanu ni pëfac, pëpën-ni tsi Nasien-batsi, Asin nja ni tsi Këristu Yeesu, Nabueran nja.

Ubiira nan tsuee najëŋal tsi Ngëriisia

⁵ Man duku di Këreeta, undo ko wi: pa wi pëtuam pënatsan nganduka ngi a baats pënatsana, ni pëja di kara përaasa kë tsu bajëŋal, bi tsuu bi përo:

⁶ najëŋal, aka pëci nan kaatsi ulaci, na nimëni ŋaats naloole. Në ka upäts ba uwak biki, te bë ri ka jakaa bë ci tsi ubiira u mabats wi, oo bë ci barika-ro ko un jaka wi.

⁷ Par nawaay-bañaan, nul nagaangana ngi Nasien-batsi, aka pëci nan kaatsi ulaci. Di ka tamb ulats, di ka car uriab, di ka tsu ibats tsi karaan-pëwat, di ka tsas ukam, di ka tsas bëka ban kawarën bi.

⁸ Maa aka pëci nawelan-batsooŋ, naŋal-uwar, natsëkal, namabal, nalënk-nasien-batsi, namob-beenul,

⁹ naliincandar tsi përim uwak pa mab pi tsi bëjukan. Unk në yëlan puu liinc-liincan ngëwaas bañaan tsi bëjukan bëwar, ni puu ja biki kan pok biki bul, në piban bukul ba lac.

Bajukan-ulua, batsup

¹⁰ Par bacumal, bë ci barika-ro ko un jaka wi, bañakan ngëñakan ngan kaats ngi bëkat, bafäl-bañaan, apeena tsi biki kawela-kambac.

¹¹ Bu ka përicaa itum, par bë ja ba roon bu kë cok bañaan bëlieng di ito, tsi puu jukan ngan kaats ngi pëjukana; bu koo ro ank, pa pëka bëka ban kawaran bi.

¹² Nalon tsi bukul, nayëlia bukul bërierul, aja: “Bañaan Këreeta, bë ci ba nja biki ba roon bu kë tsup, bukul ngë n jar ngëjuatsal, bawaamal a ba ciind batsuunk-uleemp.”

¹³ Te un jaka wank, aci ucär. Wul ka wun, leentsari bukul ni përim pëtamb, pa u tsu bukul pëka uwak un ci wi ucär.

¹⁴ Din ba rits mob nin tsi itëtan Bajudeu, nin tsi ngëts ua bañaan ban bër biki ucär.

¹⁵ Pa bajëntsal, ngëko bëlieng ajënts. Maa pa batsopal, bawakats, kaats ko un jënts wi, par uwejats bukul ni ume-kabats bukul atsop;

¹⁶ bë ja ba roon bu kë ja bë me Nasien-batsi ank; maa tsi ngi bu kë ro ngi, bë niiraantsul. Bë ci bañutsanuel, barika-ro ko un jaka wi, bayëlaants përo nin ko u wara wi.