NGËRO 9 - KARÚK-PËRIM KAWALU Nouveau Testament

Sol aniiran Yeesu

¹ A Sol wama ka pícar pëfiŋ bafets Ajug, a na tsëp di nan pei pëci nawiak-bajakan,

² a na yepul ngëletar pa pëtsëpand Damaasku di ito-ijuki; pa uci nee win balon ban bof biki tsi Bëga, bayënts oo bakaats, në tan bukul ka tsëpand Jerusalem.

³ A na repa bëga pëtsëp; uwokanul pëband Damaasku, din ufac di batsi fietsul afayësan.

⁴ Na yër tsi utsia, na te pëlon përim jaul: “Sol, Sol, we ka wun a kë noor-nooranin?”

⁵ A Sol yeparul aja: “M ci yën, Ajug-a?” A përim ja: “Nji n ci-un Yeesu ni kë noor-noorani; [pëkaman ko un jul wi, aciu ko u ñats wi.” A na lënk mak, katse me ko wi nu ro wi, a na ja: “Ajug! Wee m ŋal wun nji përo?” A Ajug jaul:]

⁶ “Natsan kë niaj përaasa, dul di kii leentsa run ko wi m ka wi përo.”

⁷ A bayënts ban ci biki ni nul tsi bëyaas nats, bë bëyëlants uñakan, a ba te përim, maa bë winats ñaan.

⁸ Sol natsa tsi utsia, na teenan këkësul, maa winats ko. A ba mobël tsi kañan atsëpand Damaasku.

⁹ A na ro ngënu ngëwaants, winats, rialaats, nin raanats.

¹⁰ A u ro ka nalon nafets Yeesu nan ci di Damaasku ni ka n jaka Ananias; a Ajug ñakanaanul tsi bëwinal aja: “Ananias!” A najankma a jaul: “Nji ni, Ajug.”

¹¹ Din, Ajug jaul: “Natsaan kë tsëp di urawa wi ka n jaka wi Urawa-ucol, kë tsas nalon niints, aci di bëñaan di kato Judas, ka jaka Sol, apënë-ni Tarsu;

¹² awin nalon niints ni ka n jakee Ananias tsi bëwinal, a na paful iñan pa na kak na win.”

¹³ Maa, Ananias jankma aja: “Ajug! Man te bacumal kë ñakan ngëko ngëcumal nga waraatsa ngi, tsi uleka niintsi, ngi na ro ngi bayëmanu di Jerusalem.

¹⁴ A tsiji tsi pëyëlan pi na yanki pi di bawiak-bajakan, pa pëmob bañaan bëlieng, biki kan du biki katimu.”

¹⁵ Maa, Ajug jaul: “Tsëpan, par namëntsi, aci kaŋí ki n dat ki pa pëtsëpand katim nji tsi bërun ban cits biki Bajudeu, ni basien, ni babuk Israel.

¹⁶ Mán pibanul bi na ka bi pënoor, undo katim nji.”

¹⁷ A Ananias tsëp ee niaj di kato, a na paful iñan na ja: “Natsaar ni nji Sol! Ajug yëliin un, nul Yeesu nan cili unk tsi wi, bi kë bi bi di bëga; pa wi pëkak puu win, kë cum Uwejats-ujënts.”

¹⁸ Tsi uyëk umënts wun, a iko pëniul di këkës pi ipepatëras, na kak ka win, a na natsa, na mijana.

¹⁹ Bi na ba bi bariala, na kak aliinc. A na ruka di Damaasku aro ngënu ni bafets Yeesu.

Nanoor-nooran, anoor-noorana

²⁰ A tsi uyëk umënts wun, Sol kur pëleents di ito-ijuki koo ja, Yeesu ci-un Abuk Nasien-batsi.

²¹ Ban teul biki bëlieng pikra a bu kë ja: “Cits iink niintsi ka tsas un pëba biki kan du biki katim ki di Jerusalem-a? A cits iink wul ka wun na bi tsi, pii tan bukul pëtsëpand di bawiak-bajakan-a?”

²² Maa, Sol ru pe këpe pëlincandër tsi pëpiban u ci Yeesu ci-un Këristu, a na pikra n Bajudeu ban ciina biki Damaasku.

²³ A u par ngënu ngëcumal, a Bajudeu baar pëloole pa pëfiŋul,

²⁴ maa Sol bi me utsaag bukul. A bu kë waay buts ilëman, bërëm ni pënak, pa pëfiŋul.

²⁵ Maa, bafetsul jejul bërëm ayuagul di pëcaa, ba welaniul bi pëlënk pan cagëna pi përaasa.

Sol di Jerusalem

²⁶ Bi Sol band bi Jerusalem, a na tsas pëbofëlar ni bafets Yeesu, maa, bukul bëlieng ba lalul, bë fiaarats ne nul aci nafets Yeesu.

²⁷ Maa, Barnabas mobul atsëpand di bapostolu, a na leents bukul bi Sol win bi Ajug di bëga, a Ajug ñakanaanul, ni bi na leents bi përim di Damaasku ni bëyeentsal, tsi katim Yeesu.

²⁸ A na ci ni bukul di Jerusalem, a nuu niaj nuu pëni, nuu leents përim ni bëyeentsal, tsi katim Ajug.

²⁹ Ka ñakan ni Bagërek, a nuu totëlar irim ni bukul, maa bu kë tsas pëfiŋul.

³⁰ Bi batsaar tsi Këristu me bi ko wan, a ba tsëpandul Seesareeya; a ba wëtanul na tsëp Tarsu.

³¹ Tsi wul, a Ngëriisia ru tsij pëfac tsi Judeeya bëlieng, ni Galileeya, ni Samaaria; a nguu liinc-liincandar, a nguu yandaar tsi puu lënk Ajug; a tsi bëtsënk Uwejats-ujënts, a nguu pe këpe pëwatsësar.

Eneeyas ayësana

³² Bi Per ci bi tsi pëyaana ngëleka bëlieng, a na juŋa atsëp buts di bayëman ban ci biki di Liida

³³ A na tsënk rul nalon niints nalab ni ka n jakee Eneeyas; apiints tsi bëkaab aro ngëwaanu këwas tsi pëmaak.

³⁴ A Per jaul: “Eneeyas! Yeesu Këristu ka yësanu. Natsaan kë yecës bëkaabë, wi bërieru.” Tsi uyëk umënts wun, a na natsa.

³⁵ A bañaan ban ci biki di Liida ni Saroona bëlieng winul, a ba witsësa aniiran Ajug.

Tabita anatsanee di pëcäts

³⁶ A u ro ka nalon nafets Yeesu ŋaats di Jope, ni ka n jakee Tabita, uci wi Dorkas, un ci wi ubaca; nul acum ni karo-ngëwar, ni kawël-bëtseend.

³⁷ Maa tsi ngënu ngan, a nee maak a na cäts; bi ba ñaw bi puumul, a ba tsu pul di pëfër përuets.

³⁸ Bi Liida wok bi Jope, a bafets Yeesu te Per ci rul, ba yël bayënts batëb di nul pa pii buaraul ba ja: “Bili di wund ucar!”

³⁹ A Per natsa atsëp ni bukul. Bi ba band bi, a ba tsëpandul di pëfër përuets, a bacätsëndan-bayën bukul bëlieng fayul, a bu kë kaan, ba pibanul ipantu, ni iŋi-bëtiem i Dorkas leemp yi, bi na wama bi ci ni bukul.

⁴⁰ Maa, Per cilandër bañaan bëlieng utsand, na jintëla añaan; a na witsësa mab puum, na ja: “Tabita, natsan!” A ŋaats teenan këkës, na win Per, a na tsoar.

⁴¹ Per colanul kañan, na katul. A na rui bayëman ni bacätsëndan-bayën bukul, na piban bukul ŋaats kak nayësal.

⁴² A ko wan mea jëk Jope bëlieng, a bañaan bacumal wak tsi Ajug.

⁴³ Per ruka di Jope, aro ngënu ngëcumal, di kato nalon niints ni ka n jakee Simon, aci naleempëna itël.