NGËRO 28 - KARÚK-PËRIM KAWALU Nouveau Testament

Pol di unjiu Malta

¹ Bi wund bëër bi aband kankay, a wund me unjiu umënts wun kë jakaa Malta.

² A bañaan dul këmand wund uwar mak; bë taban bërua bëwiak, ba bofëlan wund bëlieng tsul, par usubal ka sub a u ujoonts ci.

³ A Pol boñi imul ee tsu di bërua, a uko-pëtsats ro ci ri imul, a uu túk uwamël, u fayar tsi kañanul.

⁴ Bi bañaan unjiu win bi uko-pëtsats laanta tsi kañanul, ba mob tsi pëjaalar: “Tsi ucär, niintsi aci nafiŋ-bañaan; par abuëri di bërëk, maa bëmabal Nasien-batsi yokanëtsul pëka ubiira.”

⁵ Maa, Pol líc uko-pëtsats di bërua, nin ko rootsul.

⁶ Bu ro ja ne Pol ka wuur oo ka yaa në yër ka cäts. Maa, ba lip aa ba noor, ba win ko rootsul, ba ru yaar ibats aja, nul aci nalon nasien-batsi.

⁷ Di kawok tsëko tsëmënts tsun, bërig aci rul, aci bi nawiak unjiu, ka jaka Publiu; nul welan wund un, a na tsooŋatsan wund uwar te ngënu ngëwaants.

⁸ Asin Publiu aro piints di bëkaab amaak, uliaful ayëkan a nu fëkan. A Pol niaj pëteenul, na paful iñan añaan, a na yësanul.

⁹ Bi na ro bi ko wi, a bamoj bacints ban ci biki di unjiu bi tsi Pol, a ba yësana buts.

¹⁰ A ni urispiitu uwiak, ba rispitaar wund; bi wund kë gija bi, a ba tsiji ngëko ngi wund fier ngi bëlieng tsi bëyaas, ee tsu di bëntsian.

Pëpën di Malta pëtsëp Rooma

¹¹ A u par këlí këwaants, a wund gija bëntsian Aleksandëria, ban paran bi pëtí di unjiu; bul amarkaara katim Dioskurus, un ci wi, basien-batsi ban ci biki batantëmb.

¹² A wund band Sirakusa, wund ro ngënu ngëwaants rul;

¹³ Dul, wund yaana kambaŋ a wund band përaasa Reejiu. Tsi unu ucints, a ufuts utsia-ucaak futs aro ngënu ngëtëb, wund band Puteoli,

¹⁴ di wund tsënkënari balon ban tsaar biki ni wund, a ba buara wund, wund përuka ni bukul ngënu paaj ni ulon. Unk di wund band run Rooma.

¹⁵ A ban tsaar biki ni wund ban ci biki rul te uleka wund, a ba bi te di Përaasa Aapiu, ni di tsëko tsi ka n jaka tsi Ngëloca-ngëwaants, pii jëk ni wund. A bi Pol win bi bukul, a na baran Nasien-batsi, na ci ni bëyeentsal.

Pol di Rooma

¹⁶ Bi wund band bi Rooma, a Pol niiranaa pëpats tsi nu ciina tsi, ni nasondaari ni ka waayuli.

¹⁷ A u par ngënu ngëwaants, a na ru bawiak Bajudeu; bi ba juk bi, a na ja bukul: “Batsaar ni nji bayënts! Kaats ko wi n do wi bañaan-ucaak nja nin kaats ko wi n do wi bëro basini njamaa, man dica di Jerusalem, a n bi gutsara iñan bañaan Rooma.

¹⁸ Bi ba yeparin bi, a ba ŋal pëwëtanin, par bë winats n do ulon ko u waraatsa wi un kës wi nji pëfiŋa.

¹⁹ Bi Bajudeu natsarain bi, wul ka wun a n ñaan pa pëtsijee tsi Seesar, maa nji i kaats ko wi ndë tumtsar wi bañaan nji.

²⁰ Wul ka wun dui ind, pa pëwin ind, ka leents ind. Par aci-undo uwats Israel ka wun n tanaa ni mkorante.”

²¹ Din, a ba jaul: “Wund yankats nin ulon uletar un pëni wi Judeeya, a u ñakan ulekau; nin nalon tsi batsaar ni nja pënatsi rul ee leents, oo ee jaaru ulon ko u waraatsa wi.

²² Maa, wund aŋal pëte ko wi m wejats wi bërieru. Par tsi ucär, wund ate uleka bëjukan bi, di ngëburu bëlieng bu ka ñakandar bul ngëwutsëtsuël.”

²³ A ba tsu unu ni Pol. Tsi unu umënts wun, a ba cumi ee jëk ni Pol di katoul, ki bëfa te bëtakala, na leents bukul uleka pësien Nasien-batsi ajëntsan. A nuu tsas pëtsu bukul ba niiran uleka Yeesu, bi na ci bi tsi pëñakan tsi uleka ulua-Moises, ni bayëlia.

²⁴ A u ka balon ban wak biki tsi ko wi na ja wi; maa balon wakats.

²⁵ A ba patsësar. A bu kë garandar, a Pol ja bukul përim pi: “Uwejats-ujënts añakanaan basin ind uwar, tsi mtum Isaaya, nayëlia, aja:

²⁶ ‘Tsëpan di bañaan biki, kë ja bukul: Tsi pëte, nduu te, maa nda ri ka me koon këme ko wi u pac wi. Tsi pëteen, nduu teen, maa nda ri ka win koon këwin ko.

²⁷ Par, ngëwaas bañaan biki atamb. Bu tú ibats bukul, a ba puman këkës bukul, pa ba rits winëna këkës, bu ka teena ibats bukul; pa ba rits yëkëran tsi ngëwaas bukul, bu ka witsee tsi nji, ka yësan bukul.’

²⁸ Bi u ci bank, nda mean pëbuër Nasien-batsi awëlee pa ban cits biki Bajudeu; bu ka te pul.”

²⁹ [Bi na ja bi ko wan, a Bajudeu pën pëtsëp, a ba tsij pëŋom pëwiak tsi ba ci tsi.]

³⁰ A Pol ci rul ngëwaanu ngëtëb ngëpëban, di kato ki na ciina ki a nuu luk bërierul; a nuu welan babi pëwinul bëlieng.

³¹ Ni bëyeentsal bëlieng, a nuu leents uleka Pësien Nasien-batsi, a nuu jukan ngi Yeesu Këristu, Ajug, te laaŋaatsa përo ank.