NGËRO 7 - KARÚK-PËRIM KAWALU Nouveau Testament

Uñakan Estefan

¹ A nan pei pëci nawiak-bajakan yeparul aja: “Ngëko ngan, aci ank di nga ci run-a?”

² Estefan yank bukul aja: “Batsaar ni nji bayënts, ni basin nji, nda cikëndëni! Nasien-batsi përëmb apibandari tsi Abraam, asin nja bi na wama bi ci di Mesopotaamia, te netse ro ci di Karan;

³ a na jaul: ‘Pëni di ucaaku ni di bayëtsu, kë tsëp ucaak wi ndu n pibanu wi.’

⁴ Din, a Abraam pëni di ucaak bakaldeu a na tsëp ee tsoar di Karan. Bi asinul cats bi, Nasien-batsi pënandiul pa ucaak wi nda tsoarëna wink inkri.

⁵ Nasien-batsi wëlatsul bërukanda tsul, ŋal tsëko tsëpafi kayots, maa awatsan pëwëlul ucaak na kaana ni babukul; te nul Abraam kaats napäts.

⁶ A iink di Nasien-batsi ja run: ‘Babuku kee tsoar di ucaak utsooŋ, bu ka ruka ci baluek, bu kë pikaar bukul aa u ro ngëwaanu ngëseent ngëbaakër.

⁷ Maa, ucaak wi ba ro wunk ciina baluek, nji Nasien-batsi ja un, mán wat wul pëleents a uu ba, bu ka pëni bu kee ru rëmbanaanin tsi tsëko tsi.’

⁸ Din a na wëlul karo-pëloole kambac; unk, a Abraam bëk Isaak, a na welanul kambac tsi unu uwasantsan; unk di Isaak ro run Jakob, a Jakob bi ro buts basin nja untaaja bukun ni batëb.

⁹ A basin nja ñíbëla Juse, a ba waapul bañaan Ejipët; maa Nasien-batsi ro ci ni nul,

¹⁰ a na randul ngënoor bëlieng, a na wëlul bëtseend ni kameko tsi bërun Farao, nasien Ejipët, nan tsuuli pëtsijëna ucaak Ejipët ni kato nasien bëlieng.

¹¹ A ubon baandi tsi ucaak Ejipët bëlieng, ni wi Kanaan; a u tsiji unoor uwiak, a basin nja ka ats bariala.

¹² Maa, bi Jakob te bi u jakaa bariala aci di Ejipët, a na yël rul basin nja uyaas ucak.

¹³ Tsi uyaas utëbantsan, a Juse tsu ban tsaar bukunk ni nul a ba yëkëranul, a Farao ruka me bañaan pëbuka Juse.

¹⁴ Din, a Juse yël bañaan pii rui asinul Jakob, ni bayëtsul bëlieng, ban ci biki bañaan ngëntaaja paaj ni ulon, ni bañaan kañan.

¹⁵ Jakob wela atsëp Ejipët; a ndul di na cätsëna run, nul ni basin nja buts.

¹⁶ A ba tsëpanda Sikem, bee tsua di baar bi Abraam weelëna bi përes uncaam, tsi iñan babuk Emoor di Sikem.

¹⁷ Bi u wokan bi uwal wi Nasien-batsi kë ro wi ko wi na watsan wi Abraam, a bañaan watsësar di Ejipët, a ba ruka pe këpe pëcum,

¹⁸ aa nalon bi ci nasien Ejipët, nul meets Juse.

¹⁹ Nasien namëntsi, areanaan bañaan nja a na pikaar basin nja atsu bukul pëbër babuk bukul, pa ba rits bëk.

²⁰ Tsi uwal umënts wun, wi Moises bëka wun; na ci ñaan na waree tsi bërun Nasien-batsi. A na kusa këlí këwaants di kato asinul.

²¹ Bi na jukana bi di utsand, abuk Farao ŋaats coontsul ee kus pi abukul bërierul.

²² A Moises jukana kameko bëlieng, ki bañaan Ejipët, a na ka pëyëlan tsi irimul, ni tsi ngi nuu ro ngi.

²³ Bi na band bi ngëwaanu ngëntaaja ngëbaakër, a na te tsi uwaasul na ka na roon në tsëp pii ci ni ban tsaar biki ni nul, babuk Israel.

²⁴ A nu win nalon niints kë kamana, a na yankarul ukam, na fiŋ nan ci-unk ñaan Ejipët.

²⁵ Moises aro ja ne, ban tsaar biki ni nul ka yëkërën u ci tsi nul tsi Nasien-batsi ŋal tsun pëbuëran bukul, maa bukul bë yëkëranats.

²⁶ Tsi unu ucints, a na win balon ban ci biki tsi ukam, na ŋal pëtsu pëfac tsi bukul, na ja: ‘Bayënts! Ind tsaar bukun; a we ka wun nda riabatsar tsi nda ci tsi.’

²⁷ Maa ni kan kaman unk acintsul piemb Moises, aja: ‘Yën tsuu un pëci nawiak, ni nawat-pëleents tsi wund?

²⁸ Ane m ŋal pëfiŋin bi m fiŋ bunk ñaan Ejipët nun taakal-a?’

²⁹ A Moises te irim yan, na túk ee ruka ci natsooŋ di ucaak Madian, di na bukëna ri upäts utëb.

³⁰ A uu band ngëwaanu ngëntaaja ngëbaakër, a ulon uwaanju pibandar tsi bërunul di ulaalats untunda Sinai, di bametsu bërua bi ka yëk bi di bëwuul.

³¹ A bi Moises kë win bi ko wan, na pikra tsi bëwinal bëmënts ban; a nuu kika pa pëteen uwar, na te përim Ajug, a pa ja:

³² ‘Nji n ci-un Nasien-batsi basinu; Nasien-batsi Abraam, Nasien-batsi Isaak, Nasien-batsi Jakob.’ Maa, Moises lal a nuu lënk, yeentsats pëteen.

³³ A Ajug jaul: ‘Pënani iraala tsi itsiimu, par tsëko tsi m nats tsink aci tsëko-tsëyëman.

³⁴ Unoor bañaan nji di Ejipët, ma win wul uwar, a n te irug bukul; a n welee pii buëran bukul. Inkri, bili mán yëlu Ejipët.’

³⁵ Moises namëntsi ni ba ron un bër aja: ‘Yën tsuu un pëci nawiak, ni nawat-pëleents.’ Nul ni Nasien-batsi yël un, na tsuul pëci nawiak ni nabëëran, tsi pëyëlan uwaanju un pibandar wunk tsi bërunul di bëwuul.

³⁶ Moises namëntsi, pënani un bukul di Ejipët, a nuu ro ngëko ngan pikran ngi, ni ngëpibanaani, di Ejipët, di bërëk bëjankal, ni di ulaalats, tsi ko un do wi ngëwaanu ngëntaaja ngëbaakër.

³⁷ Nul Moises ja un babuk Israel: ‘Nasien-batsi ka natsani nalon nayëlia pi nji, tsi nda tsaar tsi.’

³⁸ Bi baisrael juk bi di ulaalats, a Moises namëntsi ci-un ni basin nja ni uwaanju u ñakanaanul wunk di untunda Sinai; aciul yanki un irim ubiira pa pëwël nja yul.

³⁹ Basin nja ŋalats pëcikëndënul, maa ba bërul a ngëwaas bukul witsa Ejipët;

⁴⁰ a ba ja Aaron: ‘Roor wund basien-batsi biki kan ci biki di bërun wund; par Moises nan pënani nja ink di pëboos Ejipët, ngë meets ko un parënul wi.’

⁴¹ Tsi ngënu ngëmënts ngun, ba leemp ubay, a ba wël pëcap pëmënts pun bëjakan, a ba lílandër uleemp iñan bukul.

⁴² Maa Nasien-batsi akikësa bukul, a na wët unk bukul tsi karëmban ngëko batsi, bi u picana bi di ulibëru bayëlia aja: ‘Kato Israel, ane nji ni m fiŋar un ngëcaam, ni ijakan bëtseend di ulaalats, tsi ko undo wi ngëwaanu ngëntaaja ngëbaakër-a?

⁴³ A nda lap unkundan Molok, ni upesaj nasien-batsi ind Raifan, icap yi nda leemp yi, pa puu jintëla yul. Wul ka wun ndu duak ind, lutan Babiloonia.’

⁴⁴ Basin nja ro tsij unkundan un piban wi Nasien-batsi ci ni bukul di ulaalats, nul na njai Moises na leemp wul na naaman ni wi na ro wunk win.

⁴⁵ Bi basin nja yank bi wul buts, a ba tsëpand wul ni Josue, pa pëyank ucaak bañaan ban cits biki Bajudeu, bukul biki Nasien-batsi ruak biki tsi këkës basin nja te tsi uwal Dawid.

⁴⁶ A Dawid ka bëtseend tsi bërun Nasien-batsi, na ñaanul pa wëtul në leemp tsëko tsi Nasien-batsi Jacob kë ciina tsi.

⁴⁷ Maa, aci Salomon bi leemparul kato.

⁴⁸ Maa, Kanpe pëci di ruets di ka ciina ito i leempëna yi ni iñan bañaan-bajin. Bi nayëlia Batsi ja bi:

⁴⁹ Nasien-batsi aja: ‘Batsi aci pëtsoari nji, a utsia ci tsëpafi iyots nji; Kaom kato ki ndu leemparin kun, oo tsum ci tsun tsënaakësaani nji?

⁵⁰ Ane cits iñan nji leemp yun ngëko ngi bëlieng-a?’

⁵¹ Baliinc-iyeen, batamb-ngëwaas, ni ibats in dits yi ka te! Kara bëyaas ndë natsar pëkaman Uwejats-ujënts; bi basin ind ro bi ka ro, unk buts di nda ro run.

⁵² Naom tsi bayëlia, ni basin ind noor-nooranats un? Bë fiŋ bando biki jon ki ba leents ki u biiri Namabal, inkri nda ruka ci bayaul ufets, ni bafiŋul.

⁵³ Ind yank bukun ulua wi ngëwaanju leents wi, a nda mobats tsi përo ko wi u ja wi.”

Pëcäts Estefan

⁵⁴ A bu kë te ko wan, a ngëwaas bukul cokee, bu kë ñaamarul irumaj.

⁵⁵ Maa, Estefan cum Uwejats-ujënts, na kaŋan këkës di batsi, a na win përëmb Nasien-batsi, a Yeesu nats tsi kariir Nasien-batsi.

⁵⁶ A na ja: “Nda teenan-e! Man win batsi waantsar, a Abuk ñaan-najin, nats tsi kariir Nasien-batsi.”

⁵⁷ Maa, ba lië mak, a ba nëts ibats bukul, ba yërandul bëlieng,

⁵⁸ a ba gutsarul utsand përaasa, ba tapul ni ilaak. Bamaatir jukan iŋi bukul tsi itsiim ulon upaas wi ka n jaka wi Sol.

⁵⁹ Bi bu kë tap bi Estefan ni ilaak, a na ñaan aja: “Yeesu Ajug! Yankan uwejats nji.”

⁶⁰ Din, a na jintëla na lië mak aja: “Ajug! Cats tsu ujuban bukul ko.” Bi na ja bi irim yan, a na juab.