ROOMA 13 - KARÚK-PËRIM KAWALU Nouveau Testament

Pëniiran ko wi pësien tsu wi

¹ Ñaan nan ci ba këci, aka pëniiran ko wi pësien tsu wi; par kaats pësien pan ci pi, a biinits tsi Nasien-batsi. A msien man ci mi ba këci, Nasien-batsi tsu un mul.

² Wul ka wun, na natsaree ko wi pësien tsu wi, apok ko wi Nasien-batsi tsu wi; a ban pok biki, bu ka yuuntsan iyeen bukul ulaci.

³ Par, bawiak ucaak, bu ri ka lalaa, uwal wi ñaando wi uwar, maa uroko uwal wi ñaan do wi ko u waraatsa wi. M ŋal përits lal pësien-a? Doan ko u wara wi, din pësien ka bëndanu;

⁴ par pul pësien aci tsi uleemp Nasien-batsi, pa uwaru. Maa uci m do ko u waraatsa wi, lalan; par pul di ka tsiji ulaac pa ko un kaats wi bëkat; undo pul aci naleemp Nasien-batsi, ni nalukan-pëkaw, pa pënooran ban ja biki ba roon bu kë ro ko u waraatsa wi.

⁵ Wul ka wun, ko wi pësien tsu wi aka pëniiranaa, cits undo pëlal pii tsua tsi unoor rin, maa, undo uwejats ind buts.

⁶ Undo ko umënts wi buts, ka wun ndu luk uraasa, par msien aci baleempar Nasien-batsi, a ma mob tsi përo uleemp umënts wi.

⁷ Bi u ci bank, kara ñaan, nda wëlanul ko wi nda ka wi pëwëlul: ni nda kai pëluk bacal, nda lukanul bacal; ni nda kai pëluk uraasa, nda lukanul uraasa; ni nda kai pëlënk, nda lënkanul; ni nda kai përëmban, nda rëmbaniul.

Pëŋal acintsu

⁸ Ind tsë tsiats ñaan nin ulon ko, ucits ba ind pëŋalëlar; par na ŋali acintsul, aro ko wi ngëtsua tsu wi.

⁹ Par ngëtsua ngi: “M di kë piintsand ŋaats na nimee, m di kë fiŋ ñaan, m di kë kiej, m di kë jaar ñaan ko un cits wi, m di kë rí ko ñaan,” a uci ulon utsua ci ba këci, ngul abaraana tsi përim pi: “Kë ŋal acintsu pi m ŋal pi beenu.”

¹⁰ Nan kai bëŋal di ka ro acintsul ko u waraatsa wi; wul ka wun, nan kai bëŋal, aro ko wi ngëtsua tsu wi bëlieng.

¹¹ Unk buts, ind nda me uwal wi ngë ciina wi: uwal baandi wink, pa ind pënatsee di bëŋooy; par pëbuer nja inkri, aruka wokani ape uwal wi ngë rura wunk uwak.

¹² Bërëm aruka tsëp ba, a pënak ka bi pink. Nda ju ngë wëtan ngëko ngi kandola ngi tsi karëm; nda ju ngë tiema iŋi ufac ikamanaani.

¹³ Nda ju ngë yandaar tsi bëmabal, pi ñaan ni ka yandaari tsi pënak ndakaŋ; ind tsë mob tsi buwaamal ni ukuj, nin ind tsë mob tsi mampiintsandar ni karika-kawa, nin ind tsë mob tsi pëŋom ni mankocar.

¹⁴ Maa, nda tiemaan Yeesu Këristu, Ajug; ind tsuuts fierand ngëko ngi uliaf kë rí ngi, nga waraatsa ngi.