NGËRO 24 - KARÚK-PËRIM KAWALU Nouveau Testament

Pol di bërun Felikës

¹ Bi u par bi ngënu kañan, a Ananias nan pei pëci nawiak-bajakan juŋa tsëp Seesareeya, nul ni balon bawiak Bajudeu, ni nalon nawat-pëleents ni ka n jakee Teertulus; a ba band ee keesar Pol di bërun nasien.

² Bi Pol ruee bi, a Teertulus kur pëtumtsarul koo ja: “Felikës, niints nawiak, undou ka wun wund ka pëfac; a tsi undo bëlipalu buts, ngëko ngëwar rolaa pa pënaakësan bañaan.

³ Di ngëleka bëlieng, ko wi, wund ayëkëran wul, a wund kë jau baran.

⁴ Maa, pa përits lawan tsi uñakan, man ñaanu kë jampësa kë cikëndën wund ko uties.

⁵ Par, wund awin niintsi ci nagëbëlan, a nuu tsiji pëŋom tsi pëncuaf Bajudeu ban gara biki ajëk umundu; a na ci buts nawiak itawar bëjukan bañaan Nasaret ban pats bi.

⁶ A na ŋal buts pëtsopan kato-kayëman, a wund mobël; wund ro ŋal pëwatul pëleents bi ulua wund tsu bi, [

⁷ maa Liisias nawiak basondaari baandi ee yankëna wund nul ni ufors]

⁸ a na tsu batumtsarul ba bi tsi bërunu. Wi bërieru m yil pëyeparul uwar, kë me ngi wund tumtsarul ngi bëlieng ci.”

⁹ A Bajudeu niiran buts ngëmënts ngan ci ucär.

¹⁰ Bi nasien wiil bi Pol pa na ñakan, a Pol jankma aja: “Ma me m ci nawat-pëleents bañaan ucaak wi, a m do ngëwaanu ngëcumal; wul ka wun n yeents pëpokar been nji.

¹¹ M yil pëyepar kë me, parats ngënu untaaja ni ngëtëb ki n kate ki tsëp pëjintëla Nasien-batsi di Jerusalem.

¹² Bu tsënkatsin a n dë ŋom ni ñaan di kato-kayëman, nin pënatsara bañaan di kato-kajuki, oo di tsëlon tsëko di përaasa;

¹³ nin bu yëlants pëpiban ucär tsi ngëko ngi bu kë jaarin ngink inkri.

¹⁴ Maa, mán pets n jau, ma nja n doon koo leempar Nasien-batsi basin wund tsi Bëga bi ba ja bank ‘bëtawsër bëjukan ban pats bi;’ a n wakand tsi ngëko bëlieng ngan bofëna ngi tsi ulua, ni tsi bëpican bayëlia.

¹⁵ Man ka uwats tsi Nasien-batsi, pi bamënts biki buts, un ci wi, kanatsee-di-pëcäts aci pa bamabal ni bamabats.

¹⁶ Wul ka wun, a n do buts uyëlan pa pëwëtaants pëtsij uwejats utsëkal tsi bërun Nasien-batsi, ni tsi bërun bañaan-bajin.

¹⁷ A u par ngëwaanu ngëcumal, a n tsiji bëtsënk pa bañaan nji, ni pëwël buts ngëtseend pa Nasien-batsi.

¹⁸ Bi n ci bi tsi përo ko wi, a balon Bajudeu ban pënë-ni biki Aasia winin di kato-kayëman, a n jëntsandar ba; i cits di kandënd bañaan, nin di baruuj.

¹⁹ Maa balon Bajudeu Aasia ka bukun pënats tsi bërunu, pa uci ba win n do ulon ko, bu ka tumtsarin;

²⁰ oo biki bërier bukul ba leentsan ne bu win n do ulon ko u mabats wi, bi n nats bi di bërun Bëjúk bawat-pëleents bawiak.

²¹ Ucits ba përim pi baŋ, pi kat pun tsi pëncuaf bukul, a n ja: ‘Tsi uleka kanatsee bacäts ka wun ci tsi pëwataa pëleents ntsari tsi bërun ind.’”

²² A Felikës nandoi me ba uwar uleka ngëko Bëga, din a na kik uñakan, a na ja: “Uwal wi Liisias nawiak basondaari baandi wi, kee me pi ndu baaraan pi tsi uleka ind.”

²³ A na tsu kapëton basondaari na ríc Pol di ukalabus, maa në wëlul pëfac ko uties, nul tsë laaŋ bayiicul pëkëmandul.

Pol añakan tsi bërun Felikës

²⁴ A u par ngënu, a Felikës ci ni aarul Drusila nan ci Najudeu, a na yël bañaan ba rui Pol; a na cikëndënul tsi uleka uwak tsi Këristu Yeesu.

²⁵ Bi Pol ci bi tsi pëñakan tsi uleka bëmabal, ni butsëkal, ni kawat-pëleents ki kan bi ki, a Felikës lënk a na ja: “Tsi inkri m yil pëtsëp, mán yaa njala, ka ruiu.”

²⁶ Tsi uwal umënts wun buts, na ro ja ne Pol ka wëlul uncaam; wul ka wun, na ro ja ko uties, në ruiul koo ñakanaanul.

²⁷ A u par ngëwaanu ngëtëb, a Poorsiu Festu bi yank pëlas Felikës. Bi Felikës ŋal bi Bajudeu pëlílandërul, a na wët Pol di ukalabus.