ROOMA 14 - KARÚK-PËRIM KAWALU Nouveau Testament

Cats lacan acintsu

¹ Nda niirani nan dafi tsi uwak, ind tsë lacanul tsi ibats i na tsij yi.

² Nalon ka wak na yëlan përe un ci wi-ba këci, maa nan dafi ka re ngëko uwoorta rin.

³ Ni kan dei ngëko bëlieng, nul tsë be nan ditsi ka re; a nan ditsi ka re ngëko bëlieng, nul tsë lacan ni kan dei, par Nasien-batsi aniiranul.

⁴ Wi m ci yën, pa pëlacan naluek nan citsi niicu? Na nats uu, na yër uu, umënts wan ajugul bërierul me un; maa ka nats, par Ajug aka pëyëlan pa pënatsanul.

⁵ Par, nalon ka wejats na ja ngënu patsëlar, nacints ka wejats ka ja ngënu naam kënaam. Kara ñaan, na baari pëwak ko wi na wejats wi tsi beenul.

⁶ Ni ka wejatsi ngënu, aro wul pa Ajug; a ni kan dei, are pa Ajug, par aja na roon në baran Nasien-batsi. A nan ditsi ka re, reets pa Ajug, a na ja na roon në baran Nasien-batsi.

⁷ Par kaats ñaan tsi nja ni ka yafëntsari beenul bërierul, nin kaats ni kan catsari beenul bërierul.

⁸ Par, uci ngë ci tsi pëyafënts, Ajug ninja kë yafëntsar un; a uci ngë cats, Ajug ni ngë catsar un. Bi u ci bank, ŋal ank nja kë yafënts uu oo ngë cats uu, ngë ci biki Ajug.

⁹ Undo ko umënts wun ka wun Këristu cats a na kaka kak ka yafënts; pa pëci Ajug bacäts, ni ba wama biki ka yafënts.

¹⁰ Maa wi, we ka wun a kë lacan ni nda tsaari? Oo we ka wun kë be ni nda tsaari? Par nja bëlieng nja ka jaankma di bërun kato kawat-pëleents Nasien-batsi.

¹¹ Par iink picana run: Ajug aja: “Man baajara ubiira nji, ijuul in ci yi ba këci, ka kuuja tsi bërun nji, a pëndiamënt pan ci pi-ba këci ka pets pa ja, man ci Nasien-batsi.”

¹² Unk, kara ñaan tsi nja ka leents ngi na ro ngi bërierul, tsi bërun Nasien-batsi.

Cäts tsu ni nda tsaari na yër tsi ujuban

¹³ Nja tsë kaka ja nan ci nu lacan bacintsul. Maa, nda wejatsi përits tsu nan tsaari ni ind na jontas, oo na yër tsi ujuban.

¹⁴ Ma me, a n baaraan pëniiran tsi Yeesu Këristu, u kaats ulon ko un tsop wi tsi bëci wul; uroko uci ñaa n ja tsi ibatsul wul atsop, din u tsop pa nul.

¹⁵ Par uci-undo kare-ko a m tsu ni nda tsaari a na juatsan, ande m katse m yandaar tsi bëŋal mantsaalar. Cäts tsu ni Këristu cätsari undoul na niam, tsi undo kare-ko.

¹⁶ Ind tsë wët ñaan na kar ko u wara ind wi;

¹⁷ par Pësien Nasien-batsi cits bariala ni përaan, maa aci bëmabal ni pëfac ni ulílan tsi Uwejats-ujënts.

¹⁸ Nan ci tsi pëleempar Këristu a nuu ro unk, Nasien-batsi ka lílandërul, bañaan-bajin ka niiranul.

¹⁹ Unk, nda ju ngë mob tsi pëfets ngëko ngi kan wël ngi pëfac, ni ngi kan tsu ngi ñaan në liinc-liincan acintsul.

²⁰ Cats cok uleemp Nasien-batsi, tsi undo kare-ko. Tsi ucär, ngëko bëlieng ajënts, maa waraatsa ñaan përe ulon ko wi kan tsui ñaan pëyër.

²¹ Awara përits re uyamats, nin përaan pëwat, nin përo ulon ko wi kan tsu wi ni nda tsaari, na jontas, [oo na yër oo na raf.]

²² Uwak wi m ka wi, gaangan wul tsi bërun Nasien-batsi. Anaak, nan ditsi ka lacandar tsi ko wi na wejats wi.

²³ Maa nan tsiji ngëwejats ngëtëb a na re, alacana, par ko wi na ro wi pënënatsi tsi uwak; a ko un pënënatsi wi ba këpënë-ni tsi uwak, aci ujuban.