NGËRO 3 - KARÚK-PËRIM KAWALU Nouveau Testament

Nalab ayësana

¹ Ulon unu, a Per ni Joŋ kata tsëp kato-kayëman, pa bëñaan ngëler ngëwaants ngi bëtakala.

² A bañaa n ja ba roon bu kë tsëpand rul nalon niints nan bukee nalab; aja kara unu, në tsua tsi pëlëman kato-kayëman pi ka n jaka pi Pëlëman Kawara, pa puu yep bëtseend tsi bañaan biki ka niaj biki kato-kayëman.

³ Bi na win bi Per ni Joŋ, bu kë niaj kato-kayëman, a na yep bukul bëtseend.

⁴ A Per kaŋanul këkës ni Joŋ, a na ja: “Teen wund-e!”

⁵ A niints teen bukul ajuŋaman, na ja ne ka yank ko tsi bukul.

⁶ Maa, Per jaul: “Nji n kaats nin uncaam, nin uwëru; maa ko wi n ka wi, mán wëlu wul: Tsi katim Yeesu Këristu Kanpënë-ni-nasaret, natsaan kë yandaar!”

⁷ A na mobël tsi kañan kariir, na katul. Uyëk umënts wun, a itsiimul ni ngëwobël kak aliinc;

⁸ a niints cat anats, a na kur pëyandaar; a na niaj ni bukul di kato-kayëman, a nuu yandaar, a nuu cat, a nuu bëndan Nasien-batsi.

⁹ A bañaan bëlieng winul bi nuu yandaar bi, a nuu bëndan Nasien-batsi.

¹⁰ A ba yëkëran u ciul ci-un na do unk ka tsoar tsi Pëlëman Kawara kato-kayëman, koo yep bëtseend. A bañaan cum ni bëlal a ba pikra, undo ko un baandë-niul wi.

Uñakan Per di kato-kayëman

¹¹ Bi ba win bi niints mobëlar ni Per ni Joŋ, a bañaan bëlieng pikra, a ba tukari bukul di ukuera wi ka n jaka wi Ukuëra Salomon.

¹² Bi Per win bi ko wan, a na ja bañaan: “Bayënts Israel, we ka wun a nda pikra tsi ko wi? Oo, we ka wun nda kaŋani wund këkës pi aci pëyëlan wund, ni kayëk-ipës wund, ki wund tsuuna kun niintsi a nu yandaar?

¹³ Nasien-batsi Abraam, Nasien-batsi Isaak, Nasien-batsi Jakob, nul Nasien-batsi basin nja arëmban Yeesu, naleempul, ni nda gutsi a nda bërul tsi bërun Pilaatus, bi na ŋal bi pëwëtanul.

¹⁴ Maa ind, nda bër Najënts, Namabal, a nda yep pëwëtandëra nafiŋ-bañaan.

¹⁵ A nda fiŋ Kantsijëna ubiira nul ni Nasien-batsi natsanii di bacäts, a wund ci bamaatir.

¹⁶ Aci pëyëlan tsi katim Yeesu wël pun niintsi uyëlan; ko wi nda win wink a nda meend, arolaa ni uwak tsi katim Yeesu, par aci uwak tsi katimul yësan wun niintsi tsi bërun ind bëlieng.

¹⁷ A inkri, batsaar ni nji, man me nda roona tsi kameets-ko, pi bawiak ind buts.

¹⁸ Maa, unk di Nasien-batsi ro run ko wi na ro wi car aleents tsi mtum bayëlia bëlieng, aja: ‘Këristuul kee noorana.’

¹⁹ Nda yaari ibats, ndë witsësee tsi Nasien-batsi, pa ngëjuban ind pëfaawaa

²⁰ pa Ajug pëwël ind ngëwal pëjuabuts, në wëtani Këristu, nan datare indi, un ci wi Yeesu.

²¹ Nul ni batsi këtsij te uwal wi ngëko kak wi aci bëlieng, bi nga ro bi ka pëci, bi Nasien-batsi ro bi car aleents tsi mtum bayëliaul bayëman ki uwal ujon.

²² Par, Moises aja: ‘Nasien-batsi, Ajug ind, ka natsani nalon nayëlia tsi nda tsaar tsi, nan ci pi nji; ndii cikëndënul tsi ngëko ngi nu ja ind ngi bëlieng.

²³ A ñaan nan cikëndënatsi nayëlia namënts un, ka pënana tsi këkës bañaan.’

²⁴ Bayëlia bëlieng, pëkur-ni di Samuel te di ba nekul biki, bë leents buts uleka ngënu ngëmënts ngi.

²⁵ Ind nda ci babuk bayëlia, a nda ciind babuk karo-pëloole ki Nasien-batsi ro ki ni basin ind, bi na ja bi Abraam: ‘Tsi kajëru tsi mbuka umundu bëlieng kii jaraa tsun ngëwar.’

²⁶ Unk, Nasien-batsi anatsani naleempul, a na yëliul bërun tsi ind, pii jaar ind ngëwar, uja kara ñaan tsi ind në cikësiul tsi ngëkoul ngi kawaraatsa.”