ROOMA 5 - KARÚK-PËRIM KAWALU Nouveau Testament

Ñaan-najin atsua namabal undo uwak, a na ka pëfac tsi Nasien-batsi

¹ Inkri, bi ngë tsua bink bamabal tsi uwak, ngë kaana pëfac tsi Nasien-batsi undo Ajug nja Yeesu Këristu.

² A tsi uwak tsi Yeesu Këristu tsuuna nja tsun pëtsënkan bëtseend bi ngë mobëna bink aliincan; a tsi bul tsi ngë tsuuna tsun mbëndandar nja tsi uwats përëmb Nasien-batsi.

³ Cits umënts wan din, maa nja ka tsu buts mbëndandar nja tsi unoor; a ngë me unoor kë tsiji pëtambandër,

⁴ a pëtambandër kë tsiji bëmabal tsi mteenamana, a bëmabal tsi mteenamana kë tsiji uwats.

⁵ A wul uwats di ka fal ñaan, par Uwejats-ujënts wi ngë wëla wi, atular bëŋal Nasien-batsi di ngëwaas inja.

⁶ Par nul Këristu, uwal wi ngë wama wi ci barafal, na cätsar bameets-nasien-batsi, tsi uwal un jaaka wi.

⁷ Aci ko u ñats wi, ñaan pëcätsar namabal; ulon ñaan nalon ka yeents pëcätsar ñaan na waree uwaas.

⁸ Maa iink di Nasien-batsi piban dun bëŋalul pa n ja: Bi ngë wama bi ci bajuban, Këristu catsar inja.

⁹ A tsi inkri bi pëñaakul tsunjabink bamabal, andes nul pëbuerani nja uriab Nasien-batsi.

¹⁰ Par uci bi ngë ro bi ci iñaasar Nasien-batsi, a pëcäts Abukul tsu nja a ngë kak ateelar ni nul, andes, bi ngë kak bink ateelar ni nul, ubiiraul ka bueran inja.

¹¹ Cits umënts wan din, maa buts, ngë bundandar tsi Nasien-batsi undo Yeesu Këristu, Ajug nja nan kai ngë kak ateelar inkri ni Nasien-batsi.

Adam ni Yeesu Këristu

¹² Wul ka wun, bi ujuban niajëni bunk tsi ñaan naloole baŋ tsi umundu, a tsi undo ujuban pëcäts baandi, a unk di pëcäts yaana run bañaan-bajin bëlieng, par bañaan bëlieng bu juban.

¹³ Par ngëtsua aruka ka ci, ujubando ci ba tsi umundu; maa wul ujuban tsuaatsa ko par ngëtsua netse ro ci.

¹⁴ Maa pëcäts sien ki uwal Adam te tsi Moises, unk ŋal tsi bandoots biki ujuban tsi kaguus-ko ka naam ki ni ki Adam, nul nan ci bënaam nan kai pëbi.

¹⁵ Maa utseend u wëla wi bëlukats cits pi ulaci. Par uci ulaci ñaan naloole baŋ ka wun bañaan bacumal cats, andes bëtseend Nasien-batsi ni utseend u wëla wi bëlukats, un ci wi tsi ñaan naloole baŋ, nul Yeesu Këristu ape pëka bëkat tsi bañaan bacumal.

¹⁶ A utseend yëlants pëjaaka ni ujuban wi ñaan naloole do wi; par kawat-pëleents apënë-ni tsi ujuban ñaan naloole, a ka tsiji pëlacana. A tsi ngëguus ngëcumal, utseend u wëla wi bëlukats tsij inja pëtsua bamabal.

¹⁷ Par uci tsi ulaci ñaan naloole baŋ, pëcäts sienëna tsi undo ñaan namënts un, um bi ban cum biki bëtseend apar-paran, a ba wëla utseend pëci bamabal dits run ka sien tsi ubiira, undo ñaan naloole baŋ, nul Yeesu Këristu.

¹⁸ A bi u ci bunk tsi undo ulaci ñaan naloole baŋ, a ulaci baandë-ni bañaan-bajin bëlieng; unk buts, ko umabal wi ñaan naloole baŋ do wi, a pëtsua bamabal pi ka wël pi ubiira baandi tsi bañaan-bajin bëlieng.

¹⁹ Par bi ñaan-najin naloole baŋ niiraants bunk përim, a bañaan bacumal tsuaa bajuban; unk buts di bañaan bacumal kë tsua run bamabal, undo bi ñaan-najin naloole baŋ niiran bunk përim.

²⁰ Maa wël ngëtsua abi pa ulaci pëwatsësar, a tsi ujuban kë watsësar tsi, bëtseend kë pe këpe pëwatsësar;

²¹ a bi ujuban sienëna bunk pëcäts, unk buts, tsi Yeesu Këristu Ajug nja di bëtseend sienëna run bamabal pa ubiira un dits wi ka ba.