ROOMA 10 - KARÚK-PËRIM KAWALU Nouveau Testament

Bajudeu bër bëmabal Nasien-batsi

¹ Batsaar ni nji, uŋal uwaas nji uwar, ni bëñaan bi n ja bi n doon koo ñaan Nasien-batsi pa bañaan Israel, aci pa bukul pëbuer.

² Par, nji mán leents uleka bukul a nja, bë yëkandar Nasien-batsi, maa cits ni ume ucär.

³ Undo bu meets bëmabal Nasien-batsi, bu kë tsas pëtsu iyeen bukul bamabal, a bu niiraants bëmabal ban pënë-ni di Nasien-batsi.

⁴ Par utuami ngëtsua, aci Këristu, pa bëmabal pëci pa na waki ba këwak.

⁵ Moises apican uleka bëmabal ban pënë-ni bi tsi ngëtsua, aja: “Ñaan nan doi ngëko ngëmënts ngi, tsi ngul tsi nuu kaana tsun ubiira.”

⁶ Maa uleka bëmabal ban pënë-ni bi tsi uwak, iink ri na ja run: “Cats yepar di uwaasu ja: ‘Yën ka paya un batsi?’ Umënts wun aci pëwelani Këristu;

⁷ oo: ‘Yën ka wela un di baar-tsëko-unoor?’” Umënts wun aci pënatsani Këristu di bacäts.

⁸ Maa we wi na ja wun? Aja: “Përim aci tsi kawoku, di mtumu, ni di uwaasu” pëmënts pi aci, përim uwak pi wund ci pi tsi pëleents.

⁹ Uci ni mtumu a m pets m ja: “Yeesu aci Ajug” a di uwaasu a m wak Nasien-batsi natsaniul di bacäts, kë buer.

¹⁰ Par, pëwak tsi uwaas ka tsu ñaan tsi bëmabal, a pëpets ni mtum kë tsu ñaan tsi pëbuer.

¹¹ Par Bëpican aja: “Na waki ba këwak tsi nul, yaas a në kawarana.”

¹² Kaats ko un patsëlan wi Najudeu ni nagërek, par bukul bëlieng bu bof Ajug, a na ci narëmb pa ba nja biki ba roon bu kë ruul bëlieng.

¹³ Par, “nandui ba këru katim Ajug, në buer.”

¹⁴ Maa, um bi bu kë ru bun ni ba uwakats? A um bi bu kë wak bun ni ba teetsi ulekaul? A um bi bu kë te bun, uci ñaan leentsats përim?

¹⁵ A um bi bu kë leents bun përim, uci ba yëlaatsa? Bi u picana bi, aja: “Ko wi i wara wi, itsiim biki ka leents biki ngëwar!”

¹⁶ Maa cits bañaan bëlieng niiran bukun Upetsan-uwar; par Isaaya aja: “Ajug, yën wak un përim pi wund leents pi?”

¹⁷ Unk, uwak apënë-ni tsi pëcikëndën, a pëcikëndën ciina tsi përim Këristu.

¹⁸ Maa mán yepar: Ane bë teets-a? Tsi ucär bë te! “Përim bukul atea di ucaak bëlieng, a irim bukul tea te di ngëntsañi umundu.”

¹⁹ Maa mán yepar kak: Ane Israel meets wul? Ucak Moises aja: “Mán tsuuna ind mñíbula tsi ban cits biki ucaak; ka riabatsaan ind ucaak u lipats wi.”

²⁰ Maa Isaaya ayeents a na ja: “Ban tsasatsin biki, bu winin; bandoots biki yeparin, man pibandar tsi bukul.”

²¹ Maa tsi uleka Israel, aja: “Man colan iñan unu upëban pa bapok ko un tsua wi, batamb-ulats.”