ROOMA 8 - KARÚK-PËRIM KAWALU Nouveau Testament

Ubiira tsi Uwejats

¹ tsi inkri, nin pëlon pëlacana cits pa ban ci biki tsi Këristu Yeesu.

² Par ngëtsua Uwejats, wi ka wël wi ubiira tsi Këristu Yeesu, afacanu tsi ngëtsua ujuban ni wi pëcäts.

³ Par ko wi ngëtsua roots wi yëlan përo, undo bi uliaf tsu bi wul kakaats-pëyëlan, Nasien-batsi aro wul, bi na wëtani Abukul bërierul tsi bënaam uliaf ujuban, a na lacan ujuban un ci wi tsi uliaf,

⁴ pa bëmabal ban ci bi tsi ngëtsua pëci ba band bi tsi nja; n ja ban dits biki ka yandaar tsi uŋal uliaf, maa tsi Uwejats.

⁵ Par biki uŋal uliaf tsijëna biki, bu ka mob tsi ngëko uliaf; a biki Uwejats tsijëna biki, bu ka mob tsi ngëko Uwejats.

⁶ Par ko wi uŋal uliaf kë yimpara wi, aci pëcäts; a ko wi Uwejats kë yimpara wi, aci ubiira ni pëfac.

⁷ Wul ka wun, ko wi uŋal uliaf kë yimpara wi, aci pëñaas Nasien-batsi, par wul di ka niiran ngëtsua Nasien-batsi, a yëlats koon përo ko wan.

⁸ Ban ci biki tsi uŋal uliaf, bë yëlats pëci biki Nasien-batsi kë lílandër biki.

⁹ Ind nda cits tsi uŋal-uliaf, maa nda ci tsi Uwejats, uci bi Uwejats Nasien-batsi ciina bunk di ind. A uci ñaan tsijats Uwejats Këristu, nul cits niicul.

¹⁰ Uci Këristu ci di ind, tsi ucär uliaf a cäts undo ujuban; maa uwejats aci ubiira, undo bëmabal.

¹¹ A uci Uwejats na natsani unk Yeesu di bacäts ci di ind, a nul na natsani unk Yeesu di bacäts ka tsu un buts ngëliaf ind ngan cats ngi, nga ka ubiira tsi Uwejatsul un ci wi di ind.

¹² A unk buts batsaar ni nji, ngë ci tsi batsiats, maa cits pa pëci tsi uŋal uliaf, pa n ja pëwama ka ro ko wi uliaf ŋal wi.

¹³ Par uci nda ci tsi përo uŋal uliaf, ndë cats; maa uci tsi Uwejats a nda tsu ngi uliaf kë ro ngi a nga cäts, ndë ka ubiira.

¹⁴ Par biki Uwejats Nasien-batsi kë tsëpand biki, bë ci babuk Nasien-batsi.

¹⁵ Par cits uwejats pëluek wi nda yank wun, wi kan tsu ind wi kak tsi bëlal; maa nda yank Uwejats un tsu ind wi a nda ci babuk, a tsi wul tsi nja kë liëna tsun koo ja: Aba, Paapa.

¹⁶ Wul Uwejats umënts wi bërier wul, aleents ni uwejats nja ngë ci upäts Nasien-batsi.

¹⁷ A uci ngë ci upäts Nasien-batsi, ngë ci barukanda, barukanda ngi Nasien-batsi, barukanda ni Këristu. Uci bi ngë bof bink tsi unoorul, n ja kee bof buts tsi përëmbul.

Përëmb pi kan bi pi

¹⁸ Nji man wejats a nja, ngënoor uwal inkri wi di ka jaaka ni përëmb pi kee pibana pi tsi nja.

¹⁹ Ngan leempa ngi, ka lip ni pëcësa upibandar babuk Nasien-batsi.

²⁰ Par ngan leempa ngi atsua tsi kakaats-bëkat, cits undo uŋal ngul, maa undo nan tsui ngul ko wan; tsi uwats,

²¹ ngul bërier ngul pii facana tsi pëluek pi kan cok pi, pa ngul pëka ko tsi pëfacana përëmb upäts Nasien-batsi.

²² Par ngë me ne, nga leempa ngi bëlieng awama ka ti, a nguu miira ni urear uliaf-kabuk, te pënak pëntsa.

²³ A cits ngul rin, maa ŋal nja buts ba yank biki kafa kacak ki Uwejats, unk buts di nja kë ti run tsi nja bërier nja pa pëlip utsua n ja pëci babuk Nasien-batsi, ubuerana ngëliaf nja.

²⁴ Par aci tsi uwats tsi ngë buerëna tsun. A uwats u wina wi, katse ci uwats; par ko wi ñaan win wi, um bi nu wats bun wul?

²⁵ Maa ucnja kë lip ko wi ngë winats wi, nja ka tambandar tsi pëlip wul.

²⁶ Unk buts di Uwejats kë tsënk nja run tsi bërafal nja par nja ngë meets bi u ka bi pëñaanaa; maa Uwejats wul bërier wul ka ñaandar nja wun tsi pëti, pan dits pi ka cilani irim.

²⁷ A ni kan teeni ngëwaas bañaan ame utsaag Uwejats; wul tsi uŋal Nasien-batsi, ka ñaandar wun ba uwak biki tsi yeesu.

²⁸ Nja ngë me ne, ngëko bëlieng abof uleemp pa uwar ba ŋal biki Nasien-batsi; ban duee biki tsi uŋalul.

²⁹ Par biki na me biki ki ujuundi, a na car ayecis bukul buts pa ba ci pi bënaam Abukul, nul në ci bajan tsi biki ba tsaar biki bacumal.

³⁰ A biki na car biki ayecis, na rui buts bukul; a biki na rui biki, na tsu buts bukul bamabal; a biki na tsu biki bamabal, na rëmban buts bukul.

Kaya kape: Nasien-batsi aci pa n ja

³¹ A we wnja kë ja wun tsi uleka ngëmënts ngan? Uci Nasien-batsi ci pa n ja, yën ka natsare n ja un?

³² Nul na laaŋats Abukul bërierul, maa na wëlul undo n ja bëlieng, a um bi na rits bun ka wël ngëko bëlieng bëlukats, pa n ja ni Abukul?

³³ Yën ka tumtsar un biki Nasien-batsi rat biki? Nasien-batsi ka tsu un ñaan na ci namabal.

³⁴ Yën ci-un nalacan? Aci Këristu nul nan cätsi; oo andes nul na natsee di pëcäts, a na tsoar tsi kariir Nasien-batsi a nuu ñaanar nja.

³⁵ Yën ka patsës n ja un ni bëŋal Këristu? Unoor-a? Ane unjuatsia-a? Ane pënoor-noorana-a? Ane ubon-a? Ane bëruent-a? Ane bëjuats-a? Ane ulaac-a?

³⁶ Bi u picana bi aja: “Undou ka wun wund tsua tsi pëcäts unu upëban, a wund tsuaa pi ngënkanel di tsëfiŋëni.”

³⁷ Maa tsi ngëmënts ngan bëlieng, ngë par pëjaa ngë ka kape, tsi na ŋal njai.

³⁸ Par tsi ucär, man me ne nin pëcäts, nin ubiira, nin ngëwaanju, nin pëyëlan ngëcaay, nin uwal wi, nin uwal wi kan bi wi, nin pëyëlan pan ci pi-ba këci,

³⁹ nin unatsar, nin uwandar, nin ulon ko uleempa wi këleempa, yëlants pëpatsës nja ni bëŋal Nasien-batsi, ban ci bi tsi Këristu Yeesu, Ajug nja.