NGËRO 8 - KARÚK-PËRIM KAWALU Nouveau Testament

¹ Sol, abofëna tsi ba niiran biki Estefan pëfiŋa. Tsi unu umënts wun, a pënoor-noorana pëwiak baandari Ngëriisia ngan ci ngi di Jerusalem, a bañaan bëlieng garandar pa ngëcaak Judeeya ni Samaaria, a bapostolu rin, duka bukun.

Pënoor-noorana Ngëriisia, pëcak

² A balon bayënts ba lënk biki Nasien-batsi mooy Estefan, a ba kaandarul mak.

³ Maa, Sol natsara pëba ni Ngëriisia; aja na roon nu niaj di ito koo púuli bayënts ni bakaats koo guts di ukalabus.

Filip di Samaaria

⁴ A ban gara biki tsëp ngëburu bëlieng ee ka leents rul Upetsan-uwar.

⁵ Unk, a Filip wela përaasa Samaaria, na leents bukul uleka Këristu.

⁶ A indënd bañaan bofëlar bëlieng, a bu kë cikëndën ngëko ngi Filip kë ja ngi, par bë te ngul, a ba win ngëpibanaani ngi na ro ngi.

⁷ A ngëcaay ngëcumal, ngan niaj ngi bañaan, ja nga lië mak ngë pën tsi bukul; a balab bacumal ni bajënk yësana.

⁸ A ulílan uwiak ci tsi përaasa pëmënts pun.

Simon napene

⁹ A u ka nalon niints ni ka n jakee Simon, ni kan doi uleemp bëpene, a na pikran bañaan Samaaria, na tsu beenul pëci ñaan nawiak;

¹⁰ a bañaan bëlieng kë fetsul, pëkur di upäts te di bawiak, bu kë ja: “Niintsi aci pëyëlan Nasien-batsi, pi ka n jaka pi Pëyëlan Pëwiak.”

¹¹ Bañaan kë fetsul, par aro jon ki nuu pikran ki bukul ni ngëko bëpene.

¹² Maa, bi ba fiaar bi Filip, nul na leentsi bukul Upetsan-uwar tsi uleka Pësien Nasien-batsi, ni uleka katim Yeesu Këristu, ba mijana, bayënts ni bakaats.

¹³ Simon bërierul buts, afiaar a na mijana, na mob tsi pëfets Filip; a nu win ngëpibanaani ngëwiak, ni ngëko bawitsa ngan roa ngi, a na pikra.

¹⁴ A bapostolu ban ci biki di Jerusalem te u jaka bañaan Samaaria niiran përim Nasien-batsi, ba yël rul Per ni Joŋ.

¹⁵ Ba juŋa band rul, a ba ñaandar bukul pa ba yank Uwejats-ujënts;

¹⁶ par Uwejats-ujënts netse ro welee tsi nin nalon tsi bukul, maa bë mijana rin, tsi katim Yeesu, Ajug.

¹⁷ Din, a Per ni Joŋ paf bukul iñan, a ba yank Uwejats-ujënts.

¹⁸ Maa bi Simon win bi bapostolu paf bañaan iñan, a ba yank Uwejats-ujënts, na wël bukul uncaam,

¹⁹ na ja: “Nda wëlin buts pëyëlan pi, unk, uja ñaan ni n pafi iñan, në yank Uwejats-ujënts.”

²⁰ Maa, Per yankësul aja: “Uncaamu, u ciin ni wi pa pëniam, par m ja ne utseend Nasien-batsi ka tsënkanaana uncaam.

²¹ M bofaatsa, te m kaats ko tsi uleemp wi, par uwaasu cits umabal tsi bërun Nasien-batsi.

²² Wëtani uwejatsu wi kawaraatsa, kë ñaan Ajug, uci wi kan ci wi, kë jampësaa uwejats un ci wi di uwaasu.

²³ Man win uwaasu cum ngëko ngëwaayal, a m tana tsi ujuban.”

²⁴ Maa Simon yankës, a na ñaan bukul aja: “Nda ñaandërin Ajug, pa ko wi nda ja wank përits baandë-niin.”

²⁵ Bi Per ni Joŋ ba bi pëleents ko wan, ni pëñakanaan përim Ajug, ba pën pëwitsa Jerusalem, bu kë leents Upetsan-uwar di ngëntab bañaan Samaaria ngëcumal.

Filip, ni niints nan pënë-nii Etioopia

²⁶ Ulon uwaanju Ajug añakanaan Filip aja: “Natsaan kë tsëp kajara utsia-ucaak, di bëga ban pëni bi Jerusalem ajuŋa Gaasa; bul aci bi ulaalats.”

²⁷ A na natsa atsëp. A nalon niints nan kasee, nan pënë-nii Etioopia, nawiak baleemp Kandas nan ci nasien Etioopia ŋaats. Niints namëntsi aci nagaang bëka nasien; aro ya pëjintëla Nasien-batsi di Jerusalem.

²⁸ A na pëni pëwitsa ucaakul, a na tsoar di kasaretul a nuu juk ulibëru Isaaya, nayëlia.

²⁹ Din a Uwejats ja Filip: “Kíkaan kab kasaret kun.”

³⁰ A Filip kë túk, na te niints kë juk tsi ulibëru Isaaya nayëlia, na jaul: “Me uwar ko wi kë juk wi-a?”

³¹ Na yankës aja: “Um di n yil run pëme uwar, uci ñaan pibanatsin?” A na buara Filip na paya nii tsoar ni nul.

³² A kafa ki na ro ki ka juk tsi Bëpican, ci kun ki: “A naam pi unkaanel u tsëpanda wi pëfiŋa, pi unkaanel uties uyilats-pieents tsi bërun namanc wul; unk, a waabaats mtumul.

³³ Tsi mkawul na laaŋa ufaŋi. Yën kee leents un bi kajërul ci bi ja? Par, ubiiraul apënanaa tsi umundu.”

³⁴ A niints nan kasa unk ja Filip: “Man ñaanu këñaan, leentsin, uleka yën wi nayëlia kë ñakanaan wun? Ulekaul bërierul, oo uleka nalon-a?”

³⁵ Din, a Filip jej uñakan, na kur-ni tsi kafa ki niints nan kasa unk ro kunk ka kajuk, a na leentsul Upetsan-uwar tsi uleka Yeesu.

³⁶ Ba repa bëga pëtsëp, a ba band tsëlon tsëko tsan tsij tsi mlik, a niints nan kasa unk ja: “Teenan-e, mlik mi! We ka laaŋin wun pëmijana?” [

³⁷ A Filip yankës aja: “Aniirana, uci m wak tsi uwaasu bëlieng.” A niints yankës aja: “Man wak u ci Yeesu Këristu ci-un Abuk Nasien-batsi.”]

³⁸ Din, a na tsu kasaret a ka nats. A ba wela mlik, bukul batëb, a Filip mijanul.

³⁹ Bi ba pëni bi di mlik, a Uwejats Ajug waj Filip, a niints nan kasa unk katse winul; a na cum ni ulílan, na repa bëgaul pëtsëp.

⁴⁰ Maa Filip ruka winaa di Asootu, a nuu leents Upetsan-uwar di iraasa i na par-na yi bëlieng, te na band Seesareeya.