ROOMA 7 - KARÚK-PËRIM KAWALU Nouveau Testament

Bëjukan ba naamanaana bi bënim

¹ Ind batsaar ni nji! Mán ñakanaan bañaan ba me biki ngëtsua uwar; nda meets ngëtsua ka pëyëlan tsi ñaan uwal wi na wama wi ci nayësal-a?

² Unk buts ŋaats na nimee, ngëtsua mobulanul ni ayën uwal wi ayën wama wi ci nayësal; maa uci ayën cats, ŋaats apën tsi ngëtsua u mobulanul wunk ni ayën.

³ A uci uwal wi ayën wama wi ci, na ruka ci ni nalon niints, në jakaa aci naro-mjubi; maa uci ayën cats në fac ngëtsua bënim, ŋal në nima nalon niints, di ka jaka aci naro-mjubi.

⁴ Unk ind buts batsaar ni nji, bi nda bof bunk tsi uliaf Këristu, nda cäts tsi uleka ngëtsua, pa ind pëci biki nalon, na natsee unk di bacäts, pa nja pëtsij mbuk pa Nasien-batsi.

⁵ Par uwal wi ngë ro wi ci tsi uŋal uliaf, ngi ujuban kë rí ngi, ngi ngëtsua tsu ngi tsi nja ngul ka leemp ngun tsi incimëntsu ngëliaf nja i buk mbuk pa pëcäts.

⁶ Maa inkri ngë pënana tsi ngëtsua, par ngë cats uleka ko undo wi mob inja tsi pëluek; wul ka wun nja kë leemparaan Nasien-batsi tsi bëci buwalu tsi Uwejats, katse ci tsi bëci bëpic bëjon.

Ulua, ni ujuban

⁷ A we wnja kë ja wun inkri? Wël ngëtsua aci ujuban-a? Nin-a! Maa nji man meena ujuban tsi ngëtsua; unk nji n bitse ka me ko un ci wi karí-ko, uci ngëtsua roots ja: “M di kë rí ko ñaan.”

⁸ Maa wul ujuban amobaraana tsi utsua, a u wamb ngë koraar karí-ko kan ci ki di nji; par tsi ngëtsua cits tsi, ujuban a cäts.

⁹ Nji uwal ujon, ngëtsua cits, a n ci; maa uwal wi ngëtsua baandi wi, a ujuban ka ubiira,

¹⁰ a nji a n cats: Utsua undo wi ka pëtsiji ubiira, awin u tsiji pëcäts.

¹¹ Par ujuban amobaraana utsua, a u falin; a tsi wul, u fiŋin.

¹² Ulua, wul ayëman; a utsua yëman, u mab a u wara.

¹³ Ane ko uwar ruka wun aci pëcäts pa nji-a? Nin-a! Maa wul ujuban, wël pëpiban u ci ujuban, a u tsu uwar un ci wi di nji u buk pëcäts; pa tsi utsua, ujuban ka ruka baar pëci ujuban.

¹⁴ Par ngë me ne ngëtsua aci uwejats, maa nji a n ci tsi uŋal uyamats a n waapa tsi pëluek ujuban.

¹⁵ Par nji bërierin, in meets ko wi ndu ndo wi; cits ko wi n ŋal wi, wi ndu ndo wun, maa wi n ñaas wi.

¹⁶ A uci ndu ndo ko wi n ŋalats wi, man niiran ngëtsua, a n win u wara.

¹⁷ Inkri, katse ci nji ka ndo un ko wan, maa aci ujuban un ciina wi tsi nji.

¹⁸ Par man me ne, tsi nji, un ci wi tsi uliaf nji, nin ulon ko u wara wi cits tsi nji.

¹⁹ Par nji, uwar wi n ŋal wi, man ja ndoon in di ka ndo wul; a uwutsëtsuel wi n ŋalats wi, man nja doon ka ro wul.

²⁰ A uci ndu ndo ko wi n ŋalats wi, katse ci nji ka ndo un wul, maa aci ujuban un ciina wi tsi nji.

²¹ Man win ngëtsua wi ci tsi nji: Uwal wi n ŋal wi përo uwar, uwutsëtsuel ka ci tsi nji.

²² Par tsi bëci nji tsi uwejats, man nja ndoon ka n lílandër ngëtsua Nasien-batsi;

²³ maa ma win ngëtsua ulon tsi incimëntsu uliaf nji, wi kan kaman wi ngëtsua un ci wi tsi uwejats nji, a u tsuin pëci naluek tsi ngëtsua ujuban un ci wi tsi incimëntsu uliaf nji.

²⁴ Ko wi n ci wi ñaan-najin nan juatsani! Yën ka pënanin un tsi uliaf pëcäts wi?

²⁵ Nasien-batsi na baranaan tsi Yeesu Këristu, Ajug nja! Tsi inkri, man ci naluek ngëtsua Nasien-batsi tsi ume, maa man ci naluek ngëtsua ujuban tsi bëci uliaf.