ROOMA 1 - KARÚK-PËRIM KAWALU Nouveau Testament

Kawël-mboos kajuudë-ni

¹ Pol, naleemp Këristu Yeesu, nanduuree pëci Napostolu, a na patsandara pëleents Upetsan-uwar Nasien-batsi.

² Upetsan-uwar umënts wi, tsi uwal ujon, Nasien-batsi awatsanaan wul tsi bayëliaul tsi Bëpican Bëyëman.

³ tsi uleka Abukul nan pënë-nii tsi pëbuka Dawid, tsi uyamats.

⁴ Maa, na baaraan pëci Abuk Nasien-batsi tsi pëyëlan, tsi Uwejats pëci nayëman, tsi pënatseeul di bacäts, nul Yeesu Këristu, Ajug nja.

⁵ A tsi nul, tsi wund yankëna tsun bëtseend ni pëci bapostolu, pa pëtsu ban cits biki Bajudeu bëlieng ba niiran uwak tsi katimul;

⁶ a tsi bukul tsi bacumal ruunee tsun pëci biki Yeesu Këristu.

⁷ Ind bëlieng biki Nasien-batsi ŋal biki, ban ci biki di Rooma, a nduu rua bayëman, bëtseend ba wëlaan ind ni pëfac pan pënë-ni pi tsi Nasien-batsi, Asin nja ni tsi Yeesu Këristu Ajug.

Pol aŋal pëwin bañaan-Këristu, ban ci biki di Rooma

⁸ tsi ucak ko, mán baran Nasien-batsi nji tsi katim Yeesu Këristu, tsi uleka ind bëlieng; par uwak ind añakanaana tsi umundu bëlieng.

⁹ Nasien-batsi, nul ni ndu leempari tsi uwejats nji, tsi pëleents Upetsan-uwar Abukul, amaatir bi n wëtaants bi pëles ind

¹⁰ tsi bëñaan nji, ngëwal bëlieng; a n ja n doon ngënu bëlieng koo n yep, uci u ci uŋal Nasien-batsi ka wëla uwal u wara wi, nji pëbi di ind.

¹¹ Man dí mak pëwin ind, n ja pëfaar utseend tsi Uwejats, pa ind pëci baliincal.

¹² Umënts wan, aci nji ni ind ucnja tsëloole, nja ka liinc-liincandar tsi uwak un bofaa wi, wiic ind a u ciind umiñ.

¹³ Batsaar ni nji, in ŋalats ind pëmeets ne, ngëyaas ngëcumal ngi n yecis ngi pëbi di ind, pii ka buts këlon këbuk tsi ind, bi n ka bi buts tsi ban cits biki Bajudeu; maa te inkri a n laaŋa.

¹⁴ Man tsijar Bagërek, ni bapay buts; bameko, ni bameets-ko buts.

¹⁵ Wul ka wun n yëkandar pëleents ind Upetsan-uwar, ind ban ci biki di Rooma.

Pëyëlan pan ci pi tsi Upetsan-uwar

¹⁶ Par nji, in di ka n kawara Upetsan-uwar, wul aci pëyëlan Nasien-batsi pa pëbuer na waki ba këwak; ucak aci pëbuer Najudeu, a u ru ci pëbuer nagërek.

¹⁷ Par tsi wul tsi bëmabal Nasien-batsi pibanaana tsun, pëpën-ni tsi uwak pa uwak, bi u picana bi aja: “Namabal, ka kaana ubiira tsi uwak.”

Ujuban bañaan ban cits biki Bajudeu

¹⁸ Uriab Nasien-batsi apibandari di batsi pa bañaan-bajin, undo karika-lënk Nasien-batsi kan ci ki-ba këci, ni kamabats kan ci ki-ba këci, bukul ba nëts biki ucär tsi kamabats;

¹⁹ par ko wi ngë yëlan wi pëme tsi Nasien-batsi apibanaa bukul tsi ko un jënts wi, par Nasien-batsi piban un bukul wul.

²⁰ Par ki uleempara umundu, ngi Nasien-batsi ngan dits ngi ka winaa, awina tsi ko un jënts wi, un ci wi pëyëlanul pan dits pi ka ba, ni bëciul Nasien-batsi, uci pëteenëna tsi ngi na ro ngi; unk bu ranjats ulaci,

²¹ par ŋal bi ba me bi Nasien-batsi, maa bu rëmbanatsul pi Nasien-batsi, nin bu baranatsul. Maa ba niam tsi ngëwejats bukul nga katats ngi, a ngëwaas bukul ngi bëfuur ruka rëmënts.

²² Bë tsu iyeen bukul pëci bameko, maa ba ruka ci bafuur;

²³ a ba tsëtsëlan përëmb Nasien-batsi nan ditsi ka coka, anaaman ni bënaam ñaan-najin ni kan cokee, bënaam ngëkac, bënaam ngë n jar këtsiim këbaakër, ni bënaam ngëko ngi ka puula ngi.

²⁴ Wul ka wun Nasien-batsi guts bukul tsi kari-ngëko ngëtsopal tsi ngëwaas bukul, pa pëkawaran ngëliaf bukul tsi ba ci tsi.

²⁵ Bukul, bu tsëtsëlan ucär Nasien-batsi ni butsup, a bu kë jintëla nga leempa ngi këleempa, bu kë leempar ngul, tsi pëjaa bu rëmban na leempi ngul, nul na n jaaree ngëwar pa sandëndën. Ameen!

²⁶ Undo ko umënts wun, Nasien-batsi guts bukul tsi kari-ngëko ngan kawundan ngi, par ŋal bakaats bukul bu tsëtsëlan bi u ja bi u roon u rolaa, koo ro un dits wi ka rola.

²⁷ Unk bayënts buts wëtan puu ci ni ŋaats bi u ja bi u roon u rolaa, a uja ban ci biki bu kë rí bacints bukul, bu kë ro uñutsanuel, niints ni niints; a bu kë yank tsi ngëliaf bukul bëluk ba liing bi tsi pëniam bukul.

²⁸ A bi ba tsuuts bunk ibats tsi ume Nasien-batsi, Nasien-batsi guts bukul tsi kawejats nga waraatsa ngi, a bu kë ro ngan kaats ngi përolaa.

²⁹ A ba cum ni kamabats kan ci ki ba këci, ni kawaraatsa, nikariisan-ko, ni kajuats-uwaas; bu cum ni mankocar, manfiŋar, mŋom, maniamëlan, ni karo ngëwutsëtsuel. Bu ci bakuetar,

³⁰ bajaar bañaan ngan cits ngi, babër Nasien-batsi, bakarar, bape-iyeen bukul, baguukandar, bajaj-ngëwutsëtsuel, ni bamobats tsi përim ban buk biki bukul.

³¹ Bë ci bakaats-uwejats, barika-mob tsi përim, bakaats-bëŋal, barika-yëk ipës.

³² Ŋal bi ba me bi ngëtsua Nasien-batsi ja, ban ci biki tsi përo ngëko ngan, bu ka pëfiŋa, bu baarats ibats rin tsi përo ngul, maa bu kë niiran biki kando biki ngul.