NGËRO 6 - KARÚK-PËRIM KAWALU Nouveau Testament

Bayënts paaj ni nalon arata pa pëci batsënk tsi Ngëriisia

¹ Tsi ngënu ngëmënts ngan, bafets Yeesu kë pe këpe pëwatsësar, a Bagërek natsara pëkuët Bayebëreu, par ban cätsëndan biki bayën bukul tsi bukul, bë ja ba roon bu kë finaa kafa ngëko kara unu.

² Din, a Untaaja bukun ni batëb rui kandënd bafets Yeesu, bee juk, ba ja bukul: “Yúkats, wund pëwëtan përim Nasien-batsi pa puu këmand ngëko bariala.

³ Maa, batsaar ni wund! Nda ratan bayënts paaj ni nalon tsi ind, biki ka n jaara biki ngëwar, a ba cum Uwejats-ujënts ni kameko, nja ka tsu bukul tsi uleemp wi.

⁴ Maa wund, wund ka mob tsi bëñaan, ni tsi uleemp përim.”

⁵ A kandënd lílandër irim bapostolu, a ba rat Estefan, niints nan cumi uwak ni Uwejats-ujënts, ni Filip, ni Përokoru, ni Nikanoor, ni Timon, ni Parmenas, ni Nikolas nan pënë-nii Antiookia, na ro ci nafets bëga Bajudeu;

⁶ Ba natsan bukul tsi bërun bapostolu, a bapostolu paf bukul iñan, añaandër bukul.

⁷ Unk, a përim Nasien-batsi kë laar mak, ucumara bafets Yeesu kë pe këpe pëwatsësar di Jerusalem, a kandënd bajakan niiran uwak.

Pëmoba Estefan

⁸ A Estefan cum bëtseend ni pëyëlan, a nuu ro ngëko ngan pikran ngi, ni ngëpibanaani ngëwiak tsi pëncuaf bañaan.

⁹ Maa, balon ban bofëna biki di kato-kajuki, ki ka n jaka ki, ki bafacana, ni bañaan ban pënë-ni biki Sireeni, a balon pëni Aleksandëria, ni balon ban pëni biki Siliisia ni Aasia, ci tsi mantotëlër ni Estefan;

¹⁰ a bë yëlanats pëpok kameko, ni Uwejats, un tsuul wi a na ñakan.

¹¹ A ba tsu balon bayënts pa ba ja: “Wund ateul a nuu kar Moises, ni Nasien-batsi.”

¹² Bu sualan bañaan, ni bawiak Bajudeu, ni bapican-ulua, a ba yërand Estefan a ba mobël, ba tsëpandul di kato kawat-pëleents kawiak.

¹³ A ba tumtsarul aja: “Ñaan ni, wëtaants pëja irim in ci yi ikar pa tsëko-tsëyëman tsun, ni pa Utsua;

¹⁴ par wund ateul a nuu ja: Yeesu namëntsi, nul Kanpënë-ni-nasaret, ka gar kato-kayëman, në bëtan undimaan wi Moises wëlnjawi.”

¹⁵ A ban tsoar biki bëlieng di kato kawat-pëleents kawiak kaŋan Estefan këkës, a ba win këkësul, pi këkës uwaanju.