NGËRO 26 - KARÚK-PËRIM KAWALU Nouveau Testament

Pol añakan tsi bërun Agëripa, nasien

¹ A Agëripa ja Pol: “Aniiranaa wi pëpokar beenu.” Din a Pol taar kañan, a na kur pëpok, aja:

² “Agëripa, nasien, man lílan bi n tseenda bink ntsari tsi bërunu, nji pëpok ngëko bëlieng ngi Bajudeu tumtsarin ngi,

³ andes bi m ka bink ume tsi uleka bëro Bajudeu, ni tsi uñakan un ci wi tsi bukul bëlieng. Wul ka wun, a ndu n ñaanu kë jampësa kë cikëndënin.

⁴ Tsi uleka ubiira nji, bi u par bi ja ki ujuundi, bi wam bi napäts di bañaan nji di Jerusalem, bukul Bajudeu me bëlieng.

⁵ Aci ucär, bë mein ki ujuundi; uci ba ŋal, bë yëlan pëleents ko wan. Par man yandaar këfariseu tsi bëjukan ban pats bi, bul ban pe bi pëliinc tsi bëga wund.

⁶ A inkri, a n ci tsi pëwataa pëleents, undo uwats wi Nasien-batsi watsan wi basin wund.

⁷ Wul wi këbuka wund untaaja ni këtëb kë lip wun u bandan, a bu kë leempar Nasien-batsi tsi ngëwaas bukul bërëm ni pënak. Agëripa, nasien! Aci-undo uwats wi, wi Bajudeu kë tumtsarin wun.

⁸ We ka wun a nda wejats aja, Nasien-batsi pëtsu bacäts ba natsee yëlanats pëfiaara?

⁹ Tsi ucär, man do ja ne man ka përo ngëko ngëcumal pa pëkaman katim Yeesu, nul Kanpënë-ni-nasaret.

¹⁰ Ko wan ci wun wi n do wi di Jerusalem; bañaan Nasien-Batsi bacumal, man guts bukul di ukalabus. Par, bawiak-bajakan, bë niiranin përo ko wan. Bi bu kë lacana bi pa pëfiŋa, a n niiran.

¹¹ Man pikaar bukul ngëyaas ngëcumal di ito-ijuki bëlieng; te a n tsu bukul ni uyëlan puu kar Nasien-batsi. Ni uriab uwiak wi tsijar wi bukul, a ndu noor-nooran bukul, te ŋal di iraasa itsooŋ.

¹² Tsi pëwejats përo ngëmënts ngun, a pën pëtsëp Damaasku, a n tsëpand pëyëlan ni kayëlia ki yank ki di bawiak-bajakan.

¹³ Ina Agëripa, nasien! Bi n ci bi di bëga pëtsëp, tsi uson-unu a n win ufac fietsi di batsi ape unu, a u fiets afayin ni ban ci biki ni nji.

¹⁴ A wund yër bëlieng tsi utsia, a n te përim ñakanaanin tsi pëlents Uyebëreu, aja: ‘Sol, Sol! We ka wun a kë noor-nooranin? Wi pëkaman ko un jul wi, ka ciu ko u ñats wi.’

¹⁵ Din a n yepar pul a n ja: ‘M ci yën, Ajug-a?’ A Ajugjankma, aja: ‘Nji ci-un Yeesu, ni kë noor-noorani.

¹⁶ Maa, natsaan nats ni itsiimu. Par wul ka wun pibandari tsi bërunu, pa pëtsuu pëci naleemp, kë ciind namaatir, tsi ngëko ngi m win ngi tsi nji, ni ngi kii win ngi kak tsi nji.

¹⁷ Mán randanu bañaanu ni ban cits biki Bajudeu, di ndu yëlu ri,

¹⁸ kë waants bukul këkës, kë pënani bukul di karëm, pa ba bi tsi ufac; kë pënani bukul di pëyëlan Useetaani pa ba bi tsi Nasien-batsi, bu ka jampësaa ngëjuban, bu ka yank kafa bërukanda tsi ban patsanaana biki uwak tsi nji.’

¹⁹ Unk, Agëripa, nasien, nji i pokats përo ko wi win wi di bëwinal batsi;

²⁰ maa, man cakës pëleents bañaan Damaasku përim, ni di Jerusalem buts, ni di Judeeya bëlieng, ni ban cits biki Bajudeu, pa ba yaar ibats, bu ka witsësee pa Nasien-batsi, bu ka mob tsi përo ngëko ngi kan piban ngi ba yaar ibats.

²¹ Wul ka wun, bi n ci bi di kato-kayëman, balon Bajudeu mobin, a bu kë tsas pëfiŋin.

²² Maa, Nasien-batsi tsënkin a wama ci te pënak pëntsari; nji i kaats ko wi ndë leents wi upäts ni bawiak, ucits ba ko wi bayëlia ja wi ni Moises kee u ci,

²³ un ci wi, Këristu aka pëci tsi unoor, në ci nacäk ni ka natsee di pëcäts, në leents Bajudeu ni ban cits biki Bajudeu, uleka ufac.”

²⁴ Bi Pol wama bi ka pokar beenul, a Festu kat përim afalëlanul uñakan aja: “M yër-ngëwi, Pol! M juk mak a ba tsuu a m fuur!”

²⁵ Maa, Pol ja: “Ina Festu, niints nawiak! Nji n fuurats, maa, man leents irim ucär ni uwejats utsëkal.

²⁶ A n du n ñakan ni bëyeentsal tsi bërun Agëripa, nasien, par man me na me ko wan bëlieng, a me u kaats nin ko wi na meets wi; par ko wan dolaatsa tsi kambeku.

²⁷ Agëripa, nasien! M wak tsi bayëlia Batsi a? Ma me m wak.”

²⁸ Din, Agëripa ja Pol: “Ko uties kë tsuin pëci ñaan-Këristu.”

²⁹ A Pol jaul: “U jonats uu, u jon uu, man ñaan Nasien-batsi, cits pa wi rin, maa pa biki kan cikëndënin bikink bëlieng ntsari, pa nda ci pi nji, ucits ba ni mkorante mi.”

³⁰ Bi na ja bi ko wan, a nasien natsa, ni na tsijëna-pëboos, ni Berëniisi, ni bando biki tsoar ni bukul.

³¹ Bi ba kikësa bi, a ba ñakan tsi ba ci tsi aja: “Niintsi roots ko un kës wi pëjaa afiŋa, oo arica.”

³² Din, a Agëripa ja Festu: “Niintsi aro yëlan pëwëtanaa, uci na roots ñaan pëtsëpanda di Seesar.”