ROOMA 3 - KARÚK-PËRIM KAWALU Nouveau Testament

Bëmabal Nasien-batsi

¹ We wi Najudeu kaana wun bëkat, oo we wi kawela-kambac kë roona wun?

² Arëmb mak, uci pëwejats tsi ngëko bëlieng. Ucak, aci bukul biki Nasien-batsi wël bukun irimul.

³ A u ci we? Uci balon mobats tsi përim, kamobats bukul tsi përim ka gar Nasien-batsi pëmob tsi përim-a?

⁴ Nin-a! Maa Nasien-batsi na yëkëraan na ci nacӓr, ñaan-najin nan ci ba këci, ka ci natsup, bi u picana bi aja: “Wi pëwina m ci namabal tsi irimu kë gaañaar uwatau pëleents.”

⁵ A uci kamabats nja ka kun bëmabal Nasien-batsi wina, we wnja kë ja wun? Mán ñakan këñaan-bajin, Nasien-batsi ci namabats uwal wi në tucan nja wi ni uriabul-a?

⁶ Nin-a! Bi u ci bank, um bi Nasien-batsi kë wat bun umundu pëleents?

⁷ Maa uci-undo bëtsup nji ka bun ucär Nasien-batsi cili mak pa përëmbul, we ka wun a n lacana pi man ci najuban?

⁸ A we ka wun a ngë ri ka ja: “Ngë ro ko u waraatsa wi, pa wul pëci ko uwar.” Balon bariat-ko aja unk di nja kë ja run; bukul bañaan bamënts bukun bu ka pëlacana.

Bañaan bëlieng aci tsi ujuban

⁹ Inkri we wnja kë baaraan wun? Nja Bajudeu, ngë ci ban pe biki-a? Nin a, tsi ngëko bëlieng. Par ngë piban ba ne, Bajudeu ni Bagërek, bë ci bëlieng tsi ujuban.

¹⁰ Bi u picana bi aja: “Namabal cits, nin ŋal naloole;

¹¹ Nin naloole na mei ko cits, nin naloole cits ni kan tsasi Nasien-batsi.

¹² Bañaan bëlieng awitsësa, bukul bëlieng bu kaats bëkat, nin naloole ni kan doi uwar cits, nin ŋal naloole cits.

¹³ Iyoori bukul aci pëbuk pa waantsa pi. Ni indiamënt bukul, bu kë fal bañaan; bunuunk uko-pëtsats aci tsi iruj bukul.

¹⁴ Itum bukul acum irim kacok ni iwaayal;

¹⁵ itsiim bukul acarar katul pëñaak,

¹⁶ pëniam ni unjuatsia aci tsi iga bukul;

¹⁷ a bëga pëfac, bu meets bul.

¹⁸ Pëlënk Nasien-batsi cits tsi këkës bukul.”

¹⁹ A ngë me ne, ko wi ngëtsua ja wi bëlieng, aja ko umënts wun pa bañaan ban ci biki tsi ngëtsua, pa itum bëlieng përumanaa, umundu bëlieng ka lac tsi bërun Nasien-batsi.

²⁰ Wul ka wun, nin ñaan di ka tsuaa namabal tsi bërunul, undo ngi në ro ngi tsi ngëtsua; par tsi ngëtsua, tsi kame ujuban pënë-ni tsun.

Bëmabal tsi uwak

²¹ Maa inkri, pëteenënats tsi ngëtsua, bëmabal Nasien-batsi apibandar; ngëtsua ni bayëlia aleents uleka bul.

²² Nasien-batsi ka tsuuna bañaan pëci bamabal tsi uwak tsi Yeesu Këristu. Aro unk bañaan ba uwak biki bëlieng. Ngëkicës cits tsul,

²³ par bañaan bëlieng ajuban a ba laaŋa përëmb Nasien-batsi;

²⁴ a ba tsuunaa pëci bamabal tsi bëtseendul, bëlukats, undo pëfacana pan ci pi tsi Këristu Yeesu.

²⁵ Nul ni Nasien-batsi tsu un, pa pëñaakul pëci ujampësaani ngëjuban tsi uwak; pa nul Nasien-batsi pëpiban bëmabalul undo bi na wët bi pëpikaar bañaan tsi ngëjuban ngandola ngi uwal ujon,

²⁶ tsi uwalul wi umiira. A na piban bëmabalul tsi uwal wi, pa nul pëci namabal, në ciind namaban ñaan na wak tsi Yeesu.

²⁷ Bi u ci bank, a mdëmbandar ci tsum? Mul apënanaa. Apënanaana ngëtsua uwom? Wi ngër -a? Nin a, maa tsi ngëtsua uwak.

²⁸ Par ngë win u ci uwak ka tsu wun ñaan-najin në ci namabal, cits ngi ngëtsua tsu ngi përo.

²⁹ Ane Nasien-batsi ci ni Bajudeu baŋ-a? Cits buts ni ban cits biki bajudeu-a? Eey-e, nul aci buts ni ban cits biki Bajudeu,

³⁰ par tsi ucär, Nasien-batsi aci naloole baŋ, a nul ka tsu un ba wela biki kambac ba ciina bamabal tsi uwak; nul ka tsu un buts ba welaatsa biki kambac ba ciina bamabal tsi undo uwak.

³¹ Bi u ci bank, nja ka ba ni ngëtsua undo uwak-a? Nin-a! Maa, nja ka pe këpe pëliincan ngëtsua.