NGËRO 25 - KARÚK-PËRIM KAWALU Nouveau Testament

Pol di bërun Festu

¹ Bi Festu yank bi pëboos a tsijëna, a u par ngënu ngëwaants, a na pën di Seesareeya akata Jerusalem;

² a bawiak-bajakan, ni bawiak Bajudeu band di nul ee keesar Pol.

³ A ba buaraul mak, ba ñaanul na tsënk bukul në natsara Pol, në tsuul na tsëpanda Jerusalem; a ba ro pëgungan pa pëfiŋ Pol di bëga.

⁴ Maa, Festujankma aja: “Pol arica di Seesareeya; nji bërierin mán tsëp rul inkri.

⁵ Ban ci biki bawiak tsi ind, ba juŋaan ni nji. Uci ba win niintsi ro ulon ko u waraatsa wi, bu ka tumtsarul.”

⁶ A Festu ci ni bukul aro ngënu ngan peets ngi këwas oo untaaja, a na wela atsëp Seesareeya. Tsi unu ucints, a na tsoar di kato kawat-pëleents, na tsu bañaan ba tsiji Pol.

⁷ Bi Pol baandi bi, a Bajudeu ban pëni bukunk Jerusalem fayul, a ba kur pëtumtsarul tsi ngëko ngëcumal ngan waraatsa ngi; maa tsi ngëmënts ngan, bu kaats ko wi kan piban wi nga ci ngëcar.

⁸ Maa, Pol pokar beenul aja: “Nji ndoots nin ujuban tsi uleka ulua Bajudeu, nin tsi uleka kato-kayëman, nin tsi uleka Seesar.”

⁹ Din, a Festu ŋal Bajudeu pëlilandërul, a na yepar Pol: “M ŋal pëtsëp Jerusalem kee n watu pëleents rul tsi uleka ngëko ngi-a?”

¹⁰ Maa, Pol jaul: “Man ci tsi bërun bañaan kato kawat-pëleents, ki Seesar, nasien nawiak; tsul tsi n ka tsun pëwataa pëleents. Bi m me bunk uwar, nji n doots nin ulon ko u waraatsa wi tsi uleka Bajudeu.

¹¹ Par man yecandër pëcäts, uci ndo ko u waraatsa wi, un kës wi nji pëfiŋa; maa, uci ngëko ngi ba tumtsarin ngi cits ucär, ñaan di ka yëlan pëgutsin tsi iñan bukul. Man ñaan tsëpanda di Seesar.”

¹² Bi Festu ba bi pëñakan ni bawat-pëleents, a najankma aja: “M ñaan pëtsëpanda di Seesar; kë tsëp di Seesar.”

Festu di bërun Agëripa, nasien

¹³ A u par ngënu, a Agëripa, nasien, band Seesareeya, nul ni Berëniisi, pa pii leena Festu.

¹⁴ Bi ba ro bi ngënu ngëcumal rul, a Festu leents nasien uleka Pol, aja: “Aka tsi nalon niints ni Felikës ruki di ukalabus;

¹⁵ nul ni bawiak-bajakan, ni bawiak Bajudeu keesar un tsi bërun nji; bi n ci bi di Jerusalem, a ba ñaanin pa na lacana.

¹⁶ A njankëma bukul a n ja, ko wi cits bëro bañaan Rooma: Pëlacan ñaan te ban tumtsarul biki maatirëts pa na pok ko wi ba tumtsarul wi.

¹⁷ A bi ba baandi bi tsi, tsi unu ucints, jonats a n tsoar di kato kawat-pëleents, a n tsu bukul ba tsiji niints namënts un.

¹⁸ Maa, bi batumtsarul natsa bi, bë jaaratsul nin ko u waraatsa wi, tsi ngi ndo ngi ja ne aro.

¹⁹ Bu tsijandiul ngëlon ngëñakan tsi uleka bëga bukul bërier bukul, ni tsi uleka nalon niints ni ka n jakee Yeesu, nan cätsi, maa nul Pol ja aci nayësal.

²⁰ Nji n meets bi n yil bi pëme uñakan wi uwar, a n yeparul ne aŋal pëtsëpanda Jerusalem nii wataa pëleents rul, tsi uleka ngëko ngi.

²¹ Maa, Pol ñaan na wëta di ukalabus, Seesar kee watul pëleents; a n tsuul na ruka di ukalabus, aa kee wëtanul na tsëpanda di Seesar.”

²² Din, a Agëripa ja Festu: “Nji buts mando ŋal pëcikëndën niintsan.” A festujankma aja: “Faan kë cikëndënul.”

²³ Tsi unu ucints, Agëripa ni Berëniisi baandi ni bacumal; bi ba niaj bi di usaala kawat-pëleents ni bawiak basondaari ni bawiak përaasa, a Festu ja, Pol tsijee.

²⁴ A Festu ja: “Agëripa, nasien, ni ind bëlieng ban ci biki tsi ni wund, nda win niintsi; kandënd Bajudeu bëlieng abi di nji di Jerusalem, te ŋal tsi, a bu kë lië koo ja, niintsi kaats pëwama ka yafënts.

²⁵ Maa, ma win na kaats ko wi na ro wi, un kësul wi pëfiŋa. Bi na ñaanin bi pëtsëpanda di Seesar a baaraan pëwëtanul nul pëtsëp di Seesar.

²⁶ Maa tsi ulekaul, in kaats ko wi n du pican wi pa Nawiak. Wul ka wun tsijiul tsi bërun ind, andes tsi bërunu, wi Agëripa, nasien; në yeparaa a uu ba, nji, ka ka ko wi n du n pican wi.

²⁷ Par, pëwëtan narica na tsëpanda, te ngi na tumtsara ngi leentsaatsa, ma win u cits ko u mab wi.”