NGËRO 23 - KARÚK-PËRIM KAWALU Nouveau Testament

¹ A Pol kaŋan Bëjúk bawat-pëleents bawiak këkës, a na ja: “Batsaar ni nji bayënts, man yandaar tsi bërun Ajug ni uwejats uwar un ci wi-ba këci, te unu untsari.”

² Maa, Ananias nan pei pëci nawiak-bajakan, tsu ba nats biki awokul, pë kobël tsi mtum.

³ Din, a Pol jaul: “Nasien-batsi ka kobun, wi, pëlënk pan faacana pi! Wi m tsoar tsi pa pëwatin pëleents bi ulua tsu bi, a m cok ulua, a m tsu bañaan ba kobin?”

⁴ A bando biki nats tsi Pol jaul: “M ci tsi pëkar nan pei pëci nawiak-bajakan Nasien-batsi-a?”

⁵ A Pol jankma aja: “Batsaar ni nji, in doots me ne nul ci-un nan pei pëci nawiak-bajakan; par iink picana run: ‘M di kë jaar bañaan pësienu ko u waraatsa wi.’”

⁶ Tsi Bëjúk bawat-pëleents bawiak, Pol ame kalon kajara aci ki Basaduseu, a kacints ci ki Bafariseu, a na kat përim aja: “Batsaar ni nji bayënts, nji man ci Nafariseu, abuk Nafariseu. Undo bi n wats bi tsi kanatsee-di-pëcäts, wul ka wun n du wata pëleents.”

⁷ Bi na ja bi ko wan, a u tsiji pëŋom pëwiak tsi Bafariseu ni Basaduseu, a kandënd bañaan patsësar.

⁸ Par Basaduseu aja, kanatsee-di-pëcäts cits, nin uwaanju, nin ucaay; maa Bafariseu niiran ngëmënts ngan bëlieng.

⁹ Din, a irim watsësari; balon tsi bajukan-ulua tsi kajara Bafariseu, natsa apok, a bu kë ja: “Wund winats nin ko u waraatsa wi tsi niintsi; yën me un ne ulon ucaay ñakanaanul wun, ane uwaanju ank?”

¹⁰ Bi pëŋom kë peelar bi, a nawiak bawaay lal bukul pii falës-falësan Pol, a na tsu bawaay ba wela bu kee pënaniul di pëncuaf bukul, bu ka tsëpandul di tsëko-basondaari.

¹¹ Tsi bërëm ban neki bi, Ajug pibandar tsi bërun Pol a na ja: “Liincandari! Par, bi m leents bunk uleka nji di Jerusalem, unk di m ka run pëleents buts uleka nji di Rooma.”

Pëgungan pa pëfiŋ Pol

¹² Bi unu jënts bi, a Bajudeu júk, a ba baajara ngëjuatsal pëbaandë-ni bukul, ni përits re ko, nin përaan, uci ba fiŋats Pol.

¹³ Ban baajara biki ko wan, bu pe bañaan ngëntaaja ngëbaakër.

¹⁴ A ba tsëp ee winar ni bawiak-bajakan, ni bawiak Bajudeu a ba ja: “Wund aro baajara ngëjuatsal pëbaandë-ni wund, ni përits re ko, uci wund fiŋats Pol.

¹⁵ Inkri, ind, ni Bëjúk bawat-pëleents bawiak, nda ñaani nawiak basondaari na rëŋani ind nul faan, pi ka yeparaa ulon ko kak tsi ulekaul; wund ka yecisër pa pëfiŋul tsini urukaul ka baandi.”

¹⁶ Maa, bi ayimi Pol, niints, te bi pëgungan pan, a na tsëp ee niaj di tsëko-basondaari, a na car leents Pol ko wan bëlieng.

¹⁷ Din, a Pol rui nalon tsi ipëton basondaari, na jaul: “Tsëpandi upaas wi di nawiak basondaari, par aka ko wi nu leentsul wi.”

¹⁸ A na mobël atsëpand di nawiak basondaari, a na ja: “Pol nan dica unk, aruin a na ñaanin pa nji pëtsiji upaas wi tsi bërunu, par aka ko wi nu leentsu wi.”

¹⁹ A nawiak basondaari mobël tsi kañan akikësaanda, a na yeparul aja: “We wi m ka wun pa pëleentsin?”

²⁰ Upaasjankmaul aja: “Bajudeu abaar pëloole, pëñaanu, pa wi pëtsëpand Pol faan di Bëjúk bawat-pëleents bawiak; bu ro pi bu ŋal pëtsas pëme un pe wi pëjënts, tsi ulekaul.

²¹ Maa, cats fiaar, par tsi ba ci tsi, bu pe bañaan ngëntaaja ngëbaakër, ban baar biki pëloole a ba baajara ngëjuatsal pëbaandë-ni bukul, ni përits re ko, nin përaan, uci ba fiŋatsul; a inkri, yecisër bukunk a bu kë lip ko wi kë ja wi.”

²² A nawiak basondaari ja upaas: “Cäts leents ñaan m ñakanaanin ko wan.”

Pol atsëpanda Seesareeya

²³ A na rui ipëton basondaari itëb, a na ja bukul: “Nda yecis basondaari ngëseent ngëtëb, ni batukand ngëmpëlënc, bañaan ngëntaaja paaj ni ulon, ni bañaan ngëseent ngëtëb, biki ingare, pa pëtsëp Seesareeya, uband ngëwal këwas ni ulon ngi bërëm.

²⁴ Nda yecis buts ngëncaam pa pëgijëna Pol në tsëpanda uwar di Felikës, na tsijëna-pëboos.”

²⁵ A nawiak basondaari pican uletar aja:

²⁶ “Nji Klaudiu Liisias, ma wël iu mboos, wi Felikës, na tsijëna-pëboos, nawiak!

²⁷ Bajudeu amob niintsi a u ruka ko uties bu ka fiŋul, a n dë band ni basondaari, a n bëëranul, par man te ba ja, nul aci ñaan Rooma.

²⁸ A ndo ŋal pëme ko un ka wi ba tumtsarul, a n tsëpandul di Kato bukul ki kawat-pëleents kawiak.

²⁹ Man tsas, a n win uci-undo ngëko ulua bukul, ka wun ba tumtsarul; maa kaats ko wi na ro wi, un tsënkan wi pëjaa afiŋa, oo arica.

³⁰ Bi n leentsa bi Bajudeu ci tsi përoor niintsi pëgungan, din a n wëtandariu nul; a n tsu batumtsarul ba bi buts, bu kee leents tsi bërunu ko wi ba kaar wi ni nul. Ciin uwar.”

³¹ A basondaari ro ko wi ba tsua wi përo, ba jej Pol bërëm atsëpand te Antipaatëris.

³² Tsi unu un neki wi, a ba witsee tsëko-basondaari, ba wët batúkand ngëmpëlënc ba ñuatsan Pol.

³³ Bu kë band Seesareeya, ba wël nasien uletar, a ba pibanul Pol.

³⁴ A nasien juk uletar a uu ba, na yepar Pol pëboos pi na ciina pi; bi na me bi na ciina Siliisia,

³⁵ na ja: “Mán cikëndënu uwal wi batumtsaru kë baandi wi.” A na tsu na gaarira di kato Eroodis ki pësien.