NGËRO 21 - KARÚK-PËRIM KAWALU Nouveau Testament

Pol tsi bëga Jerusalem

¹ Bi wund patsësar bi ni bukul, a wund gija bëntsian, amab pëtsëp Kos. Unu ucints wund band Rodes; a wund pëndul atsëp Patara.

² A wund tsënk bëlon bëntsian bi ka ya bi Feniisia, a wund gija bul pëtsëp.

³ Bi wund ruka bi yueran Cipëri, wund rukar dul kajara kamay, wund par pëtsëp Siiria; a wund band Tiiru di bëntsiando ri ka pëgíjësaan pëyunts.

⁴ Wund aro rul ngënu paaj ni ulon, par wund atsënk rul bafets Yeesu; tsi pëyëlan Uwejats-ujënts ba ja Pol, nul tsë ya Jerusalem.

⁵ Maa, bi wund paran bi ngënu ngëmënts ngan, wund pën amab bëga pëtsëp; bukul bëlieng, ba ñuatsani wund ni bakaats ni upäts te wund kë ba përaasa, wund jintëla bëlieng tsi kambaŋ bërëk a ñaan.

⁶ Din a wund patsësar ni bukul, a gija bëntsian, maa bukul ba witsa ito bukul.

⁷ Bi wund ba bi pëpari Tiiru, wund band Pëtolemais; a wund wël bafets Yeesu mboos; ban ci biki rul aro unu ni bukul.

⁸ Unu ucints, a wund pën atsëp Seesareeya. Bi wund niaj bi kato Filip naleents-përim, nul nan ci nalon tsi Paaj bukun Ni Nalon, a wund welan di katoul.

⁹ Nul Filip, aka babukul bampëli babaakër ba meets biki niints, ban ja biki ba roon bu kë leents ngëko Nasien-batsi ngi kan bi ngi.

¹⁰ Bi wund ka bi rul ngënu ngëcumal, a nalon nayëlia ni ka n jakee Agabës pëni di Judeeya abaandi.

¹¹ Na bi di wund, a na jej katël Pol atanar itsiim ni iñan, a na ja: “Iink di Uwejats-ujënts ja run: ‘Niints nan kai katël ki, unk di Bajudeu kë tanul run di Jerusalem bu ka gutsul tsi iñan ban cits biki Bajudeu.’”

¹² Bi wund te bi irim yan, wund buara Pol na wët pëkata Jerusalem.

¹³ Maa, Pol jankma aja: “We tsu wun a ndu rug, a ndu cokin uwaas? Nji man yecis, cits pëjaa pëtana rin, maa pëcäts di Jerusalem undo katim Yeesu, Ajug.”

¹⁴ Bi wund yëlants bi përaacul, a wund jaul: “U rolaan bi Ajug ŋal bi!”

¹⁵ Upar ngënu ngëmënts ngun, bi wund ba bi mayecisër, wund kata tsëp Jerusalem;

¹⁶ a balon bafets Yeesu ban pënë-ni biki Seesareeya ñuatsani wund, ba tsëpand wund pii ci di kato Mnaason nan pënë-nii Cipëri, nul ajon ki na ci ki nafets Yeesu.

Pol aya pëteen Jakob

¹⁷ Uband wund Jerusalem, a bafets Yeesu welan wund ni ulílan.

¹⁸ Tsi unu ucints, Pol tsëp ni wund di Jakob a bajëŋal Ngëriisia bëlieng ro ci rul.

¹⁹ Pol leena bukul a na leents bukul ngëko ngi Nasien-batsi ro ngi, uloole-uloole tsi uleempul tsi pëncuaf ban cits biki Bajudeu.

²⁰ Bi ba te bi ko wan, ba bëndan Nasien-batsi a ba ja Pol: “Natsaar ni wund! Ngëmiil ngëntaaja um ngi Bajudeu ba uwak biki gi mwin gun, bukul bëlieng bu yëkan tsi ulua.

²¹ Maa, bë me bëlieng ko wi kan par wi tsi ulekau, bi kë jukan bi Bajudeu ban ci biki tsi pëncuaf ngëcaak pa ba bër ulua-Moises, a kë ja bukul, bukul tsë welan upäts bukul kambac, bukul tsë fets ko un tsuaa wi.

²² A we wi ngë ka wun përo? Tsi ucär, bu ka me m baandi.

²³ Maa, roan ko wi wund kë jau wink: wund a tsij bayënts babaakër bando biki tsup përim.

²⁴ Jejan bukul tsëpand, kë jëntsandar, bu ka jëntsandar buts, kë pënan uncaam ka lukar bukul bu ka tie iyeen. Bu ka me bëlieng ko wi ba leents wi tsi ulekau cits ucär, par wi buts bërieru m do ko wi ulua ja wi.

²⁵ Tsi uleka ban cits biki Bajudeu a ba ruka wak, wund apicar bukul ko wi wund baaraan wi, pa bukul përand përe ngëyamats ibool, përand kare pëñaak, ni përand përe ngëyamats ngëcaam ngan bota ngi itsúts a nga cäts, ni përand ngëko katúk-ufuts.”

²⁶ A Pol tsëpand bayënts bamënts bukun, tsi unu ucints, na ro bëjakan manjëntsandar ni bukul. A na niaj kato-kayëman pa pëleents unu wi bu kë ba wi ngënu manjëntsandar, bëtseend ka wëlaa pa kara ñaan nan ci tsi bukul.

Pol amobaa

²⁷ Bi ngënu paaj ni ulon ngun wokan bi pëba, a Bajudeu ban pënë-ni biki Aasia win Pol di kato-kayëman, ba suali kandënd bañaan bëlieng, a ba mobël.

²⁸ Bu kë lië koo ja: “Bayënts Israel, nda tsënk wund! Niints ni, ci un ni ka yaani ngëcaak bëlieng koo jukan pënatsara bañaan, pënatsara ulua, ni pënatsara tsëko tsi; nul bërierul aniajandi Bagërek di kato-kayëman, a na tsopan tsëko-tsëyëman tsi.”

²⁹ Par, bë ro win Troofimu kanpënë-ni-Efeesu, na ci ni nul di përaasa, a ba ja ne Pol aniajandul di kato-kayëman.

³⁰ A përaasa bëlieng gúsëlar, bañaan kë pëni di ngëburu bëlieng; a ba mob Pol apuulul apënan utsand kato-kayëman, ucar umënts wun ilëman dicaa.

³¹ Bu kë tsas pëfiŋul, a nawiak basondaari te u jaka Jerusalem bëlieng agëbëlar.

³² Din, na jukëlan basondaari ni ipëton basondaari, na welara bukul; bi ba win bi nawiak basondaari ni basondaari, ba wëtan pëbúp Pol.

³³ A nawiak basondaari bi ee mobël a na tsu basondaari ba tanul ni mkorente ngëyaas ngëtëb, a na yeparul ni na ci, ni ko wi na ro wi ro.

³⁴ Maa, tsi pëncuaf kandënd bañaan, balon kë lië koo ja ko wi, bacints kë lië koo ja wun. A na win na yilaants pëme tsul ucär, undo kandënd bañaan, na tsu bukul ba tsëpand Pol di tsëko-basondaari.

³⁵ Bi ba band bi tsëpayënee, a basondaari win ba ka pëjejul ba lap, undo uyëlan kandënd bañaan,

³⁶ par bañaan-ucaak bëlieng a fetsiul, bu kë lië koo ja: “Na fiŋaan!”

Pol apokar beenul

³⁷ Uwal wi ba ruka wi ka tsas pëniajand Pol di tsëko-basondaari, a Pol ja nawiak basondaari: “M yëlan pëwëtin ka ñakanaanu ko ulon-a?” A na yankul aja: “M te ugërek-a?

³⁸ Ane cits wi ci-un ñaan Ejipët na natsaree pëkaman pësien tsi ngënu ngi-a? A na tsëpand bayënts ngëmiil ngëbaakër (4.000) di ulaalats, bukul bafiŋ-bañaan.”

³⁹ Pol yankul aja: “Nji, man ci Najudeu, man pënë-ni Tarsu, përaasa pan tienkëtsats pi katim di Siliisia. Man ñaanu, wëtin ma ñakanaan bañaan-ucaak.”

⁴⁰ Bi na niirana bi pëñakan, nul Pol nats tsi tsëpayënee, a na riang kañan pa bañaan yëŋandar. A ba yëŋandar bëlieng, a na ñakanaan bukul tsi pëleets Uyebëreu, aja: