NGËRO 27 - KARÚK-PËRIM KAWALU Nouveau Testament

Pol agijaa pëtsëp Rooma

¹ Bi u baaraana bi wund pëgija pëtsëp Itaalia, a ba wël Pol ni balon barica, tsi iñan nalon kapëton basondaari, ni ka n jakee Juuliu, abofëna di kampañ basondaari nasien nawiak.

² A wund gija bëntsian Adramiitiu, ba pën pëyaana ikëŋ Aasia; wund tsëp tsi bul, a Aristaarku ñaan Masedoonia nan ciinee përaasa Tesalonika ci ni wund.

³ Tsi unu ucints, a wund band Sidon. A Juuliu këmand Pol uwar, a na wëtul na ya pëwin ifetsarul, pa ba tsënkul tsi ko wi na fier wi.

⁴ Upën wund tsul, wund paat ayaana kambaŋ bërëk Cipëri; par ufuts anatsaree wund.

⁵ Bi wund falëlan bi bërëk di kawok Siliisia ni Panfiilia, a wund band përaasa Liisia, pi ka n jaka pi Miira.

⁶ A kapëton basondaari tsënk rul bëntsian Aleksandëria, bi kan tsëp bi Itaalia, a na tsu wund pëgija bul.

⁷ A wund ya ni bëwaar aro ngënu ngëcumal. Ni unoor, wund band di kawok përaasa Këniidu. Bi wund yëlants bi pëkikara bërun, undo ufuts u natsaree wund wi, wund paat akaaya kambaŋ kabëlaŋ Këreeta, di kawok Salmoona.

⁸ A wund kaaya kambaŋ ni unoor, wund band tsëlon tsëko tsi ka n jaka tsi Ikëŋ-Iwar, di kawok përaasa Laseeya.

⁹ A u par ngëwal ngëcumal, a pëpaat ru juatsi, unu kabër-mlik ro par ba. A Pol tseend bukul ibats,

¹⁰ aja: “Bayënts, man win bëyaas nja bi kë tsiji unoor, ni kacok, ni pëyër pëcumal, cits iŋi ni bëntsian din, maa ngëbiira nja buts.”

¹¹ Maa, kapëton basondaari pe pëfiaar ajug bëntsian, ni kapëton bëntsian, ni pëjaa afiaar ngi Pol kë ja ngi.

¹² Bi pëkëŋ pëmënts pun waraatsa bi pëparanaan pëtí, a ban pe biki pëcum tsi bukul niiran pëpën tsul. A u teenaa ne ayëlana pëband Fenikës, pëlon pëkëŋ Këreeta, pi ka winaa pi di utsia-ucaak pëya umay-unu, ni di ruëts-ucaak pëya umay-unu; bu ka paranaan dul pëtí.

Ukëk di bërëk

¹³ Ufuts uties afutsi di kajara utsia-ucaak, a ba ja ne bë tsënkan ba ko wi ba ŋal wi, a ba pënani pësëtsi, a ba kaaya kawok unjiu Këreeta.

¹⁴ Maa, bi upar bi ko un jonats wi, a ukëk uwiak wi ka n jaka wi Eurakilon, natsee di kajara unjiu;

¹⁵ a u tsëpand bëntsian ni uyëlan, a katse yëlan pëpaatar uburu ufuts, a wund wët a ufuts kë tsëpand bëntsian.

¹⁶ Wund akaaya kambaŋ ulon unjiu uties wi ka n jaka wi Kauda. Ni unoor uwiak a wund yëlan pëbuëran bëntsian.

¹⁷ Bi ba riang bi bëntsian, a ba ro bëlieng ko wi ba yëlan wi, pa pëfay icär di bëntsian, a ba lënk përits kaaya di kawok Siirti, a ba welan kaleenj, bu kë tsëp unk.

¹⁸ Tsi unu ucints, bi ukëk tucan wund bi mak, a ba guts ngëko di bërëk, pa përafan bëntsian.

¹⁹ A tsi unu uwaajantsan, ni iñan bukul bërier bukul, a ba jej ngëko ngan ci ngi di bëntsian aguts di bërëk.

²⁰ A u ro ngënu ngëcumal, unu pënatsi, nin upesaj; a ukëk uwiak kë tucan wund, a wund katse wamand uwats pëjaa wund abëër.

²¹ Bi ba rialaatsa bi aro ngënu ngëcumal, a Pol nats tsi pëncuaf bukul, a na ja: “Bayënts, nda ro ka pëcikëndënin, përits pëni di Këreeta, pa përand kacok ki ni kaniaman ngëko.

²² Maa, tsi inkri man ñaan ind, nda fiaari, par nin naloole tsi ind di ka piirir ubiira. Maa bëntsian din ka niam bun.

²³ Par, tsi bërëm bi, ulon uwaanju Nasien-batsi, nan kaini, ni n du leempari, acili tsi bërun nji,

²⁴ a u ja: ‘Cäts lënk, Pol! M ka pëtsëpanda di bërun Seesar. Teenan-e! Nasien-batsi awëlu ngëbiira bañaan ban ci biki bëlieng ni wi tsi bëyaas.’

²⁵ Bi u ci bank, bayënts, nda fiaari! Par nji man fiaar tsi Nasien-batsi ko wan kë ci pi u leentsin punk.

²⁶ Maa, ngë ka pëkaaya ulon unjiu.”

²⁷ Bi u band bi ngërëm untaaja ni ngëbaakër, a ukëk kë pambar wund imbaŋ bërëk Adriatik; tsi myëŋ ucaak, a baleemp di bëntsian yëkëran ba wokan ulon ucaak.

²⁸ A ba welan pëniibi a ba ka ngëtaara ngëntaaja ngëtëb. Wund kikara bërun ko uties, a ba kaka welan pëniibi, a ba ka ngëtaara untaaja ni kañan.

²⁹ Bi ba lënk bi pëwúbar di tsëko ilaak, a ba welan kësëtsi këbaakër di ufets bëntsian; a bu kë ñaan pa unu pëjënts.

³⁰ A baleemp di bëntsian kë tsas pëtuk ba bër bëntsian, a ba welan ubooti di bërëk, bu kë ro pi bë ŋal pëwelan isëtsi di bërun bëntsian.

³¹ A Pol ja kapëton basondaari, ni basondaari: “Uci baleemp biki rukaatsa di bëntsian, ind, nda ri ka yëlan pëbuër.”

³² Din, a basondaari fal icär ubooti, ba wët wul u laayatsa.

³³ Bi unu kë jënts bi, a Pol buara bañaan bëlieng pa ba riala, a na ja: “Ntsari aro ngënu untaaja ni ngëbaakër, ki nda reets ki ko. Nda ci tsi pëlip, a nda reets ko.

³⁴ Wul ka wun n du buara ind: nda rean ulon ko, unk ndë yëlan pëka pëyës; par nin nalon tsi ind di ka yëlan ŋal kaweel kaloole.”

³⁵ A bi na ja bi ko wan, a na jej pëpom abaran Nasien-batsi tsi bërun bañaan bëlieng, a nuu ba, a na tawës pul akur përe.

³⁶ Din, a ba cum bëlieng ni bëyeentsal, a ba kur buts përe.

³⁷ A wund ro ci bañaan ngëseent ngëtëb ni ngëntaaja paaj ni ulon, ni bañaan paaj (276), di bëntsian.

³⁸ Bi ba riala bi asuëts, a ba guts mmaaj di bërëk pa përafan bëntsian.

Bëtsian amíj

³⁹ Bi unu jënts bi, bë yëkëranats kankay, maa ba win bëlon buncuaban, ban ka bi kambaŋ bërëk. Din a ba wejatsar, ne bë yëlan ank pëkaayan bëntsian tsul.

⁴⁰ A ba pënani isëtsi, ba wët wund, wund kë tsëp tsi bërëk; a ba wëtan buts ipaati. A ba taarar ufuts kaleenj di bërun bëntsian, a ba pënar kayii-bërëk.

⁴¹ Maa, bee kobar di untunda mboos, tsi ngëmaroŋ ngëtëb jëk tsi, a bëntsian nats tsul, a bërun bëntsian luafar, a katse yëlan përaŋar, a ngëmaroŋ mayan ufets bëntsian ni uyëlan.

⁴² Basondaari ro wejats pëfiŋ barica, pa nin nalon bukul përits lam na bëër.

⁴³ Maa, kapëton basondaari ŋal pëbuëran Pol, a na laaŋ bukul përo ko wan. A na tsu ba yil bukunk pëlam, ba cakës pëwela di bërëk, pa pëlamar kankay.

⁴⁴ A na tsu buts ban duka bukunk, ba mob tsi itagëba, balon ka mob tsi ifálësar bëntsian. Unk ri bañaan bëër run bëlieng a ba band kankay.