ROOMA 2 - KARÚK-PËRIM KAWALU Nouveau Testament

Ulaci Bajudeu

¹ Bi u ci bank, wi ñaan-najin ni m ci ba këci, a kë wat pëleents, m da n jats ulaci; par bi kë wat bunk balon pëleents, m ci tsi pëlacandar bërieru, par wi ni ka wat unk pëleents, m ja m doon këro ngëmënts ngun.

² Maa ngë me tsi ucär, biki kando biki ngëmënts ngan, Nasien-batsi ka wat bukul pëleents.

³ Cay ñaan-najin, wi ni ka wati biki kando biki ngëmënts ngan pëleents, a kë ro ngul; m ja ne kë buer tsi kawat-pëleents Nasien-batsi-a?

⁴ Oo m be përëmb kawara-uwaasul, ni pi umiiraul, ni pi karo-ngëwarul; nin m yëkëranats kawara-uwaas Nasien-batsi ci pa pëtsuu kë yaar ibats-a?

⁵ Maa bi m liinc bunk been, ni bi uwaasu dits bunk ka witsësa, m ci tsi pëwúkandar beenu uriab, pa unu uriab, wi kawat-pëleents Nasien-batsi kamabal kë pibandari wi,

⁶ wi nuu luk wi kara ñaan tsi ko wi na ro wi,

⁷ në wël ubiira un dits ka ba, pa biki kan tsasëna biki përëmb, ni përëmbana, ni karika-coka, tsi pëtambandër karo-uwar.

⁸ Maa uriab ni ukulëñ ka ci tsi baŋal ngëko bëlieng pëci ngiic bukul, a bu mobats tsi ucär, bu kë fets kamabats.

⁹ Unoor ni unjuatsia ka ci tsi ñaan ni ka doi ba këro ko u waraatsa wi, ucak tsi Najudeu, u rura ci tsi nagërek.

¹⁰ maa përëmb, ni përëmbana, ni pëfac, pa ciin tsi ni kandoi ba këro uwar, ucak tsi Najudeu, u rura ci tsi nagërek.

¹¹ Par pëkicës, cits tsi Nasien-batsi.

¹² Unk, ban juban biki bëlieng te bu kaats ngëtsua, bu ka niamëna tsi kakaats-ngëtsua; a ban jubanaan biki bëlieng tsi ngëtsua, bu ka watënaa pëleents tsi ngëtsua.

¹³ Par cits bacikëndën ngëtsua ci bukun bamabal tsi bërun Nasien-batsi; maa aci ba mob biki tsi përo ko wi ngëtsua ja wi, ci bukun bamabal tsi bërun Nasien-batsi.

¹⁴ Par, ban cits biki Bajudeu, bukul ban kaats biki ngëtsua, uwal wi bu kë ro wi ko wi ngëtsua ja wi, bukul ban kaats biki ngëtsua bë ci ngëtsua pa bukul bërier bukul.

¹⁵ Bukul bu piban uleemp ngëtsua picana di ngëwaas bukul, ngëwejats bukul apiban bukul ko umënts wan, a ngëtsaag bukul kë yankësar tsi pëtumtsar bukul ni pënatsar bukul;

¹⁶ a tsi Upetsan-uwar wi ndu n leents wi, unk di wii ci run, unu wi Nasien-batsi kë watëna wi bañaan-bajin pëleents tsi Yeesu Këristu, tsi ngëko kambeku bukul.

Kambac kacӓr

¹⁷ Maa u ci wi ni kanduee Najudeu, a m watsaraan tsi ngëtsua, wi ni kan bëndandari tsi Nasien-batsi;

¹⁸ wi na mei bëŋalul a m jukana ngëtsua, a kë yëkëran ngëko ngan ka ngi bëkat,

¹⁹ wi na watsari pëci bërieru natsëpand bakuel, pëci ufac ban ci biki di karëm;

²⁰ wi nakus bameets-ko, najukan upäts, a tsi ngëtsua, m ci pi m ka ume ni ucär;

²¹ a wi ni kan jukani balon, m di kë jukandar bërieru-a? Wi ni ka leents koo ja, m di kë kiej; a kë kiej.

²² Wi ni kanjai, m di kë ro mjubi, a kë ro mjubi! Wi na ñutsee icap, a kë kiej di irum yul!

²³ Wi ni kan bëndandari tsi ngëtsua, a kë kawaran katim Nasien-batsi tsi përo ko wi ngëtsua pok wi!

²⁴ Par iink di u pica run: “Undo ind ka wun katim Nasien-batsi kë karaa tsi ban cits biki Bajudeu.”

²⁵ Tsi ucär kambac aka bëkat, uci m mob tsi përo ko wi ngëtsua ja wi; maa uci m ci naro ko wi ngëtsua pok wi, kawela-kambacu ka witsa ka ci kawelaatsa-kambac.

²⁶ A uci ñaan na welaatsee kambac kë ro ngi ngëtsua tsu ngi, kawelaatsa-kambacul di ka winaa ka ci kawela-kambac-a?

²⁷ A na welaatsa unk kambac tsi uliaf kë ro ko wi ngëtsua ja wi, nul di kee watu pëleents-a? Wi na welee kambac, a m tsij bëpic, a kë ro ko wi ngëtsua pok wi.

²⁸ Najudeu nacӓr cits napibandar tsi bëci, a kawela-kambac kacӓr cits ki kan pibanaa ki tsi uliaf;

²⁹ maa Najudeu, aci nan ci-unk Najudeu di bametsuul, a kawela-kambac ci ki uwaas, kan pënë-ni ki tsi Uwejats; cits tsi bëpic. Namënts nun, cits bañaan-bajin ka rëmbanul bukun maa aci Nasien-batsi.