ROOMA 4 - KARÚK-PËRIM KAWALU Nouveau Testament

Abraam atsua namabal undo bi na wak bi

¹ A we wnja kë ja wun Abraam atsënkan tsi uliaf, nul asin nja najon?

² Uci Abraam do tsua namabal undo ngëko ngi në ro ngi, në ro ka ko wi nuu rëmbandaraan wi, maa cits tsi bërun Nasien-batsi.

³ Maa we wi Bëpican ja wun? Abraam awak tsi Nasien-batsi, a uwak umënts wun tsuaul bëmabal.

⁴ A ni ka leempi, bëlukul wëlaatsa undo bëtseend, maa awëla bul undo bi na ka bi pëluka.

⁵ Maa nan ditsi ka leemp, a na wak tsi ni kan tsui bameets-nasien-batsi ba ci bamabal, uwak namënts un atsuaul bëmabal.

⁶ Unk buts di Dawid leents run uleka pënaak ñaan-najin ni Nasien-batsi tsuunatsi namabal tsi ngëko ngi nuu ro ngi. Iink di na ja run:

⁷ “Bë naak, biki ngëguus bukul jampësaa biki, a ngëjuban bukul kunda!

⁸ Anaak, ñaan ni Ajug tsuutsi ngëjubanul ko!”

⁹ A pënaak pëmënts pi, abi pa ba wela biki kambac baŋ oo pa ba wëlaatsa biki kambac buts-a? Par ngë ja: “Uwak ka wun Abraam tsuaa namabal.”

¹⁰ A um bi na tsuaa bun namabal? Bi na netse bi wela kambac oo bi na wela bi ba kambac-a? Cits bi na wela bi ba kambac, maa bi na netse bi wela kambac;

¹¹ a u ba, kajín kawela-kambac du wëlaul pi umarëka bëmabal, wi na kaana wi tsi uwak uwal wi na netse wi wela kambac. A unk di na ci run asin bañaan ba uwak biki bëlieng, ŋal bi ba welaatsa bi kambac, pa bukul buts pëtsua bamabal.

¹² Unk di na ci run buts asin ba wela biki kambac, a cits ban baar biki tsi kawela-kambac rin; maa ban depa biki iyots uwak wi Abraam ka wi uwal wi na netse wi wela kambac, nul asin nja.

¹³ Cits tsi ngëtsua, tsi Abraam oo kajërul wëlënaa tsun uwatsan pëci barukanda umundu, maa aci tsi bëmabal tsi uwak.

¹⁴ Uci ban ci biki tsi ngëtsua ci bukun barukanda, uwak kaats bëkat; a uwatsan cits ko.

¹⁵ Ulua ka tsiji uriab, a tsi ngëtsua cits tsi, kaguus-ko buts cits tsul.

¹⁶ Unk, uwatsan umënts wi aci-undo uwak, pa u ci bëtseend, uwatsan ka baar pëci tsi kajër Abraam bëlieng, cits pa biki ngëtsua baŋ; maa buts ban ka biki uwak Abraam, nul na ci asin nja bëlieng,

¹⁷ bi u picana bi aja: “Par man tsuu pëci asin bañaan bacumal.” Nul Abraam aciina asin nja tsi bërun ni na uwak, un ci wi Nasien-batsi ni kan tsui bacäts ba ci bayësal, a nuu tsu ngëko nga cits ngi, nga ci.

¹⁸ A bi na katse bi ka uwats, na wak; a unk di na ci run asin bañaan bacumal, bi u ro bi picana aja: “Unk di kajëru kë ci run.”

¹⁹ Abraam aruka ka ko pi ngëwaanu useent, maa rafats tsi uwak ŋal bi nu wejats bi uliaful bërierul ni Saara, nul nan ditsi ka buk, par bu wak ruka wokan pëcäts.

²⁰ Ŋal tsi kakaats-uwak Abraam, nul tsijënats ngëwejats ngëtëb tsi uleka ko wi Nasien-batsi watsan wi. A na liinc-liincana tsi uwak, a nu rëmban Nasien-batsi;

²¹ a na baar tsi pëwak u ci Nasien-batsi bërierul ka un pëyëlan, pëbandan ko wi watsana wi.

²² Wul ka wun, tsi undo uwak, Nasien-batsi tsuul namabal.

²³ Maa cits undoul rin ka wun u picana aja: “Atsuaa namabal”

²⁴ maa aci buts undo n ja, ban tsuaa biki bamabal, n ja ba uwak biki tsi na natsani unk Yeesu, Ajug nja di bacäts;

²⁵ nul na wëlee undo ngëjuban nja a na natsee di pëcäts undo n ja pëtsua bamabal.