ROOMA 6 - KARÚK-PËRIM KAWALU Nouveau Testament

Pëcäts tsi uleka ujuban, pëci nayësal tsi Këristu

¹ A we wnja kë ja wun? Nja ka mob tsi ujuban pa bëtseend pëwatsësar-a?

² Nin-a! Nja ban cäts biki tsi ujuban, um bi ngë ci bun bayësal kak tsi wul?

³ Ane nda meets ne n ja bëlieng ba mijana biki tsi Yeesu Këristu, aci tsi pëcätsul tsi ngë mijanaana tsun-a?

⁴ Wul ka wun, ngë mooya ni nul tsi undo bëmijana pëcätsul, pa bi Këristu natsanee bunk di bacäts tsi përëmb Asin, unk buts di nja kë yandaar run buts tsi ubiira uwalu.

⁵ Uci bi ngë ruka bink abofëlar ni nul tsi bënaam pëcätsul, unk buts di nja kii ci run tsi bënaam kanatsee-di-pëcätsul.

⁶ A ko wi, wi ngë ka wun pëme: Bëci nja bëjon arieŋa di kruus ni Këristu, pa uliaf ujuban pëcoka, unk ngë katse ka ci baluek ujuban;

⁷ par ñaan nan cätsi afac tsi ujuban.

⁸ Maa, uci bi ngë cats bink ni Këristu, ngë wak n ja kii yës buts ni nul,

⁹ par ngë me, bi Këristu natsee bunk di bacäts, nul katse ka cäts; pëcäts katse ka pëyëlan tsi nul.

¹⁰ Par bi na cäts bunk, aci tsi uleka ujuban wi na cätsar wun uyaas uloole pa sandëndën; a bi na ci bunk buts nayësal, aci Nasien-batsi ni na yësar un.

¹¹ Unk ind buts, nda tsuun tsi ibats ind nda cäts tsi uleka ujuban, a nda yës pa Nasien-batsi tsi Këristu Yeesu.

¹² Wul ka wun, ujuban tsë ka pëyëlan tsi ngëliaf ind ngi kan cats ngi, pa ind pëmob tsi ngëko ngi u rí ngi.

¹³ Nin ind tsë wël incimëntsu ngëliaf ind, i ci incimëntsu karo ngëko kamabats tsi ujuban; maa nda ci bërier ind pa Nasien-batsi, pi bañaan bayësal ba natsee biki di bacäts, ndë wël incimëntsu ngëliaf ind, i ci incimëntsu karo ngëko bëmabal tsi Nasien-batsi.

¹⁴ Unk, ujuban di ka ka pëyëlan tsi ind, par nda cits tsi ngëtsua; maa tsi bëtseend Nasien-batsi.

Pëci baluek tsi bëmabal

¹⁵ Inkri we wnja kë baaraan wun? Nja ka juban undo bi ngë cits tsi ngëtsua, a ngë ci tsi bëtseend Nasien-batsi-a? Nin-a!

¹⁶ Nda meets ne, bi nda niiran bunk pëci baluek, a nda mob tsi pëleempar ñaan, nda ci baluek ñaan ni nda mob unk tsi pëleempar; u ru ci ank ujuban wi kan tsu wi ñaan na cäts, oo pëmob tsi përim Nasien-batsi pi kan tsu pi ñaan na ci namabal.

¹⁷ Ngë ja Nasien-batsi baran! Ind ban do biki ci baluek ujuban, maa, nda niiran di ngëwaas ind bëlieng bëjukan ba naam bi ni bi nda wëla bi.

¹⁸ Ind nda facana tsi ujuban, a nda ruka ci baluek tsi bëmabal.

¹⁹ Mán ñakan këñaan-bajin undo bërafal ngëliaf ind. A bi nda ro bunk wël incimëntsu ngëliaf ind i ci tsi pëluek tsi karo ngëko ngëtsopal ni tsi kamobats tsi ngëtsua ki kan tsu ind ki pënatsara pëkaman Nasien-batsi; unk buts, nda tsuun incimëntsu ngëliaf ind, i ci tsi pëluek tsi karo ngëko bëmabal pa pëtsu ind pëci ba yëman biki.

²⁰ Par uwal wi nda ro wi ci baluek ujuban, nda fac tsi ko wi bëmabal tsu wi.

²¹ A tsi utuami, buom bëkat bi nda ka bun? Aci ngëko ngi nda kawara ngi inkri, par utuami ngul aci pëcäts.

²² Maa inkri, bi nda facana bink tsi ujuban, a nda ruka ci baluek Nasien-batsi; ko wi ndu buk wi inkri aci bëjëntsal, tsi utuami u ci ubiira un dits wi ka ba.

²³ Par bëluk ujuban, aci pëcäts; maa utseend Nasien-batsi u lukaatsa wi, aci ubiira un dits wi ka ba, tsi Këristu Yeesu, nul Ajug nja.