NGËRO 5 - KARÚK-PËRIM KAWALU Nouveau Testament

Ananias ni Safiira

¹ A nalon niints ni ka n jakee Ananias, ni aarul Safiira, waap bëka bukul,

² maa a na baaraan pëloole ni aarul, a na rukës ko, tsi uncaam wi na waapar wi bëka; a na tsëpand un duka wi ee jukan tsi bërun bapostolu.

³ Din, a Per ja: “Ananias, we ka wun a m wët Useetaani a u cumu uwaas? M tsupar Uwejats-ujënts, m bek ko tsi uncaam wi m waapar wi bëka.

⁴ Bi m netse bi m waap bul cits bíicu-a? A bi m waap bi bul, uncaam cits tsi kañanu-a? Um di uwejats wi yëlan dun pëbi di uwaasu? M tsuparats ñaan-najin, maa m tsupar Nasien-batsi.”

⁵ Ananias kë te irim yan, a na yër a cäts; a bëlal baandë-ni ban te biki ko wan bëlieng.

⁶ A ipaas natsa atieman puum, a ba tsëpand pul ee mooy.

⁷ Bi u par bi ko pi mfuts-unu, a aarul niaji, maa meets ko un par wi.

⁸ A Per yeparul, ajaul: “Leentsin-e! Përes pi pi nda waapar pun bëka ind-a?” A na ja: “Ee-e, aci pul.”

⁹ Din, a Per jaul: “We ka wun a nda baar pëloole pa pëteen-teenan Uwejats Ajug?” Teenan-e iyots bañaan ba mooy biki ayënu, yuu yi tsi pëlëman, bu ka tsëpandu buts.

¹⁰ Tsi uyëk umënts wun, a ŋaats yër tsi itsiim Per a cäts; uniaji ipaas, ba tsënk na cäts, a ba tsëpandul ee mooy abofëlan ni ayënul.

¹¹ A bëlal bëwiak baandë-ni bañaan Ngëriisia bëlieng, ni bañaan bëlieng ban te biki ngëko ngan.

Bapostolu aro ngëko bawitsa ngëcumal

¹² A iñan bapostolu ro ngëpibanaani ngëcumal, ni ngëko ngan pikran ngi tsi pëncuaf bañaan. A ba baar bëlieng pëloole, a ba ja ba roon bu kë juk di Ukuëra Salomon.

¹³ Maa, kaats nalon ñaan na yeentsi pëbofëlar ni bukul, par bañaa n ja ba roon bu kë bëndan bukul mak.

¹⁴ A kandënd bañaan ba uwak biki tsi Ajug, bayënts ni bakaats, kë pe këpe pëwatsësar;

¹⁵ a u tsu bañaan a bu kë tsëpand bamoj di ngërawa kee ru piintsan bukul tsi ikaab ni tsi iyoongia, pa uwal wi Per kë par wi, ulimëntsul ka kërara ŋal naloole rin tsi bukul.

¹⁶ A bañaan bacumal buts ban pëni biki ngëntab ngan fay ngi Jerusalem, kë tsiji bamoj ni biki ngëcaay kë nooran biki, a ba yësana bëlieng.

Bapostolu anoor-noorana

¹⁷ Maa, nan pei pëci nawiak-bajakan, ni ban ci biki ni nul bëlieng, ban ci bkii ban bofëna biki di bëjukan Basaduseu, cum ni mankocar;

¹⁸ a ba mob bapostolu ee ríc di ukalabus ucaak.

¹⁹ Maa bërëm, a ulon uwaanju Ajug waants ilëman ukalabus, u pënani bukul utsand, a u ja bukul:

²⁰ “Nda tsëpan ndii pibandar di kato-kayëman, ndë leents bañaan irim njaka yi bëlieng, yi ubiira yi.”

²¹ Bi ba te bi ko wan, din a unu kë jënts ba niaj kato-kayëman ee kur pëjukan bañaan. A bi nan pei pëci nawiak-bajakan baandi bi ni bacintsul, a ba rú bëjuk kato kawat-pëleents kawiak, ni bawiak babuk Israel bëlieng; a ba wël ulai di ukalabus pa bapostolu pë biindee.

²² Maa, bi baleemp band bi, bë tsënkats bukul di ukalabus; a ba witsee ee leents,

²³ aja: “Wund atsënk ukalabus nigana uwar, a bawaay nats tsi ilëman; maa, uwaants wund ilëman, wund tsënkats ñaan di bametsu.”

²⁴ Bi nawiak bawaay kato-kayëman, ni bawiak-bajakan te bi irim yan, a bë katse me ko wi bu kë ro wi tsi uleka ko un par-na wank bapostolu.

²⁵ Tsi uler umënts wun, a nalon ñaan baandi ee leents bukul aja: “Nda teenan-e! Bayënts biki nda guts bukunk di ukalabus, nats bukunk di kato-kayëman a bu kë jukan bañaan.”

²⁶ Din, a nawiak bawaay tsëp ni baleemp ee tsiji bapostolu, maa bë roonats uyëlan, par bë lal bañaan përits tap bukul ilaak.

²⁷ A ba tsiji bukul ee natsan di kato kawat-pëleents kawiak. A nan pei pëci nawiak-bajakan yepar bukul

²⁸ aja: “Wund pokats ind iink pëjukan tsi katim ki, maa ind cuman bikink Jerusalem bëjukan ind, a nda ŋal pëyuuntsan wund pëñaak ñaan namëntsi.”

²⁹ Din, a Per ni bacintsul bapostolu yankës aja: “Nasien-batsi ka un pëcikëndënaa, tsi pëjaa pëcikëndën bañaan-bajin.

³⁰ Nasien-batsi basin nja anatsani Yeesu, ni nda fiŋ unk a nda rialul di pëmul.

³¹ Maa, a Nasien-batsi riangul tsi kariirul, pa na ci Nasien ni Nabuëran, pa pëwël Israel kayaar-ibats, ni pëjampësaa ngëjuban.

³² Wund aci bamaatir ngëko ngi, wund ni Uwejats-ujënts wi Nasien-batsi wël wi baro ko wi na ja wi.”

Ko wi Gamaliel ja wi

³³ Bi ba te bi ko wan, ba riabats a ba ŋal pëfiŋ bukul.

³⁴ Maa, a nalon Nafariseu ni ka n jakee Gamaliel, nan ci najukan-ulua, ni bañaan rëmbani bëlieng, natsa di kato kawat-pëleents kawiak, a na tsu bukul ba pënani bapostolu utsand ko uties;

³⁵ a na ja bukul: “Bayënts Israel! Nda roan bëwaar tsi ko wi nduu ro wi bañaan biki.

³⁶ Par, ngënu ngi aruka ka baandi, a Teudas natsa atsu beenul pëci ñaan nawiak, a na jukëlan bayënts ban duakan biki ngëseent ngëbaakër; maa a na fiŋa, a ban do bukunk ka cikëndënul garandar bëlieng, a ko ba unk.

³⁷ A nuu par, a Judas kanpënë-ni-galileeya natsee tsi ngënu bëmarkaar, a na natsani bañaan bacumal a bu kë fetsul; a na fiŋa buts, a ban do biki ka fetsul garandar bëlieng.

³⁸ Inkri, má n ja ind: ind tsë lënkar bañaan biki, nda wëtan bukul ba tsëp; par uci uwejats bukul oo uleemp bukul ci wi bañaan-bajin, kee u niaman.

³⁹ Maa, uci u ci wi Nasien-batsi, nda yëlanats pëgar wul, pa ind tsii tsë jaka nda natsara pëkaman Nasien-batsi.”

⁴⁰ A ba niiran irim Gamaliel, ba rui bapostolu ee tucan bukul, a ba tsu bukul ba rits ñakan tsi uleka katim Yeesu, a ba wëtan bukul.

⁴¹ A bapostolu pën di kato kawat-pëleents kawiak, a ba lílan, undo bi ba winaa bi ba tsënkan pëjaa bë kawarëna tsi undo Katím ki.

⁴² A kara unu di kato-kayëman, ni di kara kato, bë wëtanats pëjukan ni pëleents Upetsan-uwar, Yeesu ci-un Këristu.